Jesusqa Ramäda fiestachömi yachatsikur sïguirqan. Wakinqa Abrahanpa kastan kayanqantam tsëllaraq nishqa kayarqan, y ni imëpis esclävu mana kayanqantam niyarqan. Tsëmi Jesusqa kënö nirqan: “Musyämi Abrahanpa kastan kayanqëkita. Peru wanutsimëtam tïrayanki, porqui manam ninqäkunata chaskikuyankitsu. Teytäwan këkar rikanqäkunapitam noqaqa parlä, peru qamkunaqa teytëkikunapita wiyayanqëkikunatam rurayanki” (Juan 8:33, 37, 38).

Ninqanqa alli clärum këkarqan, porqui pëkunapa teytankunaqa jukmi karqan y Jesuspaqa jukmi karqan. Peru mana entiendirninmi, judïukunaqa yapë kënö niyarqan: “Teytäkunaqa Abrahanmi” (Juan 8:39; Isaïas 41:8). Diospa amïgun Abrahanpa kastampita kayanqanrëkurmi, Abrahannölla markäkoq kayanqanta pensayarqan.

Peru Jesusqa kënömi contestarqan: “Abrahanpa tsurinkuna karqa, Abrahan ruranqankunatam rurayankiman”. Awmi, juk wamraqa teytan ruranqantam rurëta procuran. Tsëpitanam Jesusqa kënö nirqan: “Peru kananqa wanutsimëtam tïrayanki, Diospita wiyanqanta rasumpa kaqta niyäshoqniki nunata. Abrahanqa manam tsëta rurarqantsu”. Y “qamkunaqa teytëkikuna ruranqankunatam rurëkäyanki” niptinmi, mas pantashqa quedariyarqan (Juan 8:39-41).

Pipaq parlëkanqanta mana entiendirninmi, “noqakunaqa manam wachapakïtsu kayä, noqakunapaqa jukllaqllam Teytäkuna, Dioslla” niyarqan. Peru ¿rasumpaku Diospa tsurinkuna kayarqan? Manam. Tsëmi Jesusqa, “Dios Teytëkikuna kaptinqa kuyayämankimanchi, porqui noqaqa Diospitam shamurqö y këchömi këkä. Manam kikïpa munënïpitatsu shamurqö, sinöqa Pëmi kachamashqa” nirqan. Tsëpitanam, “¿imanirmi qamkunaqa ninqäta käyiyankitsu? Parlanqäta wiyëta mana munarmi” nirqan (Juan 8:41-43).

Mana wiyakuyaptin ima pasayänampaq kaqtam Jesusqa entienditsikïta procurarqan, peru kë kutichöqa clärum kënö nirqan: “Qamkunaqa teytëkikuna Diablupitam kayanki, y teytëkikunapa munënintam rurëta munayanki”. ¿Y imanötaq teytankunaqa? Jesusmi, “pëqa munanqanta rurakur qallanqampita patsëmi wanutsikoq karqan, y manam rasumpa kaqchö tsarakurqantsu, porqui rasumpa kaqqa manam pëchötsu këkan” nirqan. Jina “Diospita kaqqa, Dios ninqankunatam wiyakun. Tsëmi qamkunaqa mana wiyakuyankitsu, porqui manam Diospitatsu kayanki” nirqan (Juan 8:44, 47).

Tsënö ninqampitam judïukunaqa alläpa piñakurnin kënö niyarqan: “¿Manaku rasumpa kaqta niyä ‘qamqa Samaria nunam kanki y supëyoqmi kanki’ nir?”. Samaria nuna kanqanta nirqa despreciayanqantam rikëkätsiyarqan. Peru Jesusqa kënömi nirqan: “Noqaqa manam supëyoqtsu kä, sinöqa Teytäta respetanqätam rikätsikü, peru qamkunaqa noqata mana respetayämanqëkitam rikätsikuyanki”. Teytanta respetë alläpa precisaq kanqanta rikätsikurmi kënö nirqan: “Pipis ninqäkunata wiyakoq kaqqa, manam ni imëpis wanunqatsu”. Tsënö nirqa, manam apostolninkuna y wakin qateqninkuna imëpis mana wanuyänampaq kaqtatsu nikarqan. Sinöqa wanurnin yapë kawariyämunampaq kaqta o ‘ishkë kaq wanïman’ mana chäyänampaq kaqtam nikarqan (Juan 8:48-51; Revelacion 21:8).

Jesus ninqanta mana entiendirninmi kënö contestayarqan: “Kananmi sï musyayä supëyoq kanqëkita. Abrahanqa wanurqanmi, jina tsënöllam Diospa willakoqninkunapis wanuyarqan, peru qamqa, ‘pipis ninqäkunata wiyakoq kaqqa, manam ni imëpis wanunqatsu’ ninkim. ¿Qamqa manam wanukushqa teytäkuna Abrahanpita  mas precisaqtsu kanki aw? [...] ¿Pï kanqëkitataq qamqa creinki?” (Juan 8:52, 53).

Diospa Akrashqan kanqantaqa manam defrentitsu nirqan, sinöqa “kikïlla alabakuptïqa, alabakunqäqa manam ni imapaqpis sirwintsu. Teytämi noqataqa alabaman, Diosnikikuna kanqanta niyanqëki kaq. Tsënö kaptimpis, qamkunaqa manam pëta reqiyashqankitsu, peru noqaqa reqïmi. Y pëta mana reqinqäta nirqa, qamkunanö ulikoqmi käman” nirqanmi (Juan 8:54, 55).

Abrahanpaq yapë parlarmi kënö nirqan: “Qamkunapa teytëkikuna Abrahanqa alläpam kushikurqan shamunäpaq kaq tiemputa rikëta shuyarar, y pensëninchömi rikarqan”. Abrahanqa Dios änikunqanman markäkoqmi y Diospa Akrashqan shamunantaqa alläpam munarqan. Peru Jesus ninqanta mana creirmi, kënö niyarqan: “Qamqa manaran pitsqa chunka (50) watayoqraqtsu kanki, ¿y tsënö këkarku Abrahanta rikashqa kanqëkita ninki?”. Jesusnam kënö nirqan: “Rasumpa kaqllatam qamkunata niyaq: Abrahan manaraq kaptinmi, noqaqa karqäna”. Tsënö nirqa rikätsikïkarqan, ciëluchö puëdeq angel kanqan witsampaqmi (Juan 8:56-58).

Abrahanpita mas unëna kawashqa kanqanta niptinmi, judïukunaqa alläpa piñakurnin rumita tsariyarqan Jesusta tsampiyänampaq, peru pëqa escaparmi ewkurqan.