Fu di den Fariseiman no wani bribi taki Yesus dresi a breni man, meki den e seni kari a papa nanga mama fu en. A papa nanga mama sabi taki den Fariseiman o man ’yagi den puru na ini a snoga’ (Yohanes 9:22). Efu den Fariseiman du disi nanga den, dan dati kan tyari bigi problema kon gi a famiri. Tra Dyu no ben o moksi nanga den moro èn den ben o pina.

Den Fariseiman e aksi den: „A man disi na un manpikin? A tru taki a ben breni di a gebore? Dan fa a du kon taki a man si now?” A papa nanga mama e piki: „Wi sabi taki disi na wi manpikin èn taki a ben breni di a gebore. Ma wi no sabi fa a du kon taki a man si now, noso fa en ai kon opo.” Awansi a man taigi en papa nanga mama san ben pasa, toku den e luku bun san den e piki den Fariseiman. Den e taki: „Na en un musu aksi. A owru nofo kaba. Meki ensrefi taki.”​—Yohanes 9:19-21.

Dati meki den Fariseiman e seni kari a man baka èn den e pruberi fu tapu skreki gi en. Den e taigi en taki den abi buweisi taki Yesus a no wan man fu Gado. Den e taki: „Na fesi Gado yu musu taki san tru. Wi sabi taki a man disi na wan sondari.” A man no e agri nanga den sani di den e taigi en. Fu dati ede a e taki: „Mi no sabi efu en na wan sondari.” Ma a e taki tu: „Wán sani mi sabi, na taki mi ben breni fosi, ma now mi e si.”​—Yohanes 9:24, 25.

Ma den Fariseiman no wani libi a tori so. Den e aksi a man: „San a du nanga yu? San a du fu meki yu si?” A man e teki pikinso deki-ati èn a e piki: „Mi taigi unu kaba, ma toku unu no wani arki. Fu san ede unu wani yere a sani disi baka? Unu wani tron disipel fu en tu?” Nanga bigi atibron den Fariseiman e taigi en: „Yu na wan disipel fu a man disi, ma wi na disipel fu Moses. Wi sabi taki Gado taki nanga Moses, ma wi no sabi fu pe a man disi komopo.”​—Yohanes 9:26-29.

A man e fruwondru fu a sani di den Fariseiman taigi en. Dati meki a e taki: „Mi no man bribi taki unu no sabi fu pe a komopo, ma toku a meki mi si.” Dan a man e taki wan sani di e sori krin suma Gado e arki èn suma a feni bun. A e taki: „Wi sabi taki Gado no e arki sondari, ma efu wan sma abi bigi lespeki gi Gado èn a e du a wani fu en, dan Gado o arki a sma disi. Sensi owruten noiti unu no yere taki wan sma opo den ai fu wan sma di ben breni di a gebore.” Te fu kaba a man e taki fa a e si a tori: „Efu a man disi no ben komopo fu Gado, dan a no ben o man du notinoti.”​—Yohanes 9:30-33.

Fu di den Fariseiman no man taki noti, meki den e kosi a man. Den e taigi en: „Sensi yu gebore yu lai sondu, ma toku yu wani gi wi leri?” Ne den trowe a man go na dorosei.​—Yohanes 9:34.

Te Yesus yere san pasa, a e go suku a man, dan a e aksi en: „Yu e bribi na ini a Manpikin fu libisma?” A man e piki en: „Masra, taigi mi suma na dati, dan mi o bribi na ini en.” Yesus e taigi en krin: „Yu si en kaba. Na en e taki nanga yu now.”​—Yohanes 9:35-37.

A man e piki: „Mi e bribi na ini en, Masra.” Fu di a man e bribi na ini Yesus èn fu di a abi lespeki gi en, meki a e boigi na fesi Yesus. Dan Yesus e taki wan tumusi prenspari sani: „Mi kon na a grontapu disi so taki Gado kan krutu grontapu. Den sma di no e si, o si, èn den sma di e si, o kon breni.”​—Yohanes 9:38, 39.

Den Fariseiman di de drape sabi taki den no breni. Ma fa a de nanga a frantwortu di den feni taki den abi fu leri sma den tru tori fu Gado? Fu di den e firi wan fasi meki den e aksi: „Yu denki taki wi breni tu?” Yesus e taki: „Efu unu ben breni, unu no ben o abi sondu. Ma now unu e taki: ’Wi e si.’ Dati meki den sondu fu unu e tan” (Yohanes 9:40, 41). Efu den man disi no ben de leriman na ini Israel, dan a no ben o de so wan bigi ogri taki den weigri fu bribi taki Yesus na a Mesias. Ma fu di den sabi a Wet, meki a sani di den e du na wan seryusu sondu.