Diri makarawat han mga Pariseo nga natambal ni Jesus an lalaki nga natawo nga buta, salit ira iginpatawag an iya mga kag-anak. Maaram an mga kag-anak nga posible hira ‘paiwason ha sinagoga.’ (Juan 9:22) Ito nga pagdiri nga makig-upod ha iba nga Judio mahimo magresulta hin duro nga pagkontra han publiko ngan kakurian ha pinansyal han ira pamilya.

An mga Pariseo nagpakiana: “Ini ba an iyo anak nga ginsisiring niyo nga natawo nga buta? Kay ano man nga nakakakita na hiya yana?” An mga kag-anak binaton: “Maaram kami nga hiya an amon anak ngan natawo hiya nga buta. Pero diri kami maaram kon paonan-o hiya nakakita, ngan diri liwat kami maaram kon hin-o an nagpukrat han iya mga mata.” Bisan kon ginsumatan hira han ira anak han nahitabo, naghirot hira ha pagbaton ngan nagsiring: “Hiya an pakianhi niyo. Daku na hiya. Hiya an magsusumat ha iyo.”—Juan 9:19-21.

Salit, iginpatawag utro han mga Pariseo an lalaki ngan gintarhog hiya pinaagi ha pagsiring nga may-ada hira ebidensya kontra kan Jesus. Hira nagsiring: “Himayaa an Dios; maaram kami nga ito nga tawo makasasala.” Pero ginbalewaray han lalaki an ira akusasyon, lugod hiya nagsiring: “Kon makasasala man hiya, diri ako maaram.” Hiya nagdugang: “Pero maaram gud ako nga bisan kon buta ako hadto, yana nakakakita na ako.”—Juan 9:24, 25.

Tungod kay nadiri an mga Pariseo nga ha sugad hito matapos an pag-istorya, hira nagpadayon: “Ano an iya ginbuhat ha imo? Paonan-o niya ginpukrat an imo mga mata?” Waray kahadlok nga binaton an lalaki: “Ginsumatan ko na kamo, pero waray kamo pamati. Kay ano nga karuyag niyo mabatian ito utro? Diri niyo karuyag nga magin mga disipulo niya, diri ba?” Nasina hito an mga Pariseo, salit hira nag-akusar: “Disipulo ka hito nga tawo, pero kami mga disipulo ni Moises. Maaram kami nga an Dios nakiistorya kan Moises; pero mahitungod hito nga tawo, diri kami maaram kon diin hiya tikang.”—Juan 9:26-29.

Nahipausa hito an makililimos ngan nagsiring: “Urusahon gud nga diri kamo maaram kon diin tikang hiya nga nagpukrat han akon mga mata.” Katapos, naghatag hiya hin lohikal nga argumento kon hin-o an ginpapamatian ngan gin-uuyonan han Dios: “Maaram kita nga an Dios diri namamati ha magpakasasala, pero namamati hiya ha bisan hin-o nga may kahadlok ha Dios ngan nagbubuhat han iya kaburut-on. Tikang hadto waray pa gud hinbatian nga nagpukrat han mga mata hin natawo nga buta.” Ini an iya nagin konklusyon: “Kon ini nga tawo diri tikang ha Dios, diri hiya makakahimo hin bisan ano.”—Juan 9:30-33.

Tungod kay waray mabaton han mga Pariseo an pangatadongan han makililimos, gin-insulto nira hiya: “Natawo ka nga makasasala, kay ano nga gintututdoan mo kami?” Ginpaiwas nira hiya.—Juan 9:34.

Han hinbatian ni Jesus an nahitabo, iya ginbiling an lalaki ngan ginpakianhan: “Natoo ka ba ha Anak han tawo?” An natambal nga lalaki binaton: “Hin-o hiya, ginoo, basi tumoo ako ha iya?” Hi Jesus prangka nga nagsiring: “Nakita mo na hiya, ha pagkamatuod an imo kaistorya yana amo hiya.”—Juan 9:35-37.

An lalaki binaton: “Natoo gud ako ha iya, Ginoo.” Basi ipakita an iya pagtoo ngan pagtahod, yinukbo hiya kan Jesus nga nagpahayag hin importante nga mga pulong: “Kinanhi ako ha kalibotan tungod hini nga paghukom: basi makakita an diri nakakakita ngan mabuta an mga nakakakita.”—Juan 9:38, 39.

An mga Pariseo nga nahituman nga nakadto maaram nga diri hira mga buta. Pero kumusta man an ginhuhunahuna nira nga ira papel sugad nga espirituwal nga mga paragiya? Hira nangatadongan: “Naghuhunahuna ka ba nga mga buta liwat kami?” Hi Jesus nagsiring: “Kon buta kamo, waray unta kamo sala. Pero yana nasiring kamo, ‘Nakakakita kami.’ Nakakasala pa gihapon kamo.” (Juan 9:40, 41) Kon diri hira mga magturutdo ha Israel, puydi pa unta masabtan an ira pagsalikway kan Jesus sugad nga Mesias. Pero tungod kay maaram hira han Balaud, seryoso nga sala an ira pagsalikway ha iya.