“Ɔwɔicō kú ɔkpáncō géē je ajɔ̄ɔ̄cɛ́ ɔhá kwu ajɛ, nɛ̄ ɔ̄cɛ dúúmā í gáā je ɔ́ yíífi glá ŋ́.”—Udánīyɛ̄lu 2:44, Ubáyíbu Ku Idɔ̄ma Ā.

“É kē kwú ɔyí éyi ú lɛ alɔ ɛɛ́. Anú gáā wɛ ɔcɛ́ kú alɔ á.”—Ayisáya 9:6.

• Igɔmɛnti olɔhi nōo géē tu uwɔ abɔ.—Ayisáya 48:17, 18.

• Ipu ɛcɛ ɛyipɛ nōo yɔ i wa a, alɔ i gáā doōcē gɛ ŋ, eeye kē i yɔ.—Ɔdā Nēé Mafú Lɛ Ujɔ́ni 21:3, 4.

Ii, ohigbu ɛlā ɛpa nyā:

• Ujisɔsi mafu ɔdā nɛ Ajɔɔcɛ ku Ɔwɔico géē ya. Ujisɔsi nwu ayikpo ku nu kéē gbɔɔkɔ ku Ajɔɔcɛ ku Ɔwɔico kóō wa, cɛɛ ku ɔdā nɛ Ɔwɔico tine a kóō le ya ipu ɛcɛ nyā. (Umátiyu 6:9, 10) Ujisɔsi mafu ɛgɛ nɛ ɔkɔ ō gba ɔɔma gáā ya jila lɛ a.

  Eko nɛ Ujisɔsi yɔ ipu ɛcɛ a, ó je ɔdole lɛ ācɛ nɛ ɛmiyɛ yɔ i ŋmo uwa, ó hɛ ācɛ ō doōcē ta, ó klla je ācɛ nōo kwū a heyi ŋma ɔlekwu! (Umátiyu 15:29-38; Ujɔ́ni 11:38-44) Oŋma lɛ aɔdā nɛ ó ya nyā, Ujisɔsi mafu ɔdā nɛ Ajɔɔcɛ ku Ɔwɔico géē ya lɛ ācɛ nōo lɛyitaajɛ lɛ ɔ eko nɛ ó gáā ce ɔcɛ́ ɛcɔbu a.—Ɔdā Nēé Mafú Lɛ Ujɔ́ni 11:15.

• Aɔdā nōo yɔ i ya ipu ɛcɛ nyā mafu ku Ajɔɔcɛ ku Ɔwɔico le ba ō wa ɛ. Gbɔbu ɛɛ ku Ajɔɔcɛ ku Ɔwɔico kóō bi ɛbɔ wa ipu ɛcɛ nyā, Ujisɔsi ka ɛfu ō kpo géē yɔ, ɔkpɛta mɛmla ajɛ ojiliye klla hɛ wulu géē ya.—Umátiyu 24:3, 7.

  Icɛ, alɔ yɔ i má ku aɔdā nōo ba nyā yɔ i ya kpɛmm. Ohigbu ɔɔma, alɔ kpɔtuce ka ó gáā gboji gɛ ŋ, Ajɔɔcɛ ku Ɔwɔico géē bi oŋmɛyi ku ɛjɛɛji unwalu nyā wa.