Фарисейтӕ нӕ баууӕндыдысты, куырм чи уыд, уыцы лӕджы Йесо кӕй сдзӕбӕх кодта, ууыл. Ӕмӕ йын йӕ ныййарджытӕм фӕдзырдтой. Ныййарджытӕ зыдтой, ӕмӕ сӕм дины разамонджыты зӕрдӕ истӕмӕй куы фехсайдтаид, уӕд сӕ «ӕмбырдгӕнӕнӕй ратардтаиккой» (Иоанны 9:22). Ӕмӕ уыцы бинонты ӕмбырдгӕнӕнӕй куы ратардтаиккой, уӕд уыдаиккой хъодыгонд ӕмӕ сын цардамӕлттӕ кӕнын дӕр тынг фӕзын уыдаид.

Фарисейтӕ сӕм радтой дыууӕ фарстайы: «Ай уын, куырмӕй райгуырди, зӕгъгӕ, кӕмӕй зӕгъут, уыцы фырт у? Ӕмӕ уӕд ныр куыд уыны?» Ныййарджытӕ сын дзуапп радтой: «Нӕ фырт кӕй у ӕмӕ куырмӕй кӕй райгуырд, уый зонӕм. Фӕлӕ ныр куыд уыны ӕмӕ йӕ цӕстӕй чи ракӕсын кодта, уымӕн ницы зонӕм». Чи зоны сын сӕ фырт радзырдта, цы йыл ӕрцыд, уый, фӕлӕ уӕддӕр уӕлдай исты зӕгъынӕй тарстысты. Уымӕ гӕсгӕ фарисейтӕн загътой: «Йӕхи йын бафӕрсут. Сывӕллон нал у. Йӕхӕдӕг зӕгъӕд йӕхи тыххӕй» (Иоанны 9:19–21).

Уыйадыл фарисейтӕ, куырм чи уыд, уыцы лӕгмӕ ногӕй фӕдзырдтой ӕмӕ йӕ тӕрсын кӕнын райдыдтой, зӕгъгӕ, Йесойы ныхмӕ бӕлвырдгӕнӕнтӕ ссардтам. Бауырдыг ӕм сты: «Хуыцауы скадджын кӕн – зӕгъ, ӕцӕг куыд у, уый. Мах ӕй зонӕм, уыцы адӕймаг тӕригъӕдджын кӕй у». Фӕлӕ уый семӕ не сразы. Загъта сын: «Тӕригъӕдджын у ӕви нӕ, уымӕн ӕз ницы зонын». Ӕмӕ стӕй йӕ ныхасмӕ бафтыдта: «Уый зонын, ӕмӕ куырм уыдтӕн, ныр та цӕстӕй уынын» (Иоанны 9:24, 25).

Фӕлӕ фарисейтӕ ууыл не ’рлӕууыдысты. Бафарстой та йӕ: «Цы дын сарӕзта? Цӕстӕй дӕ куыд ракӕсын кодта?» Уӕд лӕг фӕныфсджындӕр ӕмӕ сын дзуапп радта: «Радзырдтон уын ӕй, фӕлӕ мӕм сымах нӕ хъуыстат. Ӕмӕ ма мын ӕй ногӕй цӕмӕн дзурын кӕнут? Ӕви сымах дӕр уый фӕнды, ӕмӕ йӕ ахуыргӕнинӕгтӕ суат?» Уыцы ныхӕстӕм фарисейтӕн сӕ маст рафыхт ӕмӕ йын йӕхи фӕаххосджын кодтой: «Уый ды дӕ йӕ ахуыргӕнинаг, мах та Моисейы ахуыргӕнинӕгтӕ стӕм. Мах ӕй зонӕм, Моисеимӕ Хуыцау кӕй ныхас кодта, фӕлӕ ацы адӕймаг та кӕцӕй у, уымӕн ницы зонӕм» (Иоанны 9:26–29).

