AFarisi khiyeemererya wira Yesu taatthukunle maitho a mulopwana ole aayariwe ohoonaka. Vano, yaahiwiitthana anamuyari awe. Nto anamuyari awe yaaniwoova makhulupale a aYuda okhala wira ole aamwaamini Yesu ‘anomoliwa mmulokoni mwaya’. (Yohani 9:22) Mutthu yoole oomoliwa oSinagoga, kheemereriwa omweetta nakoso ni aYuda, nnakhala othukumana ni awo.

AFarisi yaahaakoha anamuyari ale wira: “Ola mwan’inyú, yowo onimuhimyanyu wira oyariwé ohònene? Vano-nto opajenrye sai wona?” Awo yaakhunle wira: “Hiyo nosuwela wira ola mwan’ihu, ni wira oyariwé ohònene. Mavonelo awe khaninsuwela; hatá onvonihale, khannimusuwela”. Nnaamwi mwanaya aahimmye ele yiiraneyale, anamuyari ale yaahipasoopa waakhula waya ariki: “Mmukoheke mwanene yowo: owo mulwene, onniwerya olavula mmansawe”.​—Yohani 9:19-21.

Nto aFarisi ale yaahimwiihana nasimola ole, khumoopopiha ahimyaka wira Yesu khahiyo mutthu a Muluku. Nto yaahimuleela wira: “Onvuwihe Muluku! Hiyo nosuwela wira mulopwan’owo natampí”. Aavaanyihaka, aahaakhula wira: “Àri natampi, miyo nkinsuwela. Kinsuwelaka, etthu emosa pahi: khalai nkona, vano kinnona”.​—Yohani 9:24, 25.

AFarisi khiyaaphavela ohiya mwaha ole, nto yaahivikaniha omukoha wira: “Owo owirinhe exeni? Otthukunle sai maitho awo?” Moolipa murima aahiwaakhula oriki: “Miyo kiholèlani omosá, nyuwo muhiwiriyana. Mumphavelela-ni-tho wiwa? Khino nyuwo-tho muntthuna okhala awixutti awe?” Ananariwe ene, aFarisi ale yaahimwaakhula wira: “Mwixutti awe ti weyo! Hiyo n’awixutti a Moise. Hiyo nosuwela wira Muluku ahimulavuliha Moise. Van’owo khanisuwenle onkhumawe-wo”.​—Yohani 9:26-29.

Otikinihiwe ene nasimola ole, aahimmye wira: “Vantikiniha ti vavo: nyuwo khamusuwenle onkhumawe-wo, nto yowo t’okitthukunle maitho”. Vano mulopwana ole aahitthokiherya wira Muluku onniwiiwa atthu oniweemererya awe, oriki: “Hiyo nosuwela wira Muluku khaniwiwa anatampi. Muluku oniwiwa ale animuttittimiha, enettela sintthunawe. Okhuma vapajenryaya olumwenku, khinnaiwe wira mutthu otoko omutthukula maitho mulipa-òyariwa ohònene”. Eyo yaahaakhaliherya atthu woona wira “owo ahakhanle mutthu a Muluku, khawerya wir’etthu”.​—Yohani 9:30-33.

Ahiweryaka okhootta masu a nasimola ole, aFarisi yaahihimya wira: “Weyo oyariwe osareiyene itampi, vano omphavela onixuttiha?” Vano yaahimoomolela ota.​—Yohani 9:34.

Nuumala Yesu wiiwa etthu yiiraneyale, owo aahikumana ni mulopwana ole khumukoha wira: “Nyuwo munnimwamini Mwana a mutthu?” Mulopwana ole aahimwaakhula wira: “Pwiya, t’ani uwo, wira kimwaminiki?” Vano Yesu aahimwaakhula wira: “Nyuwo momona: ola onlavula ni nyuwo, ti yowo”.—Yohani 9:35-37.

Mulopwana ole aahaakhula wira: “Apwiya, kihamini!” Ooniheryaka waamini ni nttittimiho, mulopwana ole aahikokhora ohoolo wa Yesu. Vano Yesu aahihimya wira: “Miyo kirwiye olumwenk’ula wira kilamule: alipa-òhòna yoneke, vano ale anòna ekhale alipa-òhòna”.​—Yohani 9:38, 39.

AFarisi yaawiriyana moolumo ale, yaahisuwela wira yaanoona. Masi, ankhi muteko aya ntoko alipa-oowiixuttiha ikano? Awo yaahimukoha wira: “Khino ni hiyo-tho n’àlipa-òhona?” Yesu aahiwaakhula wira: “Mwàri alipa-òhona, khamwakhalana itampi. Vano, okhala wira munihimya wira: ‘Hiyo ninnona’, etampi anyu khimmala”. (Yohani 9:40, 41) Okhala wira yaanisuwela Nlamulo ni yaari alipa-oowiixuttiha ikano wIsarayeli, waari woohikhalela omukhootta Yesu okhala Mesiya. Nto eyo yaari etampi yuulupale.