VaFarisi avatendi kuti Jesu warapa mwanarume wakabahwa ari bofu, ngo kudaro vanodanija vabari vake. Vabari vake vanozviziva kuti vangagogomehwa kana ‘kumbhirimbijwa mu sinagoga.’ (Johani 9:22) Kutama kushamwarijana no vaJudha vamweni kwaizova no muviyo jakashata ngo kudivi ro mare no ro mbhuri.

VaFarisi vanoita mubvunjo muviri iji: “Nga uu mwana wenyu, wo munoti wakabahwa ari bofu? Wari anovonesa kudini?” Vabari vake vanopingura kudari: “Tinoziva kuti uu mwana wedu, nokutibze wakabahwa ari bofu. Kaveta atibzizivi ngo maitiro aanovona wari; atimuzivivo ndiani wamufunungura majiso.” Pikija kuti mwana wavo wakavabvunja zvakaitika, ivona vanogwarira pazvovanoda kudavira zve vanoti: “Bvunjisanyi yena. Waa dombo: anonanga ega.”—Johani 9:19-21.

Ngokudaro, vaFarisi vanomudanijazve, vomuthyisijira vecinanga kuti pano zvakashata zvovanoziva ngo pamusoro pa Jesu. Ivona vanoti: “Reremejai Mwari. Itisu tinoziva kuti mundhu uwo muxaixi.” Ecikanija zvovanomupumbharo, mwanarume waingaya bofu anoti: “Kudari yena ari muxaixi, andibzizivi.” Zve anoti: “Ndinoziva ciro cimwe basi: kuti inini ndainga bofu, bzino ndovona.”—Johani 9:24, 25.

VaFarisi avadakari ngo mupinguro wake, ngo kudaro vanoti: “Wakakuitira cinyi? Wakafunungurisa kudini majiso ako?” Ngo kucunga, mwanarumwe uu anoti: “Ndapera kumubvunja, amuzivi kundipurukira! Munoda ngenyi kubzizwabze? . . . Munoda kuita vajiji vake here?” Ngo kunyangajwa, vaFarisi vanoti: “Iwewe ndiwe mujiji wake! Itisu tiri vajiji va Mosi. Tinoziva kuti Mwari wakavereketa na Mosi; kaveta uu atimuzivi kwaakabva.”—Johani 9:26-29.

Mupembhi anokahamajwa ndizvona, woti: “Ndibzona bzondhobzo bzinoxamaisa kuti imwimwi amumuzivi kwaakabva; kaveta yena wakafunungura majiso angu.” Mwanarume uu anosanangura zvakajeka kuti Mwari anozwa no kutendera vandhu vo mushovonyi, eciti: “Tinoziva kuti Mwari aapurukiri vaxaixi, kaveta anopurukira uwo anomuthya no kuita kuda kwake. Kubvira maruriro o nyika, akuto kukazika kuti mundhu ariwese wakafunungura majiso o mundhu wakabahwa ari bofu.” Izvo zvinoendesa pa mbhejiso yokuti: “Kudari mundhu uu naacaibvepi ka Mwari, apana caaizoita.”—Johani 9:30-33.

Ngo kukonehwa kukanija zvinonangari mupembhi, vaFarisi vanomutuka vaciti: “Iwewe wakabahwa . . . mu uxaixi, unoda kuita mujijisi wedu?” Zve vomugogomera.—Johani 9:34.

Jesu paanozwa zvakaitika, anopsaka mwanarume odhowo, womubvujisa kuti: “Unotenda Mwana wa Mwari?” Mwanarumewo anodavira kudari: “Ndiani yena, Tenji, kuti ndimutende?” Jesu aamusiyi no kukana-kana, ngo kunanga kudari: “Uri kumuvona: ndiyena wondhowo anovereketa na iwewe.”—Johani 9:35-37.

Mwanarumewo anopingura eciti: “Ndinotenda Tenji.” Ecitatija rutendo no nderemenjo, mwanarume uu anogwadamira Jesu, uwo anomubvunja masoko akajika, okuti: “Ndakaza mu nyika muno kuzotonga ndecikheta, kuti mapofu avone, no kuti vanovona vaite mapofu.”—Johani 9:38, 39.

VaFarisi ava, vanoziva kuti avaripi mapofu. Asi tingati kudini ngo basa rovanozvipekeja wari ro kuva vajijisi vo zvokumujimu? Kuti vazvibvikirire vanoti: “Na itisuvo tiri mapofu kani?” Jesu anoti: “Kudari nomwainga mapofu, amucaizova no uxaixi, kaveta waro munoti: ‘Tinovona’, ngokudaro uxaixi hwenyu mucinahwo.” (Johani 9:40,41) Kudari novacaingepi vajijisi vo muIsraeri, kuramba kwavo Jesu inga Mesiya kwaizozwisisika. Asi zvicivoneka kuti vanoziva Mutemo, kurambha kwavo Jesu i cishaishi cikuru.