Bann Farizyen pa oule aksepte ki Zezi in geri en zonm ki ti ne aveg, alor zot kriy son paran. Son paran i konnen ki zot kapab “ganny pouse dan sinagog.” (Zan 9:22) Si sa ti arive, zot ti pou nepli kapab asosye avek lezot Zwif e sa ti pou afekte zot fanmir dan domenn sosyal e ekonomik.

Bann Farizyen i demann de kestyon: “Eski sa i zot garson ki zot dir i ti ne aveg? Ki mannyer i kapab vwar kler aprezan?” Son paran i reponn: “Nou konnen ki i nou garson e ki i ti ne aveg. Me nou pa konnen ki mannyer i’n kapab vwar kler aprezan ouswa lekel ki’n fer li vwar kler. I gran li. Li ki bezwen koze.”​—Zan 9:19-21.

Alor ankor enn fwa, bann Farizyen i kriy sa zonm. Pour fer li per, zot dir li ki zot annan levidans kont Zezi. Zot dir li: “Dir laverite devan Bondye, nou konnen ki sa zonm i annan en move lavi.” Sa zonm ki ti aveg pa oule kontredir zot, alor i dir: “Si sa zonm i annan en move lavi, sa mon pa konnen. Me sa ki mon konnen se ki mon ti aveg, me aprezan mon vwar kler.”​—Zan 9:24, 25.

Bann Farizyen pa oule les tonbe, alor zot dir: “Ki i’n fer avek ou? Ki mannyer i’n fer ou vwar kler?” Sa zonm i ganny en pe kouraz pour reponn: “Mon’n fini dir zot me zot pa’n ekoute. Akfer zot oule ki mon dir zot ankor? Pa dir mwan zot osi zot anvi vin son disip?” Sa i fer bann Farizyen ankoler e zot dir: “Ou en disip sa zonm, me nou nou disip Moiz. Nou konnen ki Bondye ti koz avek Moiz, me sa zonm, nou pa konnen kot i sorti.”​—Zan 9:26-29.

Sa mandyan i sirprann e i dir: “I vreman drol ki zot pa konnen kot i sorti, kan li ki’n fer mwan vwar kler.” Apre sa, sa zonm i donn en larepons ki lozik konsernan ki kalite dimoun Bondye i ekoute e donn son laprouvasyon: “Nou konnen ki Bondye pa ekout bann ki annan en move lavi, me si en dimoun i annan en gran respe pour Bondye e i fer son lavolonte, Bondye i ekout li. Nou pa’n zanmen tande ki en dimoun in deza fer en dimoun ki’n ne aveg vwar kler.” Sa zonm i fini par dir: “Si sa zonm pa ti sorti kot Bondye, i pa ti pou kapab fer nanryen.”​—Zan 9:30-33.

Bann Farizyen pa konnen ki pour dir sa mandyan, alor zot maltret li e dir: “Ou’n ne dan ou ta pese e la ou pe vin ansenny nou?” Zot met li deor.​—Zan 9:34.

Ler Zezi i tande ki’n arive, i rod sa zonm e demann li: “Eski ou annan lafwa dan Garson zonm?” Sa zonm i dir: “Msye, dir mwan lekel li pour ki mon kapab annan lafwa dan li?” Zezi i klerman dir li: “Anfet, ou’n vwar li, li menm ki pe koz avek ou.”​—Zan 9:35-37.

Sa zonm i reponn: “Wi Senyer, mon annan lafwa dan li.” Sa zonm i demontre son lafwa ek respe par azenou devan Zezi e Zezi i dir li sa parol enportan: “Mon’n vin dan lemonn pour ki sa ki mon fer, i fer bann ki pa vwar kapab vwar e bann ki vwar vin aveg.”​—Zan 9:38, 39.

Bann Farizyen i tann sa konversasyon e zot konnen ki zot pa aveg. Me ki rol zot sipoze zwe pour gid lezot spirityelman? Pour defann zot lekor zot demande: “Nou pa aveg nou osi, non?” Zezi i dir: “Si zot ti aveg, zot pese ti pou ganny pardonnen. Me la zot pe dir, ‘Nou vwar,’ zot pese pa pou ganny pardonnen.” (Zan 9:40, 41) Si zot pa ti bann ansenyan Lalwa, petet i ti pou pli fasil konpran akoz ki zot pa’n aksepte ki Zezi i Mesi. Me vi ki zot konn Lalwa, i en pese grav ki zot rezet Zezi.