A Zeezi ra keta Zeruzalɛm zãn kibsã yĩnga, n zãmsd nebã bũmb wʋsg Wẽnnaam zugu. Zʋɩf-rãmb kẽer yeel-a lame yaa: “Tõnd yaa a Abrahaam yagense, la tõnd zɩ n yɩ ned yamb ye.” A Zeezi leok-b lame yaa: “Mam miime tɩ yãmb yaa a Abrahaam yagense. La yãmb yaool n dat n kʋʋ maam, yãmb sẽn ka reegd mam goamã yĩnga. Mam togsda bũmb ning m sẽn yã m ba wã nengẽ wã. La yãmba, yãmb maanda bũmb ning y sẽn wʋm y ba wã nengẽ.”—Zã 8:33, 37, 38.

A Zeezi gomdã võor yaa vẽenega. Yẽ ba wã yaa toor ne zʋɩf-rãmbã ba. B sẽn pa wʋm a gomdã võorã, b leoka woto: “Tõnd ba la a Abrahaam.” (Zã 8:39; Ezayi 41:8) Sɩd me, b yaa a Abrahaam yagense. Rẽ kɩtame tɩ b ra tagsd tɩ bãmb me tara tẽeb wa Wẽnnaam zoa a Abrahaam.

La a Zeezi yeel-b-la bũmb sẽn sãam b sũyã. A yeel-b lame: “Yãmb sã n yaa a Abrahaam kamba, bɩ y tʋm y ba a Abrahaam tʋʋmã.” Sɩd me, biig tog n dɩka a ba naoore. A Zeezi paasa woto: “La moasã, maam, soab ning sẽn togs yãmb sɩd m sẽn wʋm Wẽnnaam nengẽ wã, yãmb baooda maam n na n kʋ. A Abrahaam zɩ n maan bõn-kãnga buud ye.” Rẽ poor masã la a yeel-b yaa: “Yãmb tʋmda y ba tʋʋma.”—Zã 8:39-41.

Zʋɩf-rãmbã kell n pa wʋm a Zeezi gomdã võor ye. B ra yetame bal tɩ b yaa a Abrahaam yagense. B yeela a Zeezi yaa: “Tõnd ka tãmpĩib ye. Tõnd ba yaa a yembr tãa: Yaa Wẽnnaam.” A Zeezi yeel-b-la vẽeneg yaa: “Wẽnnaam sã n dag n yaẽ yãmb ba, yãmb dag n na n nongẽ-la maam, bala, mam yii Wẽnnaam pʋgẽ, la m yii Wẽnnaam nengẽ n wa. Mam ka wa m toor ye, la yaa bãmb n tʋm maam.” A Zeezi soka sokre, la a wẽneg n leoke. A yeelame: “Bõe tɩ yãmb ka wʋmd mam goamã võore? Yaa tɩ yãmb ka tõe n kelg mam gomd ye.”—Zã 8:41-43.

A Zeezi sẽn da rat yaa a wilg-b tɩ b sẽn kɩɩsd yẽ wã pa yel-bil ye. A tolg n yeel-b-la vẽeneg yaa: “Yãmb ba la Sʋtãanã, la yãmb dat n pidsa y ba wã raabo.” B ba wã yaa nin-bʋg buudu? A Zeezi yeelame yaa: “A yɩɩ nin-kʋʋd hal sɩngr wẽndẽ tɩ ta moasã, la a ka pa sɩd pʋgẽ ye.” A paasa woto: “Wẽnnaam biig kelgda Wẽnnaam goamã. Yãmb ka kelgda, yãmb sẽn ka Wẽnnaam kambã yĩnga.”—Zã 8:44, 47.

A Zeezi sẽn ning zʋɩf-rãmbã taalã, b sũyã yikame tɩ b yeel yaa: “Tõnd ka tar bʋʋm tɩ yeel tɩ fo yaa Samaari neda, la tɩ zĩn n tar foom sɩda?” B sẽn bool a Zeezi tɩ Samaari nedã yaa paoogre. La a pa gom rẽ yell ye. A leokame bal n yeele: “Zĩn ka tar maam ye. Mam waoogda m ba, la yãmb paoogda maam.” A Zeezi le togsa bũmb tɩ wilgdẽ tɩ zʋɩf-rãmbã sɩd bee yell pʋgẽ. A yeelame: “Mam yeta yãmb sɩd-sɩd tɩ ned sã n tall mam gomdã, a kõn tol n ki ye.” A ra pa rat n yeel t’a tʋm-tʋmdbã, n paas neb nins sẽn tũud yẽ wã pa na n tol n ki ye. A ra rat n yeelame tɩ “kũum a yiib soabã” sẽn yaa sãoong wakat fãa yĩnga, tɩ vʋʋgr kae wã pa na n ta-b ye.—Zã 8:48-51; Vẽnegre 21:8.

Zʋɩf-rãmbã sẽn pa wʋm a Zeezi gomdã võorã, b yeelame: “Moasã wã yẽ, tõnd miime tɩ zĩn n tar foom. A Abrahaam kiime, Wẽnnaam no-rɛɛsdbã me kiime, tɩ fo yaool n yetẽ tɩ ned sã n tall fo goamã a kõn tol n ki ye. Dẽ yĩnga, fo yɩɩda tõnd ba a Abrahaam, sẽn ki wa la? . . . Fo tẽedame tɩ fo yaa ãnda?”—Zã 8:52, 53.

A Zeezi goamã yaa sẽn na n wilg tɩ yẽ la Mesi wã. La b sẽn sok-a wã, a pa yeel rẽ vẽeneg-vẽeneg ye. A yeelame: “Mam sã n waoogd m menga, mam waoogrã yaa zaalem. Yaa m ba, soab ning yãmb sẽn boond tɩ y Wẽnnaamã n waoogd maam. La yãmb ka mi bãmb ye. Mam yẽ mii bãmba. Mam sã n yeel tɩ m ka mi bãmba, mam na n yɩɩ zĩrẽ-yagd wa yãmba.”—Zã 8:54, 55.

Rẽ poore, a Zeezi leb n goma b yaab a Abrahaam sẽn yɩ wẽn-sakdã yelle, n yeele: “Yãmb ba a Abrahaam dag n kɩdma ne sũ-noogo, a sẽn dag n tagsd t’a na n yãnda mam daarã yĩnga. A yãnd-a lame, n maan sũ-noogo.” Sɩd me, a tẽe Wẽnnaam sẽn pʋlem tɩ Mesi n na n wa wã, n da gũud-a ne a sũur fãa. Zʋɩf-rãmbã sẽn pa tẽed a Zeezi gomdã, b yeela woto: “Fo nan ka ta yʋʋm pis-nu, n yaool n yãnd a Abrahaam?” A Zeezi yeel-b lame yaa: “Mam yeta yãmb sɩd-sɩd tɩ sẽn deng a Abrahaam dogem, mam dag n beeme.” A ra gomda a sẽn deng n vɩɩmd saasẽ n da yaa malɛk sẽn tar pãngã yelle.—Zã 8:56-58.

A Zeezi sẽn yeel tɩ yẽ ra beeme t’a Abrahaam nan pa rogã yika zʋɩf-rãmbã sũyã, tɩ b wʋk kug n na n lob-a. La a Zeezi loogame tɩ b ka paam-a ye.