Yésu a ngi yii i Yérusalem inyu ngand Bilap (tole Mabadô), a nke ni bisu i niiga maliga ma niñ. I bon ba Lôk Yuda ba yé ha, ba ntip kal nye le: “Di yé mbôda i Abraham, di ma ba bé minkol mi mut nye ki nye.” Yésu a ntimhe bo le: “Me nyi le ni yé mbôda i Abraham, ndi ni yé i yéñ njel i nol me inyule ni neebe bé bibañga gwem. Me mpot i mam me bi tehe ngéda me bé ni Tata wem, ndi bé ni mboñ mam ni bi nok yak isoñ nan.”​—Yôhanes 8:33, 37, 38.

Mahoñol ma Yésu ma nlet bé i nok: Isañ a yé maselna ni isañ wap. Mu kiki ba nok bé i jam Yésu a nkal, ba nke ni bisu i kal le: “Abraham a yé isañ wés.” (Yôhanes 8:39; Yésaya 41:8) I pes minsôn ba yé ndaye yé. Ba nhoñol le ba gwé nlélém hémle kiki Abraham liwanda li Djob.

Ndi maselna ni hala, ndimbhe i Yésu i nhénd bo ñem, a nkal le: “Ibale ni bak bon ba Abraham, ki ni yé i boñ minson mi Abraham.” Ntiik, man a nkôna isañ. Yésu a nkal bo le: “Ndi nano ni nyéñ nol me.” A nkônde le: “Me nu me nkal bé maliga me bi nok yak Nyambe. Abraham a bi boñ bé hala.” I mbus Yésu a nkal bibañga bini bi nlet i nok: “Ni yé i boñ minson mi isoñ nan.”​—Yôhanes 8:39-41.

Lôk Yuda i nyi bé njee Yésu a yé pôdôl. Ba nkal le ba yé bañga bon, ba nkônde le: “Di ta bé bon ba ndéñg; di gwé ndik Isañ wada le Nyambe.” Baa Djob a yé toi Isañ wap? Yésu a nkal le: “Ibale Nyambe a bak Isoñ nan, ki ni ngwés me inyule me bi lôl yak Nyambe, ni njel yé ki nyen me yé hana. Me bi lo bé ni memede, ndi Nyen a bi ep me.” Yésu a mbat mbadga, a timbhe ki yo nyemede: “Inyuki ni nok bé i jam me yé i kal? Ndik inyule ni nla bé emble bañga yem.”​—Yôhanes 8:41-43.

Yésu a nyéñ unda bikuu ba nla kôhna ibale ba ntjél emble nye. Ndi nano a nkal i ntiik le: “Ni nlôl yak isoñ nan le Nsohop, ni nsômbôl ki yônôs ngôñ i isoñ nan.” Lelaa isañ wap a yé? Yésu a ntibil unda njee isañ wap a yé: “A bé mut manola ngéda a bi bôdôl, a bi téñbe bé to ikété maliga.” Yésu a ñunda le: “Nu a yé mut Nyambe a ñemble bibañga bi Nyambe. Inyu hala nyen ni ñemble bé inyule ni ta bé bôt ba Nyambe.”​—Yôhanes 8:44, 47.

Bibañga bini bi ñunbaha Lôk Yuda i ntimbhe le: “U ntehe ni bé le di mpot maliga ngéda di nkal le: ‘U yé mut Samaria, u gwé ki mbuu mbe’?” Kiki ba nsébél Yésu le “mut Samaria,” ba ñunda ipam limbe likala ba nyan nye. Ndi Yésu a mboñ wengoñle a nok bé bisol gwap, a ntimbhe le: “Me gwé bé mbuu mbe; me nti Tata lipém, ndi bé ni nti bé me lipém.” A mboñ mbônga u u ñunda mahee ma jam a yé kal, a nkal le: “Ibale mut a nôgôl bañga yem, a yé mbén i tehe nyemb.” A nsômbôl bé kal le baôma ni bôt bape ba ba noñ nye ba ga wo bé kel yada. Maselna ni hala, Yésu a nyéñ kal le ba ga tjiba bé mba ni mba, le ba ga yi bé “nyemb i nyônôs iba,” ntén nyemb u gwé bé botñem i bitugne.​—Yôhanes 8:48-51; Masoola 21:8.

Ndi Lôk Yuda i nyoñ bibañga bi Yésu buk i ngii buk, ba nkal le: “Nano ni nyen di nyi le u gwé toi mbuu mbe. Abraham a bi wo, yak bapôdôl, ndi we u nkal le: ‘Ibale mut a nôgôl bañga yem, a yé mbén i wo.’ Baa u nloo sôgôlsôgôl wés Abraham nu a bi wo? . . . We u nhoñol le u yé njee?”​—Yôhanes 8:52, 53.

Ni maliga, Yésu a yé toñle bo le a yé Mésia. Ndi iloole a timbhe mambadga map, Yésu a nkal le: “Ibale me nti memede lipém, lipém jem li yé yañga. Tata nyen a nti me lipém, nu ni nkal le a yé Nyambe nan. To hala, ni yé ngi yi nye, ndi me me nyi nye. Ibale me nkal le me nyi bé nye, ki m’a ba mut bitembee kiki bé.”​—Yôhanes 8:54, 55.

 Nano Yésu a ntiimba yoñ hihéga hi sôgôl wap, mut hémle: “Isoñ nan Abraham a bi kon maséé ngandak i bem le a tehe hilo hiem; a bi tehe ki hio, a kon maséé.” Mu kiki Abraham a bé hémle mimbônga mi Djob, a bé kon maséé i yi le Mésia a ga loo. Ni ngi hémle, Lôk Yuda i timbhe le: “U yé ngi pamna môm matan ma nwii, ndi u nkal le u bi tehe Abraham?” Ndi Yésu a nyelel le: “Me nkal yaga bé maliga le: Ilole Abraham a ngwéé, me bé niñ.” A mpôdôl niñ yé i ngii kiki mpémba hégél i mbuu.​—Yôhanes 8:56-58.

Kiki Yésu a nkal le a bé niñ nwaa le Abraham a nlo, Lôk Yuda i yé ñunbak, i yé bebee i ôm nye ngok. Ndi Yésu a nsemba bo, a ke ngi mbabaa.