Afarisai matiretĩkia atĩ Jesu nĩ ahonetie mũndũ waciarĩtwo arĩ mũtumumu, kwoguo magathiĩ kũũria aciari a mũndũ ũcio. Aciari acio nĩ moĩ atĩ no ‘maingatwo thunagogi-inĩ.’ (Johana 9:22) Kũngĩthiĩ ũguo, Ayahudi arĩa angĩ no mage kũnyitanĩra nao, na ũndũ ũcio ũkorũo na moimĩrĩro moru harĩ famĩlĩ yao.

Afarisai makamoria ciũria ici igĩrĩ: “Ũyũ nĩwe mũrũ wanyu ũrĩa mugaga aaciarĩtwo arĩ mũtumumu? Gũthiĩte atĩa rĩu akambĩrĩria kuona?” Aciari acio makoiga: “Nĩ tũĩ atĩ ũyũ nĩwe mũrũ witũ na atĩ aaciarirũo arĩ mũtumumu. No rĩrĩ, ũrĩa gũthiĩte akambĩrĩria kuona, ithuĩ tũtiũĩ; kana nũ ũmũhingũrĩte maitho, ithuĩ tũtiũĩ.” O na angĩkorũo mũriũ wao nĩ ekũmeerĩte ũrĩa gũthire, aciari acio nĩ marehũga mũno ũrĩa megũcokia kwoguo makoiga: “Mũriei nĩ mũndũ mũgima. Nĩ eyarie.”​—Johana 9:​19-21.

Nĩ ũndũ ũcio Afarisai mageta mũndũ ũcio rĩngĩ na makamwĩkĩra guoya makamwĩra atĩ marĩ na ũira wa gũthitanga Jesu. Makamwĩra: “Aria ma ũgoocithie Ngai; nĩ tũĩ atĩ mũndũ ũcio nĩ mwĩhia.” Atekũmakio nĩ thitango ĩyo, mũndũ ũcio akameera: “Niĩ ndiũĩ kana nĩ mwĩhia.” Agacoka akoiga: “Ũndũ ũrĩa njũĩ nĩ atĩ, ndĩrarĩ mũtumumu, no rĩu nĩ ndĩrona.”​—Johana 9:​24, 25.

Afarisai makenda kũmenya makĩria makamũũria: “Aragwĩkire atĩa? Arakũhingũrire maitho atĩa?” Mũndũ ũcio akamacokeria arĩ na ũmĩrĩru akameera: “Na githĩ ndimwĩrire, na mũtinathikĩrĩria. Mũrenda kũigua rĩngĩ nĩkĩ? Kaĩ o na inyuĩ mũrenda gũtuĩka arutwo ake?” Afarisai makarakara makamwĩra: “Wee ũrĩ mũrutwo wa mũndũ ũcio, ĩndĩ ithuĩ tũrĩ arutwo a Musa. Nĩ tũĩ atĩ Ngai nĩ arĩtie na Musa, no ũhoro wĩgiĩ mũndũ ũyũ-rĩ, tũtiũĩ kũrĩa oimĩte.”​—Johana 9:​26-29.

Mũndũ ũcio ũrĩkĩtie kũhonio akagegio nĩ ciugo icio akoiga: “Ũkĩrĩ ũndũ wa magegania atĩ mũtiũĩ kũrĩa oimĩte, na nĩ aratũmire hote kuona.” Agacoka akoiga ũndũ ũronania andũ arĩa Ngai athikagĩrĩria na agetĩkĩra, akameera: “Nĩ tũĩ Ngai ndathikagĩrĩria ehia, no mũndũ o wothe angĩkorũo nĩ etigĩrĩte Ngai na nĩ ekaga wendi wake, nĩ amũthikagĩrĩria. Kuuma tene gũtirĩ kwaiguĩka mũndũ ũhingũrĩte maitho ma mũndũ waciarirũo arĩ mũtumumu.” Akarĩkĩrĩria na kuuga: “Korũo mũndũ ũyũ ndoimĩte kũrĩ Ngai-rĩ, gũtirĩ ũndũ o na ũmwe angĩrahotire gwĩka.”​—Johana 9:​30-33.

Thutha wa kuona matingĩhota kũregana na ihooto cia mũndũ ũcio, Afarisai makamũruma makamwĩra: “Wee waciarirũo na mehia, na rĩu nĩ gũtũruta ũratũruta?” Magacoka makamũingata.​—Johana 9:34.

Jesu aigua ũrĩa gwathiĩ, agacaria mũndũ ũcio akamũũria: “Hihi ũrĩ na wĩtĩkio harĩ Mũrũ wa mũndũ?” Mũndũ ũcio akamũũria: “Mũthuri ũyũ, ũcio nũ hihi nĩguo ngĩe na wĩtĩkio harĩ we?” Jesu akamwĩra ũũ cararũkũ: “Nĩ ũmuonete, na rĩrĩ, nĩwe ũyũ ũraria nake.”​—Johana 9:​35-37.

Mũndũ ũcio akoiga: “Nĩ ndamwĩtĩkia, Mwathani.” Agacoka akainamĩrĩra mbere ya Jesu kuonania wĩtĩkio na gĩtĩo harĩ we, nake Jesu akoiga: “Niĩ ndokire gũkũ thĩ nĩ ũndũ wa ituĩro rĩrĩ, atĩ arĩa matonaga mone nao arĩa monaga matuĩke itumumu.”​—Johana 9:​38, 39.

Afarisai o nao marĩ hau, na moĩ atĩ o ti atumumu. Ĩ ũhoro-inĩ wĩgiĩ wĩra ũrĩa mehete wa gũtongoria andũ kĩĩroho? Makoria ũũ makĩenda gwĩtetera: “Kaĩ o na ithuĩ tũrĩ atumumu?” Jesu akameera: “Korũo mũrĩ atumumu-rĩ, mũtingĩrĩ na mehia. No rĩu tondũ mũroiga, ‘Nĩ tuonaga,’ mũrĩ o na mehia.” (Johana 9:​40, 41) Korũo ti arutani thĩinĩ wa Isiraeli, matingĩronwo mahĩtĩtie mũno nĩ ũndũ wa kũrega Jesu arĩ we Mesia. No tondũ nĩ moĩ Watho, kũrega Jesu nĩ mehia manene mũno.