Bafalese kabavua bitaba ne: Yezu uvua mua kutabeja muntu uvua muledibue mpofu to, nunku badi babikidisha baledi bende. Baledi mbamanye ne: badi kumpala kua nsombelu udi mua ‘kubipatshisha mu nsunagoga.’ (Yone 9:22) Dikosa diabu dia malanda ne bena Yuda bakuabu divua mua kubapetesha bipeta bibi bua malu a mu nsombelu ne a mpetu mu dîku.

Bafalese badi babela nkonko ibidi eyi: “Eu mmuanenu unudi nuamba muvuaye muledibue mpofu anyi? Kadi mmunyi mukadiye umona mpindieu?” Baledi bende badi bandamuna ne: “Tudi bamanye ne: eu mmuanetu, kabidi ne: uvua muledibue mpofu. Kadi mukadiye mpindieu umona, katuena bamanye to; nansha muntu uvua mumutabeje mêsu, katuena bamumanye to.” Nansha muvua muanabu mubambile tshivua tshienzeke, badi bandamuna ne budimu bamba ne: “Mukonkayi. Ukadi muntu mukole. Udi ne bua kudiakuila.”​—Yone 9:19-21.

Nunku Bafalese badi babikidisha kabidi muntu eu ne bamukanyina bamba mukadibu ne bijadiki bidi bipisha Yezu. Badi bamuambila ne: “Tumbisha Nzambi; tudi bamanye ne: muntu eu mmuenji wa mpekatu.” Muntu eu udi ubenga bidibu bamba, wamba ne: “Yeye ni mmuenji wa mpekatu, tshiena mumanye. Bualu bumue bundi mumanye budi ne: mvua mpofu, kadi mpindieu ndi mmona.”​—Yone 9:24, 25.

Bu muvua Bafalese kabayi basue kuimanyina apu, bakatungunuka bebeja ne: “Ntshinyi tshivuaye mukuenzele? Mmushindu kayi uvuaye mutabeje mêsu ebe?” Muntu eu udi ubandamuna ne dikima wamba ne: “Nkavua munuambile bualu ebu, kadi kanuvua bateleje to. Bua tshinyi nudi basue kubumvua kabidi? Kanuena basue penu kulua bayidi bende to, ki mmuomu?” Bafalese badi bafiika munda bamuambila ne: “Wewe udi muyidi wa muntu au, kadi tuetu tudi bayidi ba Mose. Tudi bamanye ne: Nzambi wakakula ne Mose, kadi bua muntu eu, katuena bamanye kudiye mufume to.”​—Yone 9:26-29.

Mulombi wa ka pa luse eu udi ukema wamba ne: “Bualu ebu budi bukemesha bikole, bua munudi kanuyi bamanye kudiye mufume, kadi pende uvua muntabeje mêsu.” Pashishe muntu eu wakabambila bualu bua meji bua bantu badi Nzambi uteleja ne wanyisha wamba ne: “Tudi bamanye ne: Nzambi kena uteleja benji ba mpekatu to, kadi muntu yeye utshina Nzambi ne wenza disua diende, yeye udi uteleja muntu eu. Katshia ku kale katutu banji kumvua ne: muntu kampanda uvua mutabeje mêsu a muntu mulela mpofu to.” Bualu ebu buakamufikisha ku diamba ne: “Bu muntu eu kayi mufume kudi Nzambi, kavua mua kuenza bualu nansha bumue to.”​—Yone 9:30-33.

Bu muvua Bafalese bapange tshia kuamba mu bualu bua mulombi wa ka pa luse eu, badi bamukanyina bamba ne: “Wewe yonso mujima uvua mulela mu mpekatu, kadi ukadi utulongesha?” Nunku bakamukupa pambelu.​—Yone 9:34.

Pakumvua Yezu tshivua tshienzeke, wakatuilangana ne muntu au ne kumukonka ne: “Udi witabuja Muana wa muntu anyi?” Muntu uvua muondopibue eu udi wandamuna ne: “Nnganyi au, mukalenge, bua mmuitabuje?” Yezu wakamuambila patoke ne: “Udi mumumone, mu bulelela, nyeye udi wakula nebe eu.”​—Yone 9:35-37.

Muntu eu udi wandamuna ne: “Ndi mmuitabuja, Mukalenge.” Bua kuleja muvuaye ne ditabuja ne kanemu, wakatua mpala panshi kumpala kua Yezu, ke Yezu kumuambila bualu bua mushinga ebu ne: “Ndi mulue pa buloba ebu bua dilumbuluisha edi: bua bantu badi kabayi bamona bamone, ne bantu badi bamona balue bampofu.”​—Yone 9:38, 39.

Bafalese bavua muaba au misangu yonso, bavua bamanye ne: ki mbampofu to. Kadi netuambe tshinyi bua muvuabu badiamba mudibu balombodi ba mu nyuma? Ndekelu wa bionso badi bebeja ne: “Tuetu petu katuena bampofu to, ki mmuomu?” Yezu udi wamba ne: “Bu nuenu bikale bampofu, kanuvua mua kuikala ne mpekatu to. Kadi mpindieu nudi nuamba ne: ‘Tudi tumona.’ Mpekatu wenu udi ushala.” (Yone 9:40, 41) Bu muvuabu balongeshi mu Isalele, dibenga diabu dia Yezu bu Masiya kadivua diumvuika to. Kadi bu muvuabu bamanye mikenji, dimubenga diabu divua mpekatu munene.