La uku sábado chu Jesús antaku wi kJerusalén. Xla chu xtamakgalhtawakgen titaxtumakgo kkachikin akxni akxilhkgo chatum tiku skiwayan chu lakgaxokgo lata lakachinit. Chu xtamakgalhtawakgen kgalhskinkgo: «Rabí, xlakata lakgaxokgo lakachilh uma chixku, ¿tiku lakgalhinalh, xla o wa xnatlatni?» (Juan 9:2).

Xtamakgalhtawakgen Jesús katsikgo pi uma chixku ni tlawanit talakgalhin kʼatanu latamat, pero max xʼakstu kakgalhskinkan komo chatum lataman tlan lakgalhinan akxni nina lakachin. Jesús kakgalhti: «Uma chixku ni lakgalhinalh, nipara xnatlatni, pero chuna lalh xlakata xlitasiyalh tuku tlan tlawa Dios» (Juan 9:3). Uma chixku lakgaxokgo lakachilh, ni xlakata xla chu xnatlatni xtlawakgonit akgtum talakgalhin, wata wa xpalakata talakgalhin nema Adán kinkamatitaxtininitan, nema tlawa pi putum makglakgalhinanin chu xatatatlanin nalakachinaw, la akxni wi tiku lakgaxokgo lakachin. Xlakata uma chixku lakgaxokgo, tlawa pi Jesús tlan nalimasiya xlitliwakga Dios, chuna la tlawanita akxni kamapaksa tatatlanin.

Jesús lichuwinan la xlilakaskinka natlawayaw uma taskujut. Wan: «Kilitlawatkan xtaskujut Tiku kimalakgachalh xlakata kakuwaniku; akxni tsiswan nila tiku skuja. Xlakata klamajku kkakilhtamaku, xmakgskgot kakilhtamaku klitaxtu» (Juan 9:4, 5). Xlikana, nialh makgas tsankga nani chu xakapukswa natawila kputaknun, niku nila tuku katitlawalh. Pero xlakata nina chan xkilhtamaku, xla litaxtu xmakgskgot kakilhtamaku.

¿Namapaksa Jesús uma chixku? Komo chuna, ¿la natlawa? Jesús chuja ktiyat chu putlun tlawa, litlawani xlakgastapu chu wani: «Kapit lakgachakgana kpila xla Siloam» (Juan 9:7). Xla kgalhakgaxmata chu akxni lakgachakgan, lakawanan. ¡Kalilakpuwanti la paxuwa uma chixku xlakata xlimakgtumku lakawanama xliputuminika xlatamat!

Xtalakatsu chu tiku lakgapaskgo kaks lilakawankgo chu tsukukgo lakgalhskinkgo: «Wa uma chixku tiku kskiwayan, ¿ni xlikana?». Makgapitsin wankgo: «Wa uma». Amakgapitsin ni kanajlakgo pi wa uma lataman chu wankgo: «Nichuna, pero xtachuna tasiya». Chixku kawani: «Akit» (Juan 9:8, 9).

Kgalhskinkgo: «¿La tlan lakawanana?». Xla kgalhtinan: «Chixku tiku wanikan Jesús tlawalh putlun chu kililakpitlawalh kkilakgastapu chu kiwanilh: “Kapit kSiloam chu kalakgachakganti”. Wa xlakata kkalh chu klakgachakgalh, chu tlan klakawanalh». Wa xlakata kgalhskinkgo niku wi tiku mapaksalh, chu xla kakgalhti: «Ni kkatsi» (Juan 9:10-12).

Latamanin linkgo kxlakatin fariseos, tiku na katsiputunkgo la uma chixku tlan lakawanan la uku. Wa xlakata xla kawani: «Kililakpitlawalh putlun kkilakgastapu, chu klakgachakgalh, chu tlan klakawanan». Xlilat pi fariseos xlipaxuwakgolh xlakata chixku paksnit, pero wata tsukukgo limawakakgo Jesús tuku ni xlilat chu wankgo «Uma chixku ni wa Dios malakgachanit, xlakata lakatsala Sábado».  Amakgapitsin wankgo: «¿La chatum makglakgalhina chixku tlan tlawa uma milagros?» (Juan 9:15, 16). Wa xlakata tanu tanu tuku wankgo.

Xlakata tanu tanu tuku wankgo, kgalhskinkgo chixku tiku lakgaxokgo xwanit: «¿Wix tuku wana xpalakata, xlakata tlawalh pi tlan nalakawanana?». Chixku wa: «Xla chatum palakachuwina» (Juan 9:17).

Pero judíos ni kanajlakgo. Max lakpuwankgo pi uma chixku chu Jesús lakkaxlakgonit xlakata nakaʼakgskgawikgo latamanin. Wa xlakata, lakpuwankgo pi xlakata nalakkaxtlawakgo uma, talakaskin nakakgalhskinkgo xnatlatni uma chixku komo xlikana lakgaxokgo xwanit lata lakachilh.