Мӕгуыргуры дисӕн кӕрон нал уыди, ӕмӕ сын загъта: «Диссаг дӕр уый у, ӕмӕ, кӕцӕй у, уый кӕй нӕ зонут, афтӕмӕй та мӕн цӕстӕй ракӕсын кодта». Ӕмӕ, Хуыцау кӕмӕ хъусы ӕмӕ райгонд кӕмӕй у, уымӕн сын фидар бӕлвырдгӕнӕн ӕрхаста: «Мах ӕй зонӕм, Хуыцау тӕригъӕдджынтӕм кӕй нӕ хъусы, фӕлӕ дзы чи тӕрсы ӕмӕ йын йӕ фӕндон чи ӕххӕст кӕны, уыдонмӕ кӕй хъусы. Рагзамантӕй фӕстӕмӕ ахӕм хабар никуы ничи фехъуыста, ӕмӕ, куырмӕй чи райгуырд, ахӕм адӕймаджы исчи цӕстӕй ракӕсын кӕна». Ӕмӕ фӕстагмӕ загъта: «Уыцы адӕймаг Хуыцауӕй куы нӕ уаид, уӕд йӕ бон ӕппындӕр ницы уаид аразын» (Иоанны 9:30–33).

Ахӕм бӕлвырдгӕнӕны ныхмӕ фарисейтӕн сӕ бон ницыуал уыд зӕгъын, ӕмӕ йын фидистӕ кӕнынмӕ фесты: «Ды сӕрӕй-къӕхтӕм тӕригъӕдджынӕй куы райгуырдтӕ, уӕд мах ахуыр кӕныс?» Ӕмӕ йӕ ӕмбырдгӕнӕнӕй ратардтой (Иоанны 9:34).

Хабар Йесо куы фехъуыста, уӕд, кӕй сдзӕбӕх кодта, уыцы лӕджы ссардта ӕмӕ йӕ бафарста: «Адӕймаджы Фыртыл ӕууӕндыс?» Уый йын дзуапп радта: «Мӕ буц хицау, ӕмӕ чи у? Зӕгъ мын ӕй, цӕмӕй йыл баууӕндон». Ӕмӕ йын уӕд Йесо фидарӕй загъта: «Уынгӕ дӕр ӕй фӕкодтай, ӕмӕ демӕ ныхас дӕр уый кӕны» (Иоанны 9:35–37).

Уыцы лӕг уайтагъд дзуапп радта: «Ӕууӕндын ыл, Хицау». Уый фӕстӕ Йесойы раз йӕ зонгуытыл ӕрхауд, ӕмӕ афтӕмӕй равдыста, кӕй йыл ӕууӕнды ӕмӕ йӕ кӕй нымайы. Ӕмӕ уӕд Йесо загъта тыхджын ныхӕстӕ: «Ӕз ацы дунемӕ уый тыххӕй ӕрцыдтӕн, цӕмӕй адӕмӕн тӕрхон кӕнынӕн бындур уа: цӕмӕй куырмытӕ цӕстӕй уыной, чи уыны, уыдон та бакуырм уой» (Иоанны 9:38, 39).

Фарисейтӕй уым чи уыд, уыдонӕн сӕ зӕрдӕ сӕхимӕ куырмӕй не ’хсайдта. Фӕлӕ цы зӕгъӕн ис, Хуыцауы Ныхас адӕмӕн амоныны бар сӕхимӕ кӕй райстой, уый тыххӕй та? Сӕхи рӕстытӕгӕнӕгау Йесойы бафарстой: «Ӕмӕ мах дӕр куырмытӕ стӕм?» Йесо сын загъта: «Куырм куы уаиккат, уӕд уыл тӕригъӕд нӕ уаид. Фӕлӕ сымах зӕгъут, уынӕм, зӕгъгӕ. Ӕмӕ уымӕ гӕсгӕ уӕ тӕригъӕд ис уӕ уӕлӕ» (Иоанны 9:40, 41). Израилы адӕмы зондамонджытӕ куы нӕ уыдаиккой, уӕд ма бамбарӕн уыдаид, Йесо Мессийӕ кӕй у, ууыл кӕй не ’ууӕндыдысты, уый. Фӕлӕ Закъон хорз зон, ӕмӕ йыл афтӕмӕй ма баууӕнд, уый стыр тӕригъӕд куыннӕ у!