Nuuruʼ Jesús Jerusalén, cusiidiʼ ca cosa ni dxandíʼ ne ni risaca lu Saa stiʼ ca Tabernáculo (o stiʼ ca Cabaña). Gudxi caadxi judíu laabe xiiñiʼ Abrahán laacaʼ ne qué huayuu dxi gácacaʼ esclavu stiʼ guirutiʼ. Ngue runi gudxi Jesús laacabe: «Nannaʼ xiiñiʼ Abrahán laatu, peru racaláʼdxitu guutitu naa purtiʼ qué ricaatu ni cusiideʼ laatu. Rinieeʼ ca cosa ni biiyaʼ dxi guyuaaʼ ra nuu Bixhozeʼ, peru laatu rúnitu ca cosa ni runadiágatu de bixhózetu» (Juan 8:33, 37, 38).

Biaʼsi nga ni gudxi Jesús laacabe purtiʼ gadxé nga bixhózecabe. Peru qué ñene ca judíu que laabe ne bibiguetaʼ guniʼcaʼ: «Abrahán nga bixhózedu» (Juan 8:39; Isaías 41:8). Zácaxa ca judíu tiisi nácacaʼ xiiñiʼ Abrahán, ni guca xhamigu Dios, nápacaʼ fe casi gupa Abrahán.

Para gudxi Jesús laacabe: «Pa ñaca xiiñiʼ Abrahán laatu la? ñúnitu ni biʼniʼ Abrahán». Nánnanu guiráʼ binni racalaʼdxiʼ gaca casi bixhoze. Ne guniʼruʼ Jesús: «Naa maʼ gudxeʼ laatu ni dxandíʼ ni binadiaʼgaʼ de Dios, peru yanna racaláʼdxitu guutitu naa. Cadi nga diʼ nga ni biʼniʼ Abrahán». Despué, gudxi Jesús laacabe xiixa ni bicaa laacabe guiníʼ íquecabe: «Laatu rúnitu xhiiñaʼ bixhózetu» (Juan 8:39-41).

Peru caʼruʼ guiene ca judíu que tudé ngue caníʼ Jesús, ne nacaʼ: «Cadi xiiñiʼ guiʼxhiʼ diʼ tuuxa laadu; Dios nga tobi lucha Bixhózedu». Peru ¿ñee dxandíʼ xiiñiʼ Dios laacabe la? Jesús guníʼ: «Pa ñaca Dios nga Bixhózetu la? ñannaxhiitu naa, purtiʼ Dios biseendaʼ naa ne maʼ nuaaʼ raríʼ. Cadi bendaʼ de naa siaʼ, sínuque Dios biseendaʼ naa». Despué gunabadiidxabe laacaʼ peru laaca laabe bicábibe ni: «¿Xiñee qué riénetu ni canieeʼ pue? Purtiʼ qué randa rucaadiágatu ca diidxaʼ stinneʼ» (Juan 8:41-43).

Maʼ biyubi Jesús modo gusiene ca judíu que xi zazaaca de laacaʼ pa gudxiidéchecaʼ laabe, peru yanna bisiá Jesús diidxaʼ ne gudxi laacabe: «Xiiñiʼ Binidxabaʼ laatu, laabe nga bixhózetu, ne racaláʼdxitu gúnitu ni ná bixhózetu». ¿Ximodo nga bixhózecabe yaʼ? Jesús bisiene ni: «Dede dxi bizulube huayuutibe. Bixélebe de ni dxandíʼ purtiʼ gastiʼ ni dxandíʼ ndaaniʼ ladxidoʼbe». Ne guniʼruʼ: «Ni zeeda de Dios la? rucaadiaga stiidxaʼ Dios. Peru laatu qué rucaadiágatu, purtiʼ cadi zeedatu de Dios» (Juan 8:44, 47).

Bidxiichi ca judíu que pur ca diidxaʼ ni gudxi Jesús laacaʼ ne gúdxicaʼ laabe: «¿Cadi dxandíʼ nga ni rinidu “Samaritanu lii ne nuu ti demonio lu cuerpu stiluʼ” la?». Cayúnicabe menu Jesús, ngue runi gúdxicabe laa samaritanu. Peru qué nulabi Jesús ni guníʼcabe que ne gudxi laacabe: «Cadi nuu ti demonio lu cuerpu stinneʼ, sínuque runeʼ respetar Bixhozeʼ, peru laatu qué runi respetartu naa». Para guluiʼbe laacaʼ cadi guendariguite nga ni caniʼbe que, gúdxibe laacaʼ xiixa ni bidxagayaacaʼ: «Pa chinanda tuuxa stiidxaʼ la? qué ziuu dxi gatiʼ». Cadi caníʼ diʼ Jesús qué ziuu dxi gatiʼ ca apóstol stiʼ ne ca xpinni. Ni nuube guiniʼbe nga qué zuni sufrir ca xpínnibe lu «guiropa guendaguti» o qué zanitilucaʼ para siempre, ne maʼ qué zabiguetaʼ guibánicaʼ (Juan 8:48-51; Apocalipsis 21:8).

Gadxé modo biene ca judíu que ca diidxaʼ ni gudxi Jesús laacaʼ, ngue runi nacaʼ: «Yanna huaxa nánnadu nuu ti demonio lu cuerpu stiluʼ. Purtiʼ guti Abrahán ne ca profeta, peru lii riniʼluʼ: “Pa chinanda tuuxa stiidxaʼ la? qué ziuu dxi gatiʼ”. ¿Ñee jma xa risácaluʼ que bixhózedu Abrahán? Purtiʼ laa guti [...]. ¿Tu ruʼnuʼ lii pue?» (Juan 8:52, 53).

Cusiene Jesús laacabe laa nga Mesías. Peru lugar de ñabi peʼ Jesús laacabe tuu nga laa la? guníʼ: «Pa ñaca rusisacaʼ laca naa la? pur gana si cayuneʼ ni. Bixhozeʼ nga rusisaca naa, ni riniʼtu Dios stitu. Naa runebiaʼyaʼ laabe, peru laatu qué runibiaʼtu laabe. Ne pa guinieeʼ qué runebiaʼyaʼ  laabe laaca nusiguieeʼ cásica rusiguiitu» (Juan 8:54, 55).

Óraque bibiguetaʼ guníʼ Jesús de Abrahán: «Nabé biecheʼ Abrahán, bixhózetu, purtiʼ cabeza guʼyaʼ dxi stinneʼ, biiyabe ni ne biéchebe». Zacá ni, gupa Abrahán fe lu ca promesa stiʼ Dios ne guizáʼ gúpabe gana ñuuyabe Mesías. Peru qué ñuni cré ca judíu que ni gudxi Jesús laacaʼ, ngue runi guniʼcaʼ: «Caʼruʼ gusaaluʼ 50 iza, ¿ne naluʼ maʼ biiyaluʼ Abrahán la?». Para gudxi Jesús laacabe: «Dxandíʼ ni chitidxeʼ laatu riʼ, ante gale Abrahán, naa maca nuaaʼ». Ni nuu Jesús guiníʼ nga ante gueeda lu Guidxilayú, bibani guibáʼ casi ti ángel ni napa poder (Juan 8:56-58).

Ora binadiagaʼ ca judíu que guníʼ Jesús maca nuu ante chuʼ Abrahán, guizáʼ bidxiichicaʼ ne gundísacaʼ guié para nuchacaʼ Jesús, peru bicaachilube ne bireebe ndaaniʼ templu que sin ñácabe gastiʼ.