Era sega ni vakabauta na Farisi ni vakabula o Jisu na tagane sucu mataboko, era mani kaciva nona itubutubu. Erau kila na itubutubu ni rawa ni rau “vakatalai tani mai na nodra valenilotu.” (Joni 9:22) Ke caka qori vua e dua na Jiu, ena vakaleqa na veimaliwai kei na bula vakailavo ni nona vuvale.

E rua nodra taro na Farisi: “Qo na luvemudrau drau tukuna ni sucu mataboko? E qai rai vakacava?” Erau sauma na itubutubu: “Keirau kila ni luvei keirau, keirau kila tale ga ni sucu mataboko. Ia keirau sega ni kila se rai vakacava. Keirau sega tale ga ni kila se o cei e vakavuna me rai.” Sa rairai vakamacalataka oti vei ira na luvedrau na veika e yaco, ia rau se qaqarauni ga na itubutubu ena nodrau kaya: “Ni tarogi koya ga, e sa tamata bula. O koya ga me vakamacala kina.”—Joni 9:19-21.

Era kaciva tale na tagane na Farisi ra qai vakarerei koya nira kaya sa tiko na ivakadinadina me beitaki kina o Jisu. Era vakaroti koya sara: “Vakalagilagia na Kalou, keimami kila ni tamata ivalavala ca o ka qori.” E sabaya na tagane na nodra veibeitaki ni kaya: “Au sega ni kila se tamata ivalavala ca se sega. Na ka ga au kila niu a mataboko, qo au sa rai rawa.”—Joni 9:24, 25.

Era sega ni soro na Farisi, era taroga tale: “Cava e cakava vei iko? Cava e cakava mo rai kina?” E sauma ena doudou na tagane: “Au sa tukuna oti vei kemuni, oni sega ni via rogoca. Cava oni via rogoca tale kina? E cava, oni sa via nona tisaipeli tale ga?” Era vakalialiai koya na Farisi ena levu ni nodra katakata: “O iko ga o nona tisaipeli na tamata ya, o keimami na tisaipeli i Mosese. Keimami kila ni vosa vei Mosese na Kalou, ia na tamata qori keimami sega ni kila se lako mai vei.”—Joni 9:26-29.

Dua na ka nona kurabui na tagane daukerekere, e kaya: “Sa dua na ka veivakurabuitaki qo ni oni sega ni kila se lako mai vei, ia e vakavuna meu rai.” Sa qai vakamatatataka na tagane o cei ena rogoca na Kalou se vakadonuya: “Eda kila ni sega ni dau rogoci ira na ivalavala ca na Kalou, ia ke dua e rerevaka na Kalou qai cakava na lomana, ena rogoci koya. Eda se sega ni bau rogoca ni dua e vakavuna me rai o koya e sucu mataboko.” Na ka ga e macala e keri: “Ke sega ni tamata ni Kalou na tagane qo, ena sega ni rawata e dua na ka.”—Joni 9:30-33.

Nira sega ni sauma rawa na Farisi na nona vosa na daukerekere, era sa qai vakasewasewani koya: “O sucu ivalavala ca ga, o qai via vakavulici keimami?” Era mani cemuri koya i tuba.—Joni 9:34.

Ni rogoca o Jisu na ka e yaco, e vaqarai koya na tagane qai taroga: “O vakabauta na Luve ni tamata?” E sauma na tagane a vakabulai: “O cei o koya turaga? Ni tukuna mada mai meu vakabauti koya tale ga.” E tukuna vakadodonu vua o Jisu: “O sa raici koya, o koya sara ga drau veivosaki tiko.”—Joni 9:35-37.

E sauma na tagane: “Au vakabauti koya Turaga.” E cuva sara vei Jisu me vakaraitaka nona vakabauta kei na nona veidokai. E qai cavuta o Jisu e dua na tikina bibi: “Au lako mai vuravura meu veilewai, mera rai na mataboko, mera mataboko tale ga na rai.”—Joni 9:38, 39.

Era kila na Farisi era tiko e kea nira sega ni mataboko. Ia vakacava na nodra itavi mera veituberi vakayalo? Era via soli iulubale ena nodra kaya: “Keimami sega ni mataboko!” E sauma vei ira o Jisu: “Ke oni mataboko, e sega nomuni valavala ca. Ia oni kaya, ‘Keimami sa rai.’ Kena ibalebale, e se tiko ga na nomuni valavala ca.” (Joni 9:40, 41) Ke ra sega ni dau veivakavulici e Isireli, ena rairai ciqomi na nodra sega ni vakabauta ni Mesaia o Jisu. Ia nira kila vinaka na Lawa, e cala bibi kina nodra sega ni vakabauti koya.