Yesu handi o kasi vo Yerusalãi keteke Liesambata. Osimbu eye kumue londonge viaye va kala oku pita volupale, va mola ulume umue ukuakupinga osimola okuti wa citiwa omeke. Olondonge vi pula Yesu viti: “A Rambei, helie wa linga ekandu, ulume u, ale olonjali viaye omo a citiwa omeke?”—Yoano 9:2.

Olondonge via kũlĩha okuti, ulume waco, ka kuete ocendalomuenyo cimue ka ci letiwe haico ci kasi ale komuenyo osimbu eye ka citiwile. Omo liaco, citava okuti va li pula nda omunu umue o pondola oku linga ekandu osimbu a kasi vimo lia inaye. Yesu o tambulula hati: “Lomue wa linga ekandu, ci kale ulume u, ci kale olonjali viaye, pole, ca lingiwila oco ovilinga via Suku vi situluiwe vokuaye.” (Yoano 9:3) Ci kale ulume omeke, ci kale olonjali viaye, lomue o kuete eko liũvi umue ale ekandu lia koka upeke. Pole, omo liekandu lia Adama omanu vosi va citiwa okuti ka va lipuile kuenda va pondola oku kuata ulema umue, ndeci upeke. Ekalo liulume u omeke, lieca ku Yesu epuluvi lioku situlula ovilinga via Suku, ndeci eye a ci linga kapuluvi akuavo poku sakula olombei.

Yesu o lekisa esilivilo lioku linga ovopange aco lonjanga poku popia hati: “Tu sukila oku linga ovilinga via Una wa numa osimbu kuli utanya; uteke u kasi oku iya okuti lomue omunu o tẽla oku linga upange. Osimbu ndi kasi voluali, ndicinyi coluali.” (Yoano 9:4, 5) Ndopo, olofa via Yesu vi laika oku u kapa vowelema wonjembo, muna eye ka ka tẽla oku linga vali ovopange. Pole, osimbu ka file, eye ono yocinyi cocili ci tuila oluali.

Anga hẽ Yesu o sakula ulume? Oco hẽ o ci linga ndati? Yesu o siyila posi kuenje o tama onata lovate. Eye o laña onata vovaso wulume omeke, kuenje u sapuila hati: “Kuende ka puse vociva co ko Siloama.” (Yoano 9:7) Ulume o pokola. Eci a mala oku pusa, o fetika oku vanja. Sokolola esanju ulume waco a kuata poku vanja onjanja yatete komuenyo waye!

Omanu vana va lisungue laye la vana va kũlĩha okuti wa kala omeke, va komõha kuenje va pula vati: “U siti ulume una wa enda oku tumãla oku pinga osimola?” Vamue va tambula vati: “Eye muẽle.” Pole, vakuavo ka va tava kuenje va popia vati: “Haeyeko, pole, wa lisetãhala laye.” Ulume waco omeke o tambulula hati: “Ame muẽle.”—Yoano 9:8, 9.

Omo liaco, ovo vo pula vati: “Ovaso ove a patuluka ndati?” Eye o tambulula hati: “Ulume o tukuiwa Yesu wa tama onata kuenje wa yi laña vovaso ange, yu wa ndi sapuila hati, ‘Kuende ko Siloama ka puse.’ Nda enda, nda pusa kuenda nda fetika oku leta.” Noke vo pula vali vati: “Ulume waco o kasi pi?” Eye o va tambulula hati: “Siko.”—Yoano 9:10-12.

Omanu vambata ulume waco ku va Fariseo, vana va yongolavo oku kũlĩha ndomo ovaso ulume a patuluka. Ulume waco o va sapuila hati: “[Eye] wa laña onata vovaso ange, yu nda ka lisukuile kuenje ndi lete.” Va Fariseo va sukilile oku sanjuka poku mola okuti ulume ukuakupinga osimola wa sakuiwa. Pole, vamue pokati kavo va lundila  Yesu vati: “Ulume u ka tundile ku Suku, momo ka lavi Esambata.” Handi vakuavo va popia vati: “Ulume ukuakandu o linga ndati ovilimbu ndevi?” (Yoano 9:15, 16) Kuenje va fetika oku kuata ovisimĩlo via litepa.

Vepuluvi liaco, va pula ulume wa patuluka vati: “Nye o popia catiamẽla kokuaye, omo a patulula ovaso ove?” Ulume ka kuete atatãhai atiamẽla ku Yesu kuenje o tambulula hati: “Eye uprofeto.”—Yoano 9:17.

Va Fariseo ka va tava kolondaka viaco. Citava okuti, va kasi oku sima okuti Yesu kuenda ulume omeke, va linga ongombo yoku kemba omanu. Ovo va sokolola okuti onjila ya sunguluka yoku tetulula ocitangi caco, oku pula olonjali viulume waco, nda eye wa kala muẽle omeke.