Ge Jesu a sa le Jerusalema Monyanyeng wa Ditaberenakele (goba wa Mešaša), o tšwela pele a ruta ditherešo tše bohlokwa. Bajuda ba bangwe bao ba bego ba le monyanyeng woo ba be ba sa tšwa go re go yena: “Re bana ba Aborahama gomme ga se ra ka ra ba bahlanka ba motho.” Jesu o araba ka gore: “Ke a tseba gore le bana ba Aborahama; eupša le nyaka go mpolaya, gobane ga le dumelele lentšu la ka le dira gore le gatele pele. Ke bolela dilo tšeo ke di bonego ge ke be ke sa na le Tate; ge e le lena le dira dilo tšeo le di kwelego go tatago lena.”—Johane 8:33, 37, 38.

Ntlha ya Jesu e bonolo: Tatagwe ga a swane le tatago bona. Ka ge Bajuda ba sa lemoge seo Jesu a se bolelago, ba bušeletša boipolelo bja bona, ba re: “Tatago rena ke Aborahama.” (Johane 8:39; Jesaya 41:8) Ke ditlogolo tša kgonthe tša Aborahama. Ka gona, ba nagana gore ba na le tumelo e swanago le ya mogwera wa Modimo e lego Aborahama.

Lega go le bjalo, Jesu o nea karabo e tlabago, o re: “Ge e ba le le bana ba Aborahama, gona dirang mediro ya Aborahama.” Ee, morwa o ekiša tatagwe. Jesu o tšwela pele ka gore: “Eupša bjale le nyaka go mpolaya, nna motho yo ke le boditšego therešo ye ke e kwelego go Modimo. Aborahama ga se a ka a dira se.” Ke moka Jesu o bolela mantšu a makatšago, o re: “Le dira mediro ya tatago lena.”—Johane 8:39-41.

Bajuda ba sa dutše ba sa kwešiše gore Jesu o bolela ka mang. Ba ipolela gore ke barwa ba Modimo ba semolao, ba re: “Ga se ra belegwa ka bootswa; re na le Tate o tee, e lego Modimo.” Lega go le bjalo, na ruri Modimo ke Tatago bona? Jesu o re: “Ge nkabe Modimo e be e le Tatago lena, le be le tla nthata gobane ke tlile mo ke etšwa go Modimo. Le gona ga se ka tla ka la ka, eupša Yena yoo o nthomile.” Jesu o botšiša potšišo e bile o a ikaraba, o re: “Ke ka baka la’ng le sa tsebe seo ke se bolelago? Ke ka gobane ga le kgone go theetša lentšu la ka.”—Johane 8:41-43.

Jesu o ile a leka go bontšha ditlamorago tša go mo gana. Eupša bjale o bolela ka go lebanya o re: “Le tšwa go tatago lena Diabolo gomme le rata go dira dikganyogo tša tatago lena.” Tatago bona o bjang? Jesu o mo hlalosa ka mo go kwagalago ka gore: “Yena yoo e bile mmolai wa batho go tloga mathomong, ga se a ka a ema a tiile therešong.” Jesu o oketša ka gore: “Yo a tšwago go Modimo, o theetša mantšu a Modimo. Ke ka baka leo le sa theetšego, gobane ga le tšwe go Modimo.”—Johane 8:44, 47.

Ka ge Bajuda ba befedišitšwe ke ge Jesu a ba sola, ba araba ka gore: “Na ga re rereše ge re re: O Mosamaria e bile o na le motemona?” Ka go bitša Jesu gore ke “Mosamaria,” ba bontšha gore ba a mo nyatša. Eupša Jesu o hlokomologa thogako ya bona, o araba ka gore: “Ga ke na motemona, eupša ke godiša Tate gomme lena le a nkgoboša.” Go bontšha gore taba ye ke e kgolo, Jesu o dira kholofetšo e makatšago, o re: “Ge e ba motho a boloka lentšu la ka, a ka se ke a bona lehu le gatee.” Ga a bolele gore baapostola le ba bangwe bao ba mo latelago le ka mohla ba ka se hwe. Go e na le moo, ba ka se tsoge ba bone tshenyego ya ka mo go sa felego, e lego “lehu la bobedi,” leo le se nago kholofelo ya go tsošwa bahung.—Johane 8:48-51; Kutollo 21:8.

Eupša Bajuda ba tšea mantšu a Jesu ka tsela ya kgonthe, ba re: “Bjale gona re a tseba gore o na le motemona. Aborahama o hwile le baporofeta ba hwile; eupša wena o re: ‘Ge e ba motho a boloka lentšu la ka, a ka se ke a hwa le gatee.’ Na o feta tatago rena Aborahama yo a hwilego? . . . Wena o ipolela gore o mang?”—Johane 8:52, 53.

Go molaleng gore Jesu o bontšha gore ke yena Mesia. Eupša go e na le go araba potšišo ya bona ka go lebanya mabapi le seo a lego sona, o re: “Ge e ba ke itagafatša, letago la ka ga se selo. Ke Tate yo a ntagafatšago, yena yo le rego ke Modimo wa lena; lega go le bjalo, ga le ešo la mo tseba. Eupša nna ke a mo tseba. Le gona ge nkabe ke itše ga ke mo tsebe, nkabe ke swana le lena ke le moaketši.”—Johane 8:54, 55.

Bjale Jesu o ba bušetša mohlaleng wa rakgolokhukhu wa bona yo a botegago, o re: “Aborahama tatago lena o ile a thabišwa kudu ke kholofelo ya go bona mehla ya ka, o ile a e bona a thaba.” Ee, ka ge a be a dumela kholofetšong ya Modimo, Aborahama o be a fagahletše go tla ga Mesia. Bajuda ba arabela ka go se dumele ba re: “Ga o ešo wa ba le nywaga e masomehlano, eupša na o re o bone Aborahama?” Jesu o araba ka gore: “Ruriruri ke re go lena, pele ga ge Aborahama a eba gona, ke be ke šetše ke le gona.” O šupa boemong bja gagwe bja pele ga ge a eba motho e le morongwa yo matla kua legodimong.—Johane 8:56-58.

Ka ge Bajuda ba galefišitšwe ke boipolelo bja Jesu bja gore o phetše pele ga ge Aborahama a eba gona, ba itokišetša go mo kgatla ka maswika. Eupša Jesu o tloga moo a se a gobala.