Jerusalenan apaskäna uka Tabernáculo Fiestanjja, Jesusajj cheqa yatichäwinak yatichaskakïnwa. Ukankapkäna uka yaqhep judionakajja, “nanakajj Abrahanan wawanakapäpjjtwa, janipuniw kunapachas khitin esclavoparus tukupkti” sasaw Jesusarojj sapjjäna. Jupajj sarakïnwa: “Nayajj yattwa jumanakajj Abrahanan wawanakapäpjjtawa, ukampis jiwayañatakiw nayar thaqapjjestajja, janirakiw yatichäwinakajar iyawsapktati. Kunanaktï nayajj Awkijampïkasin uñjkayäta ukanakwa parltjja, jumanakajj kunanaktï awkimat istʼapkta ukanakwa lurapjjaraktajja” sasa (Juan 8:33, 37, 38).

Jesusasa judionakasa janiw mä pachpa awkinïpkänti, ukwa Jesusajj saskäna. Judionakajj janiw uk amuyapkänti, ukatwa mayamp akham sapjjäna: “Nanakan awkijajj Abrahanawa” sasa (Juan 8:39; Isaías 41:8). Jupanakajja, Diosan amigopat uñtʼatäki uka Abrahanat jutir wawanakäpjjänwa, ukatwa Abrahanjamas Diosar confiyapkaspa ukham amuyasipjjäna.

Jesusasti sarakïnwa: “Jumanakatï Abrahanan wawanakapäpjjasma ukhajja, kunanaktï Abrahanajj lurkäna ukanakwa lurapjjasma” sasa. Cheqansa mä wawajj awkipatwa yateqasi. Jesusajj saskakïnwa: “Nayajj kuntï Diosat istʼkta ukjja cheqwa parlapjjsma, ukhampachas jichhajj jiwayañatakiw thaqapjjestajja. Abrahanajj janiw uk lurkänti. Kunanaktï awkimajj lurki ukanakwa jumanakajj lurapjjtajja” sasa (Juan 8:39-41).

Judionakajj janiw uk amuyapkänti. Ukatwa sapjjäna: “Nanakajj janiw qʼañu juchat nasirïpkti, mä sapa awkinikïpjjtwa, ukajj Diosawa” sasa. ¿Cheqpachapunit awkipajj Diosäna? Jesusajj sänwa: “Diosatï jumanakan Awkimäspajja, jumanakajj nayar munasipjjetasmawa, nayajj Diosatwa jutta, akankaskarakta. Janiw nayajj amtajat jutkti, jan ukasti jupaw nayar khitanitu” sasa. Ukjjarojj mä jisktʼaruw akham sas qhanañchäna: “¿Kunatsa jumanakajj kuntï nayajj parlkta uk jan amuyapkta? Jumanakajj janiw arunakaj istʼañ munapktati” sasa (Juan 8:41-43).

Jesusajj jupar jan creyipjjatapat kuna jan walinakansa uñjasipjjaspa ukwa judionakar amuytʼayañ munäna. Qhana arunakampiw säna: “Jumanakan awkimajj Diablowa, jupat jutirïpjjtawa, kunanaktï uka awkimajj munki ukwa lurañ munapjjaraktajja” sasa. ¿Kunjamänas awkipajja? Jesusajj sänwa: “Jupajj qalltkäna ukhajj jiwayirïnwa, kunatï cheqäki ukatjja saranukünwa” sasa. Ukatjja saskakïnwa: “Khititï Diosat jutki ukajj Diosan arunakap istʼiwa. Jumanakajj janiw Diosat jutirïpktati, ukatwa jan istʼapktati” sasa (Juan 8:44, 47).

Jesusar istʼasajj judionakajj colerasipjjänwa, akham sapjjarakïnwa: “‘Jumajj samaritanötawa, demonionïtawa’ sasajj ¿janit nanakajj cheq parlapktjja?” sasa. “Samaritanötawa” sasinjja Jesusarojj jiskʼachapjjänwa, ukampis janiw uk yäqkänti. Antisas akham sakïnwa: “Janiw nayajj demonionïkti, jan ukasti Awkijaruw jachʼañchaskta, ukampis jumanakajj nayar jiskʼachapjjestawa” sasa. Arunakapar istʼañajj kunja wakiskirïnsa uk amuyapjjañapatakejja, Jesusajj akham sänwa: “Khititï arunakajarjam sarnaqki ukajja, janipuniw jiwañ uñjkaniti” sasa. Ukham sasinjja, apostolonakasa discipulonakasa janiw jiwapkaniti sasin janiw sañ munkänti. Jan ukasti jupanakajj janiw wiñayatak jiwapkaniti, mä arunjja janiw ‘payïr jiwaña’ uñtʼapkaniti sañwa munaskäna, jupanakajj jaktayatäpjjañapänwa (Juan 8:48-51; Apocalipsis 21:8).

Ukampis judionakajj Jesusan arunakap maysaruw amuyapjjäna, ukatwa akham sapjjäna: “Jichhapï demonionïtam yatipjjtjja. Abrahanajj jiwjjewa, profetanakas ukhamaraki, ukampis ‘khititï arunakajarjam sarnaqki ukajja, janipuniw jiwkaniti’ sasaw jumajj parltajja. ¿Jiwatäjje uka  Abrahán awkisat sipansa jukʼamp jilïrïtati? [...], ¿khitït sarakta jumasti?” sasa (Juan 8:52, 53).

Jesusajj Mesiasätapwa uñachtʼayaskäna. Khitïnsa uk judionakar qhan sañat sipansa, Jesusajj sänwa: “Naya pachpatï jachʼañchasirista ukhajja, jachʼañchasitajajj janiw kunäkisa. Khitirutï jumanakajj Diosajaw sapkta uka Awkijaw nayarojj jachʼañchitu. Jumanakajj janiw jupar uñtʼapktati. Nayasti juparojj uñtʼtwa. Nayatejj janiw jupar uñtʼkti sirista ukhajja, jumanakjam kʼari jaqëristwa” sasa (Juan 8:54, 55).

Jesusajj mayampiw Diosat jan jitheqtir Abrahanat akham säna: “Jumanakan Abrahán awkimasti, nayan uruj uñjañ suykasajj wal kusisïna. Ukjja uñjänwa, kusisirakïnwa” sasa. Cheqansa Abrahanajj Mesiasaruw suyäna, Jehová Diosan arsutaparus confiyarakïnwa. Uk istʼasajj jan creyir judionakajj akham sapjjänwa: “Janïraw jumajj phesqa tunka maranïktasa, ¿ukatti jumajj Abrahanar uñjäta?” sasa. Jesusasti sarakïnwa: “Cheqpachapuniw sapjjsma, janïr Abrahanajj naskäna ukhaw nayajj utj-jjayäta” sasa. Jesusajj janïr aka oraqer jutkasa alajjpachan mä wali chʼamani angeljam jakatapatwa parlaskäna (Juan 8:56-58).

Judionakajja Jesusan arunakap istʼasajj wal colerasipjjäna, kʼupjañatakiw qalanak irtasipjjarakïna, Jesusasti jan kuna kamachtʼataw sarjjäna.