E se tiko voli ga mai Jerusalemi o Jisu donuya na Soqo ni Valevakacevaceva (se Valetabanikau) qai vakavulica tiko ga na ka dina. Era kaya eso na Jiu era tiko ena soqo: “O keimami qo na kawa i Eparama, keimami se sega ni bau bobula vua e dua.” E sauma o Jisu: “Au kila ni oni kawa i Eparama. Ia oni via vakamatei au ni oni sega ni vakabauta na noqu vosa. Au tukuna ga na ka au raica vei Tamaqu, ia o kemuni, ni cakava ga na ka oni rogoca vei tamamuni.”—Joni 8:33, 37, 38.

E vakamatatataka o Jisu ni duidui na Tamana mai na tamadra na Jiu. Nira sega ni kila na ibalebale ni vosa i Jisu, era tukuna tale na Jiu: “E tamai keimami o Eparama.” (Joni 8:39; Aisea 41:8) Nira kawa dina i Eparama, era nanuma kina ni tautauvata na nodra vakabauta kei Eparama, na itokani ni Kalou.

Ia era kidroataka na nona cavuta o Jisu: “Ke oni luvei Eparama, ni cakava na cakacaka i Eparama.” Io, e dau vakatotomuri tamana na luvena dina. E tomana o Jisu: “Ia qo oni sa via vakamatei au niu tukuna vei kemuni na ka dina au rogoca vua na Kalou. A sega ni cakava qo o Eparama.” E kurabuitaki na ka e cavuta tarava o Jisu: “Oni cakava na cakacaka i tamamuni.”—Joni 8:39-41.

Era sega tiko ga ni taura rawa na Jiu na ibalebale ni nona vosa. Era kaya nira sega ni luvenisala: “Keimami sega ni luve ni dukadukali, e dua ga na Tamai keimami, na Kalou.” Vakacava e Tamadra dina na Kalou? E tukuna o Jisu: “Ke Tamamuni na Kalou, oni na lomani au, ni talai au mai na Kalou. Au sega ni lako mai ena noqu inaki ga, e talai au mai o koya.” E taro sara o Jisu: “Cava oni sega ni kila kina na ka au tukuna tiko?” E sauma ga nona taro: “Baleta oni sega ni via rogoca noqu vosa.”—Joni 8:41-43.

A via vakaraitaka vei ira o Jisu na ca ni nodra sega ni vakabauti koya. Ia qo sa tukuna vakadodonu: “E tamamuni na Tevoro, oni vinakata tale ga moni cakava na gagadre i tamamuni.” E vakamacalataki tamadra vinaka o Jisu: “E daulaba o koya mai na ivakatekivu, e sega ni dei ena dina.” E tomana: “O koya e nona na Kalou e rogoca na vosa ni Kalou. Qo na vuna oni sega kina ni vakarorogo, ni oni sega ga ni nona na Kalou.”—Joni 8:44, 47.

Era cudru na Jiu ra qai tukuna vei Jisu: “Vakacava e sega ni dina na neimami kaya, ‘O kai Samaria qai curumi iko tiko na timoni’?” Era beci Jisu ena nodra vakatokai koya me “kai Samaria,” ia e sega ni kauai kina o Jisu. E kaya ga: “E sega ni curumi au na timoni, au rokovi Tamaqu ga, ia o kemuni oni beci au dina.” Na bibi ni vosa qori e laurai ena ka e yalataka o Jisu: “Ke dua e muria na noqu vosa, ena sega sara ni mate.” E sega ni kena ibalebale qori ni ratou na bula tu ga na yapositolo kei na so tale na imuri i Jisu. E tukuni tiko ga e keri nira na sega ni rusa tawamudu, qori “na ikarua ni mate” e sega kina na inuinui ni veivakaturi.—Joni 8:48-51; Vakatakila 21:8.

Era taura cala na Jiu na vosa i Jisu, era mani kaya: “Keimami sa qai kila ni curumi iko dina tiko na timoni. Sa mate o Eparama, era sa mate tale ga na parofita, ia o kaya, ‘Ke dua e muria na noqu vosa, ena sega sara ni mate.’ O sa uasivi Eparama na tamai keimami sa mate? . . . O cei o iko?”—Joni 8:52, 53.

Macala eke ni via vakaraitaka tiko o Jisu ni o koya na Mesaia. A sega ni sauma vakadodonu na nodra taro me baleti koya, e kaya ga: “Keu vakalagilagi au, ena ka wale na noqu lagilagi. O Tamaqu ga e vakalagilagi au, o koya oni kaya tiko ni nomuni Kalou. Oni sega ga ni kilai koya, ia au kilai koya. Keu kaya niu sega ni kilai koya, au sa na tautauvata kei kemuni, au tamata lasulasu.”—Joni 8:54, 55.

 Sa qai cavuta tale o Jisu na ivakaraitaki i tukadra yalodina: “Dua na ka nona vakanuinui tu na tamamuni o Eparama me raica noqu gauna, a raica dina qai marautaka vakalevu.” Ni vakabauta o Eparama na yalayala ni Kalou, a vakanamata kina ena nona basika na Mesaia. Era sega ni vakabauti koya na Jiu, era kaya: “O se bera mada ga ni yabaki 50, o raici Eparama tu mai vei?” E sauma o Jisu: “Au tukuna vakadodonu vei kemuni, au a bula e liu qai muri sara o Eparama.” A vakaibalebaletaka tiko e keri nona se dua tu na ka bula kaukaua vakayalo mai lomalagi ni bera ni mai bula vakatamata.—Joni 8:56-58.

Dua na ka nodra katakata na Jiu ni tukuna o Jisu ni bula e liu vei Eparama. Era via vakaviriki koya ena vatu, ia e dro bula o Jisu.