Eme họ Uvie Ọghẹnẹ?
Kọ whọ te ta nọ . . .
-
oware nọ o rrọ udu ohwo?
-
ẹme ọtadhesẹ?
-
egọmeti obọ odhiwu?
OWARE NỌ EBAIBOL NA Ọ TA
“Ọghẹnẹ obọ odhiwu ọ te rehọ uvie jọ mu, onọ a te raha vievie he.”—Daniẹl 2:44, Efafa Akpọ Ọkpokpọ.
“A kẹ omai ọmọzae jọ no; egọmeti na e rẹ te jọ ẹkoko riẹ.”—Aizaya 9:6; ẹme-obotọ.
IRERE NỌ I RE TE OWHẸ
-
Whọ te jọ otọ emamọ egọmeti nọ o te wha erere se owhẹ.—Aizaya 48:17, 18.
-
Evaọ akpọ ọkpokpọ nọ ọ be tha na, whọ te gbẹ mọ họ, yọ who ti wo evawere.—Eviavia 21:3, 4.
KỌ MA SAI GINE FIEVAHỌ OWARE NỌ EBAIBOL NA Ọ TA?
Ee, fiki eware ivẹ jọ:
-
Jesu o dhesẹ oware nọ Uvie Ọghẹnẹ u ti ru. Jesu o wuhrẹ ilele riẹ nọ a lẹ re Uvie Ọghẹnẹ o ze re oreva Ọghẹnẹ u rugba evaọ otọakpọ na. (Matiu 6:9, 10) Jesu o dhesẹ epanọ Ọghẹnẹ ọ te rọ kuyo olẹ yena.
Okenọ Jesu ọ jọ otọakpọ, ọ ko ahwo nọ ohọo u je kpe, o siwi ahwo nọ a jẹ mọ, ọ tẹ jẹ kpare ahwo nọ a whu no ze. (Matiu 15:29-38; Jọn 11:38-44) Jesu nọ ọ te jọ Ovie Uvie Ọghẹnẹ na ọ rehọ eware nana nọ o ru na dhesẹ oware nọ Uvie na u ti ru kẹ ahwo nọ a rrọ otọ esuo riẹ.—Eviavia 11:15.
-
Eware nọ e rrọ akpọ via nẹnẹ i dhesẹ nọ Uvie Ọghẹnẹ o te ze kẹle. Jesu ọ ruẹaro nọ omoke kakao taure Uvie na o tẹ te wha udhedhẹ ziọ akpọ na, ahwo a ti fi ẹmo, ohọo u ti mu, yọ etọ i ti nuhu.—Matiu 24:3, 7.
Eware nana e be via enẹna. Fikiere, ma wo imuẹro nọ Uvie Ọghẹnẹ u ti si ebẹbẹ nana kpobi no otọ kẹle.
RORO KPAHE ONỌ NANA
Ẹvẹ eware e te jọ nọ Uvie Ọghẹnẹ o tẹ ze no?
Ebaibol na ọ kẹ uyo onọ yena evaọ OLEZI 37:29 gbe AIZAYA 65:21-23.