Jesuseʼ láayliʼ tiaʼan tu kaajil Jerusalén tu kʼiinbesajil le Tabernaculoʼob (wa paseloʼoboʼ), táan u kaʼansik yaʼab baʼaloʼob. Taal jujuntúul judíoʼobeʼ ka joʼopʼ u yaʼalikoʼob: «Toʼoneʼ u paalaloʼon Abrahán, tsʼoʼoleʼ mix juntéen palitsiltaʼakoʼon». Jesuseʼ tu núukaj: «Teneʼ in wojel u paalaleʼex Abrahán, baʼaleʼ a kʼáat a kíimseneʼex tumen maʼ tu pʼáatal ta puksiʼikʼaleʼex le baʼaxoʼob kin waʼalikoʼ. Tuláakal le baʼaxoʼob tin wilaj le tiaʼanen kaʼach tu yiknal in Taataoʼ, letiʼe baʼaxoʼob xan kin kaʼansikoʼ; teʼex xaneʼ ka beetkeʼex le baʼaxoʼob tsʼoʼok u yaʼalaʼalteʼex tumen a taataʼexoʼ» (Juan 8:33, 37, 38).

Le baʼax ku yaʼalik Jesusoʼ jach chíikaʼan yanil, u Taataeʼ yaanal tiʼ u taata le judíoʼoboʼ. Le judíoʼoboʼ maʼ tu naʼatoʼob le baʼax ku yaʼalik Jesusoʼ, ka tu kaʼa aʼaloʼob: «K-taataeʼ Abrahán» (Juan 8:39; Isaías 41:8). Tumen tiʼ u taaloʼob tu chʼiʼibal Abrahán, u amigo Dioseʼ, ku tuklikoʼobeʼ láayliʼ yaantiʼob le fe anchajtiʼoʼ.

Baʼaleʼ Jesuseʼ tu yaʼalajtiʼob: «Wa u paalaleʼex Abrahaneʼ beeteʼex le baʼaxoʼob tu beetaj Abrahanoʼ». U jaajileʼ juntúul hijotsileʼ ku beetik baʼaxoʼob ku beetik u taata. Jesuseʼ tu yaʼalaj xan: «Baʼaleʼ beoraaʼ taak a kíimskeneʼex, kex tsʼoʼok in waʼalikteʼex le u jaajil tin kanaj tiʼ Diosoʼ. Abrahaneʼ maʼ tu beetaj le baʼax ka beetkeʼexoʼ». Le oʼolal Jesuseʼ tu yaʼalaj u jaajil tiʼob: «Teʼexeʼ táan a beetkeʼex le baʼax ku beetik a taataʼexoʼ» (Juan 8:39-41).

Le judíoʼoboʼ láayliʼ maʼ u naʼatoʼob tiʼ baʼax ku tʼaan Jesuseʼ. Le oʼolal joʼopʼ u yaʼalikoʼob letiʼobeʼ jach u paalaloʼob Abrahán, tu yaʼaloʼob: «Toʼoneʼ maʼ síijoʼon tiʼ núupkʼebaniʼ; chéen juntúuliliʼ k-taata yaan, Dios». Baʼaleʼ, ¿jach wa tu jaajil Dios u taataʼob? Jesuseʼ tu yaʼalaj: «Wa tu jaajil Dios a Taataʼexeʼ, bejlaʼa kaʼach a yaabiltmeneʼexeʼ, tumen Dios túuxten, yéetel tu yoʼolaleʼ way yaneneʼ. Jach tu jaajil maʼ chéen tu juunal in wóol taaleniʼ, baʼaxeʼ Letiʼ túuxten». Jesuseʼ tu beetaj junpʼéel kʼáatchiʼ ka tsʼoʼokeʼ ka tu núukaj: «¿Baʼaxten teʼexeʼ maʼ a wojleʼex le baʼax kin waʼalikoʼ? Tumen maʼ a kʼáat a wuʼuyeʼex in tʼaaniʼ» (Juan 8:41-43).

Jesuseʼ tsʼoʼok u tsolik baʼax jeʼel u yúuchul tiʼ le máaxoʼob maʼ tu creertikoʼoboʼ. Baʼaleʼ beoraaʼ u taatsʼ úuchik u yaʼalik: «Teʼexeʼ tiʼ a taataʼex le Kʼaasilbaʼal a taaleʼexoʼ, yéetel a kʼáat a beeteʼex le baʼaxoʼob uts tu tʼaan a taataʼexoʼ». ¿Baʼax u kʼáat u beet u taataʼob? Jesuseʼ tu yaʼalaj: «Letiʼeʼ desde tu káajbaleʼ tu beetuba j-kíimsaj wíinik, maʼ pʼáat ichil le jaajoʼ». Yéetel tu yaʼalaj: «Le máax tiʼ Dios u taaleʼ ku yuʼubik le baʼaxoʼob ku yaʼalik Diosoʼ. Le oʼolal maʼ ta wuʼuyikeʼex baʼax kin waʼalik, tumen maʼ tiʼ Dios a taaleʼexiʼ» (Juan 8:44, 47).

