KAPITE 70
Neʼe Fakamalolo e Sesu He Tagata Neʼe Tupu Kivi
-
ʼE FAKAMALOLO HE TAGATA NEʼE TUPU KIVI PEA NEʼE KOLEKOLE KI TE HAHAʼI
Neʼe kei nofo pe ia Sesu ʼi Selusalemi ʼi te ʼaho ʼo te Sapato. ʼI tana haʼele mo ʼana tisipulo ʼi te kolo, neʼe natou sisio ki he tagata ʼe kolekole ki te hahaʼi pea neʼe tupu kivi. Neʼe fehuʼi fenei age e te ʼu tisipulo kia Sesu: “Lapi, ko ai ʼae neʼe agahala, ko te tagata koa ʼaeni peʼe ko ʼana matuʼā, ke tupu kivi ai?”—Soane 9:2.
Neʼe lagi fia iloʼi e te ʼu tisipulo pe neʼe feala ke agahala he tahi ʼi tana ʼi te fatu ʼo tana faʼe. Neʼe tali fenei e Sesu: “Neʼe mole agahala te tagata ʼaeni peʼe ko ʼana matuʼā. Kaʼe neʼe tupu feia la ke ha ai te ʼu gaue ʼa te ʼAtua.” (Soane 9:3) Koia neʼe mole kivi te tagata ʼaia ʼuhi ko he hala neʼe ina fai pe neʼe fai e ʼana matuʼā. Kaʼe, ʼuhi ko te agahala ʼa Atama, ʼe tutupu agahala ai te hahaʼi fuli pea ʼe feala ke natou maʼu he ʼu mahaki, ohage la ʼe feala ke natou matakivi. Kaʼe ʼaki te mahaki ʼa te tagata ʼaia, neʼe maʼu ai e Sesu te faigamalie ke ina fakaha te ʼu gaue ʼa te ʼAtua, ohage ko tana fai ʼi muʼa atu ʼi tana fakamalolo te hahaʼi mahahaki.
Neʼe fakaha e Sesu te maʼuhiga ʼae ke fai fakavilivili te ʼu gaue ʼaia. Neʼe ina ui fenei: “ ʼE tonu ke tou fakahoko ʼi te kei ʼaho te ʼu gaue ʼa Ia ʼae neʼe ina fekauʼi mai au. ʼE hoko mai anai te poʼuli ʼae ʼe mole feala ke gaue ai he tahi. ʼI taku kei nofo ʼi te malamanei, ko au te malama ʼo te malamanei.” (Soane 9:4, 5) Koia ʼi te temi ʼae neʼe mate ai ia Sesu, neʼe nofo ʼi te faitoka, ʼae ʼe hage ko he potu fakapoʼuli, pea neʼe mole kei feala ke ina fai ai he gaue. Kaʼe ʼi te temi ʼae neʼe kei maʼuli ai, neʼe ko ia te malama ʼo te malamanei.
Kaʼe ʼe fakamalolo anai koa e Sesu ia te tagata? Pea ʼe ina fakamalolo feafeaʼi anai? Neʼe ʼaʼanu ia Sesu ki te kele pea ʼaki tona savai neʼe pela. Neʼe ina vali leva ki te ʼu mata ʼo te tagata kivi pea neʼe ina ui fenei: “Alu ʼo fufulu ʼou mata ʼi te maʼanuʼaga ʼo Siloame.” (Soane 9:7) Neʼe fakalogo ki ai te tagata. ʼI tana fufulu ʼona mata, neʼe sio ai leva! Ke ke fakakaukauʼi age muʼa tana fiafia ʼi tana hoki sio ʼaia!
Neʼe punamaʼuli ʼona vahaʼa fale pea mo ʼihi atu ʼae neʼe natou iloʼi ia ia ʼi tana kei kivi. Neʼe natou fehuʼi fenei: “ ʼE mole ko te tagata koa la ʼaeni neʼe heka ʼo kolekole ki te hahaʼi?” Neʼe ui fenei e ʼihi: “ ʼEi, ʼe ko ia.” Kaʼe neʼe mole tui ʼihi ki ai pea neʼe natou ui fenei: “Kailoa ia, kaʼe ʼe hoko ki ai.” Kaʼe neʼe ui fenei e te tagata: “ ʼE ko au ia ia.”—Soane 9:8, 9.
Koia, neʼe natou fehuʼi fenei ki ai: “Kotea ʼae neʼe hoko ʼo ke lava sio ai?” Neʼe ina tali fenei: “Ko te tagata ʼe higoa ko Sesu neʼe ina natu he moʼi pela ʼo ina vali ki ʼoku mata pea neʼe ina ui fenei mai: ‘Alu ki Siloame ʼo fufulu ai ʼou mata.’ Neʼe au alu ai ʼo fufulu ʼoku mata pea neʼe au sio.” Pea neʼe natou fehuʼi fenei ki ai: “ ʼE ʼifea te tagata ʼaia?” Neʼe ina tali fenei age: “ ʼE mole au iloʼi.”—Soane 9:10-12.
Neʼe taki e te hahaʼi ia te tagata ki te kau Faliseo, ʼae neʼe natou fia iloʼi pe neʼe fakamalolo feafeaʼi ia te tagata. Neʼe ina ui fenei kia natou: “Neʼe ina vali te moʼi pela ki ʼoku mata, pea neʼe au fufulu leva ʼoku mata ʼo au sio ai.” Neʼe tonu ia ke fakafiafia te kau Faliseo ʼi te kua fakamalolo ʼo te tagata ʼaia neʼe kolekole ki te hahaʼi. Kaʼe neʼe valoki e ʼihi kau Faliseo Soane 9:15, 16) Pea neʼe natou fefihiʼaki ai.
ia Sesu, ʼo natou ui fenei: “ ʼE mole haʼu te tagata ʼaia mai te ʼAtua, koteʼuhi ʼe mole mulimuli ia ki te Sapato.” Neʼe ui fenei e ʼihi atu: “ ʼE lava feafeaʼi ki he tagata agahala ke ina fakahoko he ʼu taʼi milakulo feia?” (ʼI tanatou felogokehekeheʼaki, neʼe natou hahaga age ki te tagata ʼae neʼe kua sio pea natou fehuʼi fenei age: “Kotea la tau manatu ʼo ʼuhiga mo ia, koteʼuhi ʼe ko koe ʼae neʼe ina fakamalolo?” Neʼe ina tali fenei: “ ʼE ko he polofeta ia,” pea neʼe tui papau ki ai.—Soane 9:17.
Kaʼe neʼe mole fia tui ki ai te kau Sutea. Neʼe lagi natou manatu neʼe talaga Sesu mo te tagata kivi, ke nā kakaʼi te hahaʼi. Koia, neʼe natou manatu ai ko te puleʼaki pe ʼe tahi ke iloʼi ai ia te moʼoni, ko te fakafehuʼi te ʼu matuʼā ʼa te tagata pe neʼe kivi moʼoni.