Falesi lẹ ma jlo na kẹalọyi dọ Jesu hunnukun na dawe he yin jiji di nukuntọ́nnọ lọ, enẹwutu yé ylọ mẹjitọ etọn lẹ wá yede dè. Mẹjitọ lọ lẹ yọnẹn dọ emi sọgan yin “yinyan sọn sinagọgu mẹ.” (Johanu 9:22) Ṣigba, eyin yé ma na nọ dogbẹ́ hẹ Ju hatọ lẹ ba, enẹ na hẹn kọdetọn vẹadi lẹ wá whẹndo lọ ji to akuẹzinzan-liho podọ to haṣinṣan yetọn hẹ mẹdevo lẹ mẹ.

Falesi lẹ kàn kanbiọ awe sè dọmọ: “Be visunnu mìtọn he mì dọ dọ e yin jiji di nukuntọ́nnọ lọ die ya? To whelọnu lo, nawẹ ewọ wagbọn do to numọ todin?” Mẹjitọ lọ lẹ gblọn dọmọ: “Mí yọnẹn dọ visunnu mítọn die podọ ewọ yin jiji di nukuntọ́nnọ. Ṣigba, lehe ewọ wagbọn do to numọ todin, mí ma yọnẹn.” Eyin visunnu yetọn tlẹ ko dọ nuhe jọ lọ na yé, mẹjitọ lọ lẹ to aṣeji gando nuhe yé na gblọn go bo dọmọ: “Mì kanse e. E ko whẹ́n mẹho. Ewọ lọsu wẹ dona dọho.”—Johanu 9:19-21.

Enẹwutu, Falesi lẹ sọ vọ́ dawe lọ ylọ bo vannukundo e bosọ dọ dọ yé tindo kunnudenu sọta Jesu. Yé biọ to e si dọmọ: “Dọ nugbo lọ to Jiwheyẹwhe nukọn; míwlẹ yọnẹn dọ ylandonọ de wẹ dawe ehe.” Nado diọkọna whẹsadokọnamẹ yetọn, dawe he yin nukuntọ́nnọ dai lọ dọmọ: “Yẹn ma yọnẹn eyin ylandonọ de wẹ ewọ.” Ṣigba e dọ dọ, “Onú dopo he yẹn yọnẹn wẹ yindọ, yẹn yin nukuntọ́nnọ dai, bo to numọ todin.”—Johanu 9:24, 25.

Na Falesi lẹ ma jlo na jo whẹho lọ do domọ wutu, yé zindonukọn dọmọ: “Etẹwẹ ewọ wà na we? Nawẹ e hùn nukun towe lẹ gbọn?” Dawe lọ do adọgbigbo hia jẹ obá de mẹ bo gblọn dọmọ: “Yẹn ko dọna mì dai, ṣogan mì ma dotoai. Naegbọn mì jlo nado vọ́ ehe sè? Kavi mìlọsu jlo na lẹzun devi etọn lẹ ga wẹ?” Falesi lẹ gblehomẹ sinsinyẹn bo dọna ẹn dọmọ: “Hiẹ wẹ yin devi dawe enẹ tọn, ṣigba devi Mose tọn wẹ míwlẹ yin. Mí yọnẹn dọ Jiwheyẹwhe dọhona Mose; ṣigba na dawe ehe tọn, mí ma yọ́n fie ewọ wá sọn.”—Johanu 9:26-29.

Nubiọdutọ lọ gblọn dọmọ: “Na taun tọn, nupaṣamẹ de wẹ ehe, dọ mì ma yọ́n fie ewọ wá sọn, ṣogan ewọ ko hùn nukun ṣie lẹ.” Enẹgodo, dawe lọ yihojlẹdohogo to aliho he sọgbe mẹ gando mẹhe Jiwheyẹwhe nọ dotoaina bo nọ kẹalọyi go dọmọ: “Mí yọnẹn dọ Jiwheyẹwhe ma nọ dotoaina ylandonọ lẹ, ṣigba eyin mẹdepope dibusi Jiwheyẹwhe bo nọ wà ojlo etọn, omẹ enẹ wẹ ewọ nọ dotoaina. Sọn hohowhenu, e ma ko yin sisè pọ́n gbede dọ mẹdepope hùn nukun mẹhe yin jiji di nukuntọ́nnọ de tọn.” Enẹwutu, e dotana po hodidọ ehelẹ po dọmọ: “Eyin dawe ehe ma wá sọn Jiwheyẹwhe dè, e ma sọgan wà nudepope.”—Johanu 9:30-33.

Na Falesi lẹ ma sọgan jẹagọdo aliho mẹhẹnlẹnnupọn tọn he nubiọdutọ lọ yizan wutu, yé gbọ bo zun in po hogbe ehelẹ po dọmọ: “Hiẹ lọsu blebu wẹ yin jiji di ylandonọ, ṣogan, be pinplọn mí wẹ a te ya?” Yé sọ dlan ẹn do gbonu.—Johanu 9:34.

To whenue Jesu sè nuhe jọ do dawe lọ go, e dín in mọ bo kanse e dọmọ: “Be hiẹ tindo yise to Visunnu gbẹtọ tọn mẹ ya?” Dawe he e hunnukun na lọ sọ gblọn dọmọ: “Mẹdaho, mẹnu wẹ ewọ? Dọna mi na yẹn nido tindo yise to ewọ mẹ?” Jesu dọna ẹn tlọlọ dọmọ: “Hiẹ ko mọ ẹn podọ, na nugbo tọn, mẹhe to hodọna we lọ wẹ ewọ.”—Johanu 9:35-37.

Dawe lọ gblọn dọmọ: “Oklunọ, yẹn tindo yise to ewọ mẹ.” Dawe lọ do yise po sisi po hia Jesu, bo litai to nukọn etọn, dile Jesu to ohó titengbe ehelẹ dọ dọmọ: “Na whẹdida ehe wutu wẹ yẹn do wá aihọn ehe mẹ: na mẹhe ma nọ mọnú lẹ nido sọgan mọnú podọ mẹhe nọ mọnú lẹ nido sọgan lẹzun nukuntọ́nnọ.”—Johanu 9:38, 39.

Falesi he to finẹ lẹ yọnẹn dọ emi ma yin nukuntọ́nnọ. Ṣigba, etẹwẹ dogbọn linlẹn yetọn dọ emi yin anademẹtọ gbigbọmẹ tọn lẹ dali? Nado yiavùnlọna yede, yé kanse dọmọ: “Kavi nukuntọ́nnọ wẹ míwlẹ lọsu yin ga ya?” Jesu dọmọ: “Eyin mìwlẹ ko yin nukuntọ́nnọ wẹ, mì ma na ko tindo ylando. Ṣigba, todin mìwlẹ dọ dọ, ‘Mí nọ mọnú.’ Enẹwutu, ylando mìtọn gbọṣi aimẹ.” (Johanu 9:40, 41) Eyin yé ma ko yin mẹplọntọ lẹ to Islaeli wẹ, e ma na ko yin nupaṣamẹ de dọ yé gbẹ́ Jesu dai taidi Mẹsia lọ. Ṣigba, na yé ko yọ́n Osẹ́n lọ wutu, ylando sinsinyẹn de wẹ e yin nado gbẹ́ ẹ dai.