Yesu saka aji mu Yelusalema ku Kijiilo kya Matente (nangwa’mba kya Mimba), watwajijile na kusapwila bukine bwanema. Bayudea bamo bataainwe ku kino kijiilo bamwambijile’mba: “Atweba twi baana ba kwa Abalahama kabiji tukyangye kwikalapo bazha ku muntu nangwa umo ne.” Yesu wibakumbwile’mba: “Nayuka namba mwi baana ba kwa Abalahama. Bino mubena kukeba kungipaya, mambo kechi mwaitabila byo mfunjisha ne. Bintu byonka byo namwene kwi Batata byo byo ñamba, bino anweba muba bintu byo mwaumvwine kwi shenu.”—Yoano 8:33, 37, 38.

Yesu waambilenga kuba’mba: Shanji kechi waesakana pamo na shabo ne. Byo babujile kuyuka muntu Yesu ye aambilengapo, Bayudea babwezhezhepo kwamba’mba: “Abalahama ye shetu.” (Yoano 8:39; Isaya 41:8) Bayudea bafumine mu kisemi kya kwa Abalahama. Onkao mambo, balangulukilenga’mba bajinga na lwitabilo lwajingapo na Abalahama watelwanga’mba mulunda na Lesa.

Nangwa byonkabyo, Yesu wibakumishe bingi byo ebambijile’mba: “Umvwe mwajinga baana ba kwa Abalahama, inge muba mingilo ya kwa Abalahama.” Mambo mwana yense ulondela byuba shanji. Yesu wanungilepo kuba’mba: “Bino anweba mubena kukeba kungipaya, amiwa muntu wimubuula bukine bo naumvwine kwi Lesa. Abalahama kechi waubile kino ne.” Kepo Yesu aambile’mba: “Anweba muba mingilo ya shenu.”—Yoano 8:39-41.

Bayudea kechi bakwatakenye muntu Yesu ye aambilengapo ne. Abo bakoselepotu’mba bo baana ba kwa Abalahama, byo baambile’mba: “Atweba kechi twasemekelwe mu bulalelale ne; tuji na Shetu umo, Lesa.” Nanchi kya kine Lesa wajinga Shabo nyi? Yesu wibambijile’mba: “Umvwe Lesa wajinga Shenu, inge mwantemwa, mambo amiwa nafumine kwi Lesa kabiji nji pano. Kechi neishijile ami mwine ne, bino aye ye wantumine.” Kepo Yesu aipwizhe bwipuzho ne kukumbula mwine’mba: “Mambo ka o mwabujila kukwatakanya kyo mbena kwambapo? Mambo kechi mubena kumvwa byambo byami ne.”—Yoano 8:41-43.

Yesu waambile pa bintu byatama byakonsheshe kufumamo na mambo a kumukana. Bino wibambijile kipasu amba: “Anweba mwafuma kwi shenu Diabola, kabiji mukebesha kuba bintu bisaka shenu.” Nanchi shabo Diabola uji byepi? Yesu wamusolwele’mba: “Aye wajinga mbanzhi byo atatwile kwenda mu mashinda anji atama, kabiji kechi watwajijile kwikala mu bukine ne.” Yesu wanungilepo’mba: “Awa wafuma kwi Lesa, umvwa byamba Lesa. O ene mambo o mubujila kumvwa, mambo kechi mwafuma kwi Lesa ne.”—Yoano 8:44, 47.

Byo aambile byazhingijishe Bayudea kabiji baambile’mba: “Nanchi kechi twaamba kine amba, ‘Obewa wi mwina Samaliya kabiji uji na ndemona’ nenyi?” Byo baambijilenga Yesu amba “mwina Samaliya” baubilenga Yesu mwenga. Bino Yesu kechi wateleko muchima ku byo bamwambijilenga ne. Aye wibakumbwile’mba: “Amiwa kechi nji na ndemona ne, bino nemeka Batata, pakuba anweba mumpelula.” Yesu wamwesheshe kuba’mba kuba bino kwanema bingi byo aambile’mba: “Umvwe muntu walama byambo byami, kechi ukafwa ne.” Yesu kechi walumbulwilenga’mba batumwa ne bonse bamulondela kechi bakafwa ne. Bino watazhizhe mu kuba’mba kechi bakafwa lufu lwa myaka ne myaka nangwa’mba “lufu lwa bubiji,” lwa kubula kusanguka ne.—Yoano 8:48-51; Lumwekesho 21:8.

Nangwa byonkabyo, Bayudea kechi baumvwine mwatazhizhe Yesu ne. Onkao mambo, bamwambijile’mba: “Pano po po twayuka’mba uji na ndemona. Abalahama wafwile, ne bangauzhi nabo, bino ubena kwamba’mba, ‘Umvwe muntu walama byambo byami, kechi ukafwa ne.’ Nanchi obewa wakila shetu Abalahama wafwile nyi? . . . Nanchi obewa witela’mba wi ñanyi?”—Yoano 8:52, 53.

Kyamweka Yesu wakebelenga kukwasha bano bantu kuyuka’mba ye Mesiasa. Bino mu kifulo kya kwibabuula mu kushinkamika’mba ye Mesiasa, Yesu waambile’mba: “Umvwe netumbijika ami mwine, ko kuba’mba kwitumbijika kwami kwatu. Batata bo bantumbijika, bonka bo mutela’mba ye Lesa wenu. Bino anweba kechi mwibayuka ne, pakuba amiwa nebayuka. Kabiji inge naamba’mba  kechi nebayuka ne, ko kuba’mba nsakwikala wa bubela nobe anweba.”—Yoano 8:54, 55.

Yesu watwajijile kwamba pe Abalahama wajinga wa kishinka’mba: “Abalahama shenu wasekejile bingi pa kuketekela kumona juba jami, kabiji wijimwene ne kusekela.” Na mambo a kwitabila mu milaye ya Lesa, Abalahama watajilenga kulutwe ku kufika kwa Mesiasa walayilwe. Bayudea byo babujile kuswa kino, bamushikishe’mba: “Obewa ukyangye ne kufikizha myaka 50, nga Abalahama wamumwene byepi?” Yesu wibambijile’mba: “Kinetu nemwambila namba, Abalahama saka akyangye kusemwa, amiwa najinga konka.” Yesu waambilenga pa byo ajinga mwiulu saka aji kilengwa kya bulume kya mupashi.—Yoano 8:56-58.

Bayudea byo bazhingijile pa byaambile Yesu amba wajingako Abalahama saka akyangye kusemwa, batolele mabwe amba bamwase. Bino Yesu wafuminemo kwa kubula kumukozha.