E Fiesta di Tabernakel, òf Ramada, no a kaba ainda. Anto Hesus a sigui siña e hendenan na Herúsalèm bèrdatnan importante. Algun di e hudiunan ku tabata na e fiesta a kaba di bis’é ku ‘nan ta desendiente di Abraham i ku nunka nan no tabata esklabo.’ Hesus a bisa nan: “Mi sa ku boso ta desendiente di Abraham. Ma boso ta buska mi pa mata, pasobra boso no ta aseptá mi palabranan. Ami ta papia loke mi a mira tempu mi tabata serka mi Tata, i boso ta hasi loke boso a tende di boso tata.”—Huan 8:33, 37, 38.

Hesus su punto tabata masha simpel: Su Tata no tabata nan tata. Pero e hudiunan no a komprondé kiko e tabata ke men. P’esei, nan a bolbe bisa: “Nos tata ta Abraham.” (Huan 8:39; Isaías 41:8) Ta bèrdat ku nan tabata desendiente di Abraham. P’esei nan tabata kere ku nan tabata adorá e mesun Dios ku Abraham, e amigu di Dios.

Pero Hesus a bisa algu ku a shòk nan. El a bisa nan: “Si boso ta yu di Abraham, hasi e obranan di Abraham.” Sí, un berdadero yu ta imitá su tata. Hesus a sigui bisa nan: “Ma awor boso ta buska mi pa mata, ami, un hende ku a bisa boso e bèrdat ku mi a tende for di Dios. Abraham no a hasi esei.” Despues, Hesus a bisa algu ku lo a laga nan keda tolondrá: “Boso ta hasi e obranan di boso tata.”—Huan 8:39-41.

Ainda e hudiunan no a saka afó kiko Hesus tabata ke men. Pa nan, nan tabata yunan legítimo. Nan a bis’é: “Nos no ta yu djafó; ta ún Tata nos tin, Dios.” Pero, di bèrdat Dios tabata nan Tata? Hesus a bisa nan: “Si Dios tabata boso Tata, boso lo a stima mi, pasobra ta di Dios mi a bini i ta pa medio di dje mi ta aki. . . . Mi no a bini riba mi propio inisiativa, sino ta E a manda mi.” I Hesus a hasi nan un pregunta ku e mes a kontestá: “Kon bini boso no sa di kiko mi ta papia? Boso no sa pasobra boso no ke skucha mi palabranan.”—Huan 8:41-43.

Hesus tabata purba di laga nan komprondé ki konsekuensia nan lo por a haña nan kuné si nan rechas’é. Anto el a bisa nan bon kla: “Boso ta bini di boso tata, e Diabel, i boso ke kumpli ku e deseonan di boso tata.” I ki sorto di tata Diabel ta? Hesus a splika: “E tabata un matadó for di kuminsamentu, i e no a keda firme den e bèrdat.” Hesus a sigui bisa: “Esun ku ta bini di Dios ta skucha e palabranan di Dios. P’esei mes boso no ta skucha, pasobra boso no ta bini di Dios.”—Huan 8:44, 47.

Loke Hesus a kaba di bisa a pone e hudiunan rabia mashá. Nan a bis’é: “Nos no tin rason di bisa ku bo ta un samaritano i ku bo tin un demoño?” E echo ku nan a yama Hesus “un samaritano” a mustra kuantu nan tabata despresi’é. Hesus, pasando por alto di nan insulto, a bisa nan: “Mi no tin un demoño; mas bien, mi ta onra mi Tata, i boso ta desonrá mi.” Loke nan tabata hasi por tabatin konsekuensia serio pa nan, pasobra Hesus a primintí: “Si un hende kumpli ku mi palabra, lo e no muri nunka.” Hesus no tabata ke men ku su apòstelnan i otro siguidónan di dje lo no a muri nunka. E tabata ke men ku nunka nan lo ser destruí pa semper, òf eksperensiá “e di dos morto” for di kua no tin resurekshon.—Huan 8:48-51; Revelashon 21:8.

Pero e hudiunan a tuma Hesus su palabranan literalmente. Nan a bis’é: “Awor sí nos sa ku bo tin un demoño. Abraham a muri, e profetanan tambe, ma abo ta bisa: ‘Si un hende kumpli ku mi palabra, lo e no muri nunka.’ Akaso bo ta mas ku nos tata Abraham? El a muri. . . . Ta ken bo ta kere ku abo ta?”—Huan 8:52, 53.

Hesus tabata purba di laga nan komprondé ku ta é ta e Mesías. Pero ora nan a puntr’é ken e ta, e no a duna nan un kontesta direkto. El a bisa nan: “Si mi ta glorifiká mi mes, mi gloria no ta nifiká nada. Ta mi Tata ta glorifiká mi, esun ku boso ta  bisa ta boso Dios. Tòg, boso no a yega di konos’é. Ma ami konos’é. I si mi bisa ku mi no konos’é, lo mi ta un gañadó meskos ku boso.”—Huan 8:54, 55.

I Hesus a bolbe usa ehèmpel di nan tata Abraham, kende tabata un hòmber fiel. El a bisa nan: “Boso tata Abraham a alegrá mashá den e speransa di mira mi dia, i el a mir’é i a keda masha kontentu.” Sí, Abraham, kende a kere den Dios su promesa, tabata antisipá yegada di e Mesías. E hudiunan no a kere nada di loke Hesus a kaba di bisa. Nan a bis’é: “Bo no tin ni 50 aña ainda, i tòg bo a mira Abraham?” Hesus a bisa nan: “Di bèrdat bèrdat mi ta bisa boso: Promé ku Abraham a yega di eksistí, mi tabata eksistí.” Loke Hesus tabata ke bisa nan ta ku, promé ku el a bini tera, e tabata un angel poderoso den shelu.—Huan 8:56-58.

E echo ku Hesus a bisa ku el a eksistí promé ku Abraham a pone e hudiunan rabia asina tantu ku nan kier a piedr’é. Ma Hesus a logra sali bai for di e tèmpel sin ku nan a hasié daño.