Jisas i stap yet long Jerusalem long de Sabat. Taim em na ol disaipel i wokabaut insait long taun, ol i lukim wanpela rabisman husat i bin bon aipas. Ol disaipel i askim Jisas: “Rabai, husat i mekim sin na dispela man i aipas taim mama i karim em? Em yet o papamama bilong en?”—Jon 9:2.

Ating ol disaipel i tingting planti long olsem wanem pikinini i mekim sin taim em i stap yet long bel bilong mama. Jisas i bekim tok olsem: “Dispela man i no mekim sin na papamama bilong en tu ol i no mekim sin. Tasol dispela samting i kamap bai ol wok bilong God i ken kamap ples klia long rot bilong dispela man.” (Jon 9:3) Dispela man na papamama bilong em i no mekim wanpela rong na dispela i mekim em i kamap aipas, nogat. Yumi olgeta i kisim sin long Adam, olsem na sampela man i bon wantaim ol bagarap long bodi, olsem ol i kamap aipas. Tasol wankain olsem Jisas i bin oraitim ol sikman long ol narapela taim, em bai oraitim dispela aipas man, bambai em i kamapim long ples klia ol strongpela wok bilong God.

Jisas i kamapim klia olsem taim i sot na em i mas hariap long mekim ol dispela wok. Em i tok: “Taim san i stap yet, yumi mas mekim ol wok bilong man i bin salim mi i kam. Nait bai kamap na ol man bai i no inap mekim wanpela wok. Taim mi stap yet namel long ol manmeri bilong graun, mi yet mi lait bilong ol.” (Jon 9:4, 5) Tru tumas, Jisas i stap laip yet, olsem na em i stap olsem man i givim lait long ol manmeri. Tasol klostu nau, em bai dai na stap long tudak bilong ples matmat na em i no inap mekim wanpela samting.

Tasol yu ting Jisas bai oraitim dispela man? Na em bai mekim olsem wanem? Jisas i spet long graun na wokim graun i malumalum, na em i putim long ai bilong dispela man na tok: “Go na wasim ai bilong yu long hulwara bilong Siloam.” (Jon 9:7) Dispela man i mekim olsem Jisas i tok na ai bilong em i op! Tingim amamas em i kisim taim em i lukim ol samting long namba wan taim long laip bilong em!

Ol neiba na ol narapela man husat i save olsem em i bin aipas, ol i kirap nogut! Ol i askim: “Em dispela man bipo em i save sindaun na singaut long mani samting, a?” Sampela i tok: “Em dispela man tasol.” Na ol arapela i no bilip na ol i tok: “Nogat, em i no dispela man, tasol em i wankain olsem em.” Tasol dispela man yet i tok: “Em mi tasol.”—Jon 9:8, 9.

Olsem na ol i askim em: “Olsem wanem na ai bilong yu i op?” Em i bekim tok olsem: “Dispela man ol i kolim Jisas i wokim graun malumalum na putim long ai bilong mi na tokim mi, ‘Go long Siloam na wasim ai.’ Olsem na mi go na wasim na mi inap lukluk.” Na ol i askim em: “Dispela man i stap we?” Na em i tok: “Mi no save.”—Jon 9:10-12.

Ol manmeri i bringim dispela man i go long ol Farisi, long wanem, ol Farisi i laik save hau na dispela aipas man inap lukluk. Em i tokim ol: “Em i putim graun malumalum long ai bilong mi, na mi wasim na mi inap lukluk.” Yu ting ol Farisi i amamas wantaim dispela rabisman i kamap orait? Nogat. Sampela bilong  ol i mekim tok bilong daunim Jisas. Ol i tok: “Dispela man i no kam long God, long wanem, em i no save tingim Sabat.” Tasol sampela Farisi i tok: “Olsem wanem wanpela sinman inap wokim ol kain mirakel olsem?” (Jon 9:15, 16) Olsem na ol i bruk long tupela lain.

Ol i gat narapela narapela tingting, olsem na ol i tanim i go long aipas man em nau ai bilong em i op, na ol i askim em: “Dispela man i opim ai bilong yu, olsem na yu ting wanem long em?” Em i no gat tupela tingting long Jisas, na em i tok: “Em i wanpela profet.”—Jon 9:17.

Ol Juda i no bilipim tok bilong dispela man. Ating ol i ting Jisas i bin pasim tok wantaim em long giamanim ol manmeri. Ol i ting wanpela rot bilong stretim dispela tok em long askim papamama bilong dispela rabisman sapos tru tru em i aipas.