Orang Parisi enggai pechaya Jesus ngeraika lelaki ke buta kenyau ari ada. Nyadi sida ngangauka apai indai iya. Apai indai lelaki nya takut, laban sida nemu sida ulih “dibuai ari balai gempuru.” (John 9:22) Enti utai tu nyadi, orang Judah ke bukai deka ngenyauhka diri ari sida, lalu sida deka napi penanggul ba duit.

Orang Parisi nanya apai indai lelaki nya: “Kati iya tu anak seduai? Kati iya buta kenyau ari ada? Baka ni ku iya tau ulih meda diatu?” Sida nyaut: “Au. Iya endang anak kami ke buta kenyau ari ada. Tang kami enda nemu baka ni ku iya tau ulih meda diatu tauka sapa ke udah ngeraika mata iya.” Lelaki nya engka bisi madahka apai indai iya pasal utai ke udah nyadi. Tang apai indai iya nyaut orang Parisi enggau bejimat, sida madahka: “Tanya meh iya. Iya udah besai lalu patut nyaut kita kediri empu.”—John 9:19-21.

Nyadi, orang Parisi ngangauka lelaki nya baru. Sida nguji ngenakutka iya enggau madah sida bisi bukti nuduh Jesus. Ku sida madah: “Sebut utai ti amat kena ngemuliaka Petara. Kami nemu lelaki nya orang ke bedosa.” Taja pia, lelaki nya nyaut sida: “Aku enda nemu sekalika lelaki nya orang ke bedosa tauka enda. Tang tu utai ke ditemu aku: Suba aku buta, tang diatu aku ulih meda.”—John 9:24, 25.

Orang Parisi enggai nerima utai ke dipadahka lelaki nya. Lalu sida madah: “Nama utai ke udah dikereja iya ngagai nuan? Baka ni ku iya ngeraika mata nuan?” Lelaki nya nyaut orang Parisi enggau berani: “Aku udah madah ngagai kita. Tang kita enggai mending. Nama kebuah kita deka ninga baru? Kati kita pan deka nyadi murid iya?” Orang Parisi balat ringat enggau saut iya, nya alai sida nuduh iya: “Nuan murid lelaki nya, tang kami murid Moses. Kami nemu Petara udah bejaku ngagai Moses. Tang kami enda nemu ari ni penatai lelaki nya.”—John 9:26-29.

Lelaki nya berasai iran enggau saut ari orang Parisi. Iya madah: “Amat nyelai tu. Kita enda nemu ari ni penatai iya. Taja pia, iya udah ngeraika mata aku.” Lelaki nya lalu madahka utai tu pasal orang ke didinga sereta diterima Petara: “Kitai nemu Petara enda mendingka sampi orang ke bedosa. Tang Iya mendingka sampi orang ke nangika Iya sereta ngereja peneka Iya. Kenyau ari kelia, nadai kala kitai ninga pasal orang ke ulih ngeraika mata orang ke buta kenyau ari ada. Enti iya ukai datai ari Petara, iya tentu enda ulih ngereja nama-nama utai.”—John 9:30-33.

Sida enda ulih ngelaban utai ke disebut lelaki nya, nyadi orang Parisi balat nganu iya: “Nuan penuh laban dosa kenyau ari ada. Tang diatu, nuan deka ngajar kami?” Sida lalu muru iya pansut.—John 9:34.

Lebuh Jesus ninga pasal utai ke udah nyadi, iya ngiga lelaki nya lalu nanya iya: “Kati nuan arapka Anak Mensia?” Lelaki nya nyaut: “Sapa orang nya Tuan, ngambika aku ulih arapka iya?” Jesus terus terang nyaut iya: “Nuan udah meda iya. Kebendar nya, iya meh ke bejaku enggau nuan diatu.”—John 9:35-37.

Lelaki nya nyaut: “Aku arapka iya, Tuan.” Lalu lelaki nya besugang ngagai Jesus kena nunjukka iya arap sereta bebasaka Jesus. Lalu Jesus madahka: “Aku datai ke dunya tu ngambika orang ulih diakim. Enggau nya, orang ke buta ulih meda, lalu orang ke ulih meda nyadi buta.”—John 9:38, 39.

Orang Parisi ke bisi ba dia nemu diri enda buta. Tang baka ni enggau pengawa sida ke patut ngiring orang ngagai Petara? Sida nanya Jesus: “Kati kami mega dikumbai nuan buta?”  Ku Jesus nyaut sida: “Enti kita buta, tentu kita enda bedosa. Tang diatu kita madahka, ‘Kami ulih meda.’ Nya alai, dosa kita enda diampun.” (John 9:40, 41) Enti sida ukai tuai pengarap ba Israel, kitai ulih faham kebuah sida nulak Jesus nya Messiah. Tang ketegal sida bisi penemu pasal Adat, nya alai sida sigi ngereja dosa ti besai maya sida nulak Jesus.