I Ierusalema â no te Oroa patiaraa tiahapa, ua haapii noa Iesu i te taata i te pue parau mau faufaa roa. No parau mai nei vetahi ati Iuda ia ˈna: “E tamarii matou na Aberahama e aore roa matou i riro aˈenei ei tîtî.” Pahono atura Iesu: “Ua ite au e e tamarii outou na Aberahama, te imi nei râ outou i te haapohe ia ˈu, no te mea aita outou e farii ra i ta ˈu parau. Te mau mea ta ˈu i ite a ora ˈi au i pihai iho i to ˈu Metua ra, o ta ˈu ïa e parau. Outou râ, te rave nei ïa i te mau mea ta outou i faaroo i to outou metua.”—Ioane 8:33, 37, 38.

Mea ohie ia taa i ta Iesu haapiiraa: E ere hoê â Metua to ˈna e to ratou. No te taa ore i ta Iesu parau, na ô faahou maira te ati Iuda: “O Aberahama to matou metua.” (Ioane 8:39; Isaia 41:8) E huaai iho â ratou no Aberahama. No reira ratou i manaˈo ai e hoê â Atua to ratou e to Aberahama, te hoa o te Atua.

Horoa ˈtura râ Iesu i teie pahonoraa maere mau: “E tamarii outou na Aberahama, a rave ïa i te mau ohipa a Aberahama.” E pee iho â te hoê tamaiti i te huru o to ˈna metua tane. Na ô faahou atura Iesu: “Teie râ te imi nei outou i te haapohe ia ˈu, tei faaite atu i te parau mau ta ˈu i faaroo i te Atua. Aita Aberahama i na reira.” Parau atura Iesu i te hoê parau mea fifi no ratou ia taa: “Te rave nei outou i te mau ohipa a to outou metua.”—Ioane 8:39-41.

Aita â i taa ˈtura i te ati Iuda o vai ta Iesu e parau ra. Parau maira ratou e e tamarii tiamâ ratou, a na ô ai: “Aita matou i fanauhia i roto i te peu tia ore. Hoê anaˈe to matou Metua, o te Atua.” O te Atua iho â anei râ to ratou Metua? Parau atura Iesu: “Ahiri o te Atua to outou Metua, e here ïa outou ia ˈu, na te Atua hoi i tono mai ia ˈu i ǒ nei. Aita vau i haere mai na nia noa i to ˈu manaˈo, na ˈna râ i tono mai ia ˈu.” Na ô atura oia: “Aita outou e hinaaro ra e farii i ta ˈu parau, no reira outou e ore ai e taa i ta ˈu e parau nei.”—Ioane 8:41-43.

Ua tamata Iesu i te faaite eaha te mau faahopearaa ia ore ratou e farii ia ˈna. Na ô roa ˈtura râ oia: “O te Diabolo to outou metua e te hinaaro ra outou e rave i te hinaaro o to outou metua.” Mai te aha te huru o to ratou metua? Parau roa ˈtura Iesu: “E taparahi taata oia i to ˈna haamataraa, e aita oia i mau papu i roto i te parau mau.” Na ô faahou atura oia: “Te taata no te Atua ra, e faaroo ïa i te mau parau a te Atua. Outou râ, aita ïa e faaroo ra, no te mea e ere outou i te taata no te Atua.”—Ioane 8:44, 47.

Riri ihora te ati Iuda e pahono maira: “Ua tano iho â ïa to matou parauraa e e taata Samaria oe e e demoni to oe, e ere anei?” Te vahavaha ra ratou ia Iesu ma te parau e “e taata Samaria” o ˈna. Aita râ Iesu i tâuˈa i ta ratou parau faaino. Pahono atura oia: “Aita e demoni to ˈu, te faatura nei râ vau i to ˈu Metua, e te faaino nei outou ia ˈu.” Mea ino mau ia faaino ia Iesu, ua faahiti hoi oia i teie parau fafau maere: “O te haapao i ta ˈu parau, e ore roa ïa e pohe.” Aita oia e parau ra e e ore roa te mau aposetolo e te tahi atu o te pee ra ia ˈna e pohe. E ore roa râ ratou e roohia i te haamouraa mure ore, “te piti o te pohe,” aita e tiaturiraa o te tia-faahou-raa.—Ioane 8:48-51; Apokalupo 21:8.

Aita râ i taa i te ati Iuda e e auraa parau ta Iesu. Na ô maira ratou: “I teie nei, ua papu atura ia matou e e demoni to oe. Ua pohe Aberahama e te mau peropheta atoa, e te parau nei oe: ‘O te haapao i ta ˈu parau, e ore roa ïa e pohe.’ Mea faufaa aˈe oe i to matou metua o Aberahama tei pohe? . . . O vai hoi oe?”—Ioane 8:52, 53.

Mea papu e te haapii atu ra Iesu e o ˈna te Mesia. Aita râ oia i pahono roa ˈtu i ta ratou uiraa  o vai o ˈna. Na ô atura oia: “Ia faahanahana vau ia ˈu iho, e hanahana faufaa ore ïa to ˈu. Na to ˈu Metua e faahanahana ra ia ˈu, o ˈna ta outou e parau ra to outou Atua. Teie râ aita outou i ite o vai o ˈna. O vau râ, ua ite ïa o vai o ˈna. Ahiri au i parau e aita vau i ite o vai o ˈna, e haavare ïa vau mai ia outou.”—Ioane 8:54, 55.

Faahiti faahou atura Iesu i te hiˈoraa o to ratou tupuna haapao maitai: “Ua oaoa roa Aberahama to outou metua i te tiaturiraa e ite i to ˈu mahana. Ua ite oia e ua oaoa.” Oia mau, no to ˈna tiaturi i ta te Atua i fafau, ua tiai ru Aberahama i te Mesia. Na ô maira te ati Iuda aita e tiaturi ra i ta ˈna i parau: “Aita â to oe i 50 matahiti atura, e ua ite ïa oe ia Aberahama?” Pahono atura Iesu: “E parau mau ta ˈu e parau atu: Aita â Aberahama i fanauhia ˈtura, i vai na vau.” Te parau ra oia i to ˈna oraraa na mua ˈˈe i nia i te raˈi ei varua puai.—Ioane 8:56-58.

Riri ihora te ati Iuda no ta Iesu parau e i ora na oia hou Aberahama, e ohi aˈera i te ofai no te pehi ia ˈna. Tapuni atura râ Iesu aita i pepe aˈe.