‘Jeŋkwimɛ Mawu aɖo Fyɔɖuxu ɖeka anyi, ci yí dagu gbeɖegbeɖe o.’​—Daniɛli 2:44, Xexe yeye gɔmeɖeɖe.

“Mawu ana evi ŋsuvi ɖeka mì eyi evi ŋsuvi lɔ akpa nɔ amɛ kplɔtɔwo.”​—Ezai 9:6, Mawu Nyɔ.

Enyɔnuɖɛ cɛwo ana kankando ji eo mɔ:

• Acɛkpakpa jɔjɔɛ ɖeka li ci yí awa enunywi nɔ eo.​—Luiki 11:28.

• Anɔ agbe le jijɔ koɖo lanmɛsɛn blebu mɛ le xexe yoyu ci yí gbɔkɔ mɛ.​—Enyɔdasɛ 21:3, 4.

Aɛ, do susu amɛve cɛwo ŋci:

• Yesu dasɛ enu ciwo Mawu Fyɔɖuxu ava wa. Yesu kpla yi nukplaviwo mɔ wo le do gbeɖaɖa nɔ Mawu Fyɔɖuxu lɔ ava, yí edro Mawutɔ anyi wawa le nyigban ji (Matie 6:9, 10). Enu ciwo Yesu wa dasɛ lé egbedodoɖa lɔ ava mɛ do.

  Hwenu ci yí Yesu va nyigban jiɔ, éna enuɖuɖu amɛ ciwo shive ci, edadɔ̀ nɔ dɔ̀nɔwo yí gbe fɔn amɛ kukuwo! (Matie 15:29-38; Ʒan 11:38-44). Yesu ci yí nyi Mawu Fyɔɖuxu lɔ Fyɔ to wana cɛwo ji yí dasɛ enunywi ciwo Mawu Fyɔɖuxu lɔ ava wa nɔ agbetɔwo.​—Enyɔdasɛ 11:15.

• Enuvwin ciwo yí jɔ̀jɔ̀ le xexe lɔ mɛ dasɛ mɔ Mawu Fyɔɖuxu lɔ gogo. Yesu nu ɖɛ mɔ nɔ́ ekpɔtɔ hwɛɖeka yí Mawu Fyɔɖuxu lɔ ahɛn fafa vɛɔ, ahwawawa, ejutotwi koɖo nyigban hunhunhunwo ajɔ le nyigban ji.​—Matie 24:3, 7.

  Mì kpɔ enu cɛwo jɔ̀jɔ̀ le egbɛ ŋkekewo mɛ. Eyi taɖo kankandoji sun mì shi mɔ dagbe jinjin o Mawu Fyɔɖuxu lɔ ava ɖe enu baɖabaɖa ŋtɔ́wo si.