Lelaʼ tu beetaj u pʼuʼujul le judíoʼoboʼ ka tu yaʼaloʼob: «¿Maʼ wa le oʼolal k-aʼalik, techeʼ samaritanoech yéetel okaʼantech demonio?». Ka tu yaʼaloʼob tiʼ Jesús «techeʼ samaritanoech», táan u yeʼeskoʼob maʼatech u kʼamkoʼob. Baʼaleʼ Jesuseʼ maʼ tu beetaj u cuentail leloʼ, le oʼolal tu yaʼalaj: «Teneʼ maʼ okaʼanten demonioiʼ, baʼaxeʼ teneʼ kin weʼesik tsiikil tiʼ in Taata, chéen baʼaleʼ teʼexeʼ maʼ ta weʼeskeʼexten tsiikil». Lelaʼ maʼ chéen báaxaliʼ, tumen Jesuseʼ tu yaʼalaj: «Wa yaan máax ku beetik baʼax kin waʼalikeʼ, mix bikʼin kun kíimil». Letiʼeʼ maʼ táan u yaʼalik wa mix bikʼin u kíimil u disipuloʼob yéetel u apostoloʼobiʼ. Baʼaxeʼ mix bikʼin kun xuʼulsbiltiʼob junpuliʼ tumen le «kaʼa kíimil», ka tak pʼáatak maʼ u kaʼa kuxkíintaʼaloʼoboʼ (Juan 8:48-51; Apocalipsis 21:8).

Baʼaleʼ le judíoʼoboʼ tu tukloʼob táan u yaʼalik Jesús maʼ kun kíimil u disipuloʼob, le oʼolal tu yaʼaloʼob: «Beora túunaʼ tsʼoʼok k-ilik jach tu jaajil okaʼantech demonio, tumen Abrahaneʼ kíimi bey xan le profetaʼoboʼ, baʼaleʼ techeʼ ka waʼalik: ‹Wa yaan máax ku beetik baʼax kin waʼalikeʼ, mix bikʼin  kun kíimil›. ¿Ka tuklik wa maas nojchech tiʼ k-taata Abrahán kíimoʼ? [...], ¿máax túun a taaskaba beyaʼ?» (Juan 8:52, 53).

U jaajileʼ Jesuseʼ táan u tʼaan tiʼ le meyaj ken u beet bey Mesíasiloʼ. Le oʼolal utiaʼal u núukik le úuchik u kʼáatkoʼob máax letiʼoʼ, tu yaʼalaj: «Wa chéen tin juunal kin nojbeʼenkúuntkinbaeʼ, mix baʼal u biilal le nojbeʼeniloʼ. Baʼaleʼ in Taataeʼ letiʼe máax nojbeʼenkúuntkenoʼ, le máax ka waʼalikeʼex a Dioseʼexoʼ. Chéen baʼaleʼ teʼexeʼ maʼ a kʼaj óoleʼexiʼ. Baʼaleʼ teneʼ in kʼaj óol, yéetel wa ka in waʼal maʼ in kʼaj óoleʼ yaan u pʼáatal chéen táan in tuus jeʼex teʼexeʼ» (Juan 8:54, 55).

Beoraaʼ Jesuseʼ tʼaanaj tiʼ u yúuchben chʼiʼibaloʼob: «Abrahán a taataʼexeʼ jach yéetel kiʼimak óolal tu páaʼtaj u kʼuchul u kʼiinil in beetik le baʼaloʼobaʼ, tu yilaj túuneʼ ka kiʼimakchaj u yóol». Jach beyoʼ, Abrahaneʼ ku creertik le baʼax ku yaʼalik Diosoʼ, le oʼolal ku páaʼtik kaʼach u kʼuchul le Mesíasoʼ. Ka aʼalaʼabtiʼ tumen le judíoʼoboʼ: «Mix cincuenta jaʼaboʼob yaantech, baʼaleʼ ¿ka waʼalik tsʼoʼok a wilik Abrahán?». Jesuseʼ tu núukajtiʼob: «Jach tu jaajil kin waʼalikteʼex: Táanil tiʼ u síijil Abrahaneʼ, teneʼ tsʼokaʼaniliʼ in wantaleʼ». Letiʼeʼ tʼaanaj tiʼ le kʼiinoʼob tiaʼan kaʼach teʼ kaʼan bey juntúul ángel jach yaan u poderoʼ (Juan 8:56-58).

Le judíoʼoboʼ maas pʼuʼujoʼob ka tu yuʼuboʼob u yaʼalik Jesús kuxlaj táanil tiʼ Abrahán, ka taakchaj u muruxtuntikoʼob. Baʼaleʼ Jesuseʼ púutsʼtiʼob.