71 YATICHÄWI
Fariseonakajj juykhükän uka jaqeruw jisktʼapjjäna
-
FARISEONAKAJJ JUYKHÜKÄNA UKA JAQERUW WAL JISKTʼAPJJÄNA
-
RELIGIÓN PʼEQTʼIRINAKAJJ JUYKHÜPKASPAS UKHAMÄNWA
Fariseonakajja, janiw Jesusajj nasïwitpach mä juykhu jaqer qollkäna uk creyiñ munapkänti. Ukatwa awk taykapar jawsayapjjäna. ‘Sinagogat jaqsutapjjaspänwa’ uk awk taykapajj yatisipjjänwa (Juan 9:22). Jaqsutäsinjja janiw mayni judionakampejj parlapkaspänti, ukajj qollqe toqet janiw familiapar waltʼaykaspänti.
Fariseonakajj akham jisktʼapjjäna: “¿Janit jupajj juykhuw nasïna sapkta uka yoqamäki? ¿Kunjamatarak jichhajj uñj-jjesti?” sasa. Jupanakasti sapjjänwa: “Cheqas nanakajj jupan awk taykapäpjjtwa, jupajj juykhupuniw nasiski. Kunjamatsa jupajj uñjpacha, khitis nayranakap qollpacha uk janiw yatipkti” sasa. Wawapajj kunjamatsa qollatäna uk yatipkchïnsa, sum amuytʼasisaw akham sapjjäna: “Jupar antisas jisktʼapjjam. Jilïrëjjewa, jupa pachpaw parlañapa” sasa (Juan 9:19-21).
Fariseonakajj mayampiw juykhükäna uka jaqer jawsapjjäna, Jesús contra parlasaw ajjsarayañ munapjjäna, sapjjarakïnwa: “Diosar jachʼañcham, nanakajj uka jaqen juchararätap yatipjjtwa” sasa. Uk jan yäqasajj juykhükäna uka jaqejj akham sänwa: “Jupajj juchararat janicha uk janiw yatkti. Jan ukasti akak yatta, nayajj juykhüyätwa, jichhajj uñj-jjtwa” sasa (Juan 9:24, 25).
Fariseonakajj janiw ukharuk amuktʼañ munapkänti, ukatwa akham sapjjäna: “¿Kamacharaktamsti? ¿Kunjamarak nayranakam qolltamsti?” sasa. Jupajj jan ajjsartʼasaw akham säna: “Sisjjapjjaraksmasä, jumanakajj janiw istʼapktati. ¿Kunatsa mayamp istʼañ munapjjta? Jan ukajj ¿jupan discipulopäñcha munapjjta?” sasa. Fariseonakajja wal colertʼasisajj akham sapjjänwa: “Jumajj uka jaqen discipulopätawa, nanakajj Moisesan discipulopäpjjtwa. Nanakajj yatipjjtwa Diosaw Moisesarojj parläna, ukampis aka jaqejj kawkitpun jutaskchi, janiw yatipkti” sasa (Juan 9:26-29).
Juykhükäna uka mayjasiri jaqejja akham sarakïnwa: “Ukajj wali muspkañarakisä, jumanakajj janiw kawkit jutatapsa yatipktati, jupaw nayranakaj qollitu” sasa. Ukatjja khitinakarus Jehová Diosajj istʼi, sum uñjaraki uka toqet akham sänwa: “Jiwasajj yattanwa Diosajj janiw jucharar jaqenakarojj istʼkiti, khititï Diosar ajjsarki, jupan munañapsa luraraki ukarojj istʼiwa. Nasïwitpach mä juykhu jaqeruw qollatayna sañajj janipuniw nayra tiempotpachajj istʼasirïkiti” sasa. Ukjjarojj sarakïnwa: “Janitï aka jaqejj Diosan khitanitäkaspa ukhajja, janiw kuns lurkaspati” sasa (Juan 9:30-33).
Uk satajj fariseonakajj janiw kamsirjamäpkänsa, ukatwa akham jiskʼachapjjäna: “Jumajj juchan phoqantataw nastajja, ¿ukatti jumajj nanakar yatichapjjetäta?” sasa. Ukatsti uka jaqerojj sinagogat jaqsupjjänwa (Juan 9:34).
Jesusajj kunas pasatayna uk yatisajja, uka jaqer jikjjatasajj akham jisktʼäna: “¿Jaqen Yoqapar jumajj confiytati?” sasa. Jupajj sarakïnwa: “Tata, ¿khitirak jupasti, ukhamat jupar confiyañajataki?” sasa. Jesusasti qhan säna: “Juparojj uñjtawa. Cheqpachansa khititï jumamp parlaski ukawa” sasa (Juan 9:35-37).
Uka jaqesti sarakïnwa: “Tata, nayajj jupar confiytwa” sasa. Ukatjja Jesusar creyitapa uñachtʼayañatakejj nayraqataparuw altʼasïna. Ukatwa Jesusajj akham säna: “Akapachan juzgatäñapatakiw nayajj akapachar jutta, khitinakatï jan uñjapki ukanakan uñjapjjañapataki, khitinakatï uñjapki ukanakan juykhuptapjjañapataki” sasa (Juan 9:38, 39).
Ukankapkäna uka fariseonakajj janiw juykhüpkänti, ukampis janiw jaqenakarojj Diosar serviñ yanaptʼapkänti, ukhamatwa juykhu irpirinakäpjjäna. Juan 9:40, 41). Jupanakatï Israel markan jan yatichirïpkaspäna ukhajja, Jesusan Mesiasätap jan creyipjjatapajj amuyañjamäspänwa. Ukampis Diosan Leyip uñtʼkasina Jesusar jan creyipjjatapajj wali jachʼa juchänwa.
Jupanakajj Jesusar akham jisktʼapjjäna: “¿Janejjay nanakajj juykhüpktejja?” sasa. Jesusasti sarakïnwa: “Jumanakatï juykhüpjjasmajja, janiw juchanïpkasmati, ukampis jumanakajj ‘uñjapjjtwa’ sasaw sapjjtajja, ukatwa juchanakamajj jumanak chikäski” sasa (