“Illu n igenwan a d-issker yiwet n tgelda ur nɣelli ara, i dayem.”—Danyil 2:44, Tira Iqedsen, EEO 2010.

“Teţţunefk-as lḥekma, lεaḍima akw-d tgeldit [...]. Lḥekma-s, d lḥekma n dayem, ur tfennu ara; tageldit-is ur tɣelli ara.”—Danyil 7:14.

Lewεud-agi ţţaken-d ṭṭmana belli:

• tella lḥukuma taḥeqqit ara k-d-yawin nnfeε si tura.—Icεaya 48:17, 18.

• qrib a nεic di sseεd yerna a nesεu ṣṣeḥḥa ikemlen deg yiwet n ddunit tajdiṭ.—Aweḥḥi 21:3, 4.

Ih. Atentah kra n ssebbat:

• Σisa issken-ed ayen ara texdem Tgelda n Ṛebbi. Σisa yesseḥfeḍ i inelmaden-is ad ţẓallan iwakken a d-tas Tgelda n Ṛebbi yerna bac a d-yeḍru lebɣi n Ṛebbi ɣef lqaεa. (Matta 6:9, 10) Issken-ed amek ara d-iǧaweb Ṛebbi ɣef tẓallit-agi.

  Asmi i gella Σisa ɣef lqaεa, yessečč wid yelluẓen, yesseḥla wid ihelken, yerna issker-ed wid yemmuten! (Matta 15:29-38; Yuḥenna 11:38-44) Issenεet-ed akken ilaq cwiyya si lxiṛat ifazen ara d-tawi Tgelda n Ṛebbi i lεibad ɣer zdat, asm’ara yili d lḥakem n Tgelda-yagi.—Aweḥḥi 11:15.

• Liḥalat n ddunit sskanayent-ed belli qrib a d-tas Tgelda n Ṛebbi. Σisa icar-ed belli, uqbel kan a d-tawi Tgelda lehna ɣef lqaεa, ad ilint lgirrat, laẓ akk-d zzelzlat.—Matta 24:3, 7.

  Leblat-agi (lmuṣibat-agi) neţwali-tent ass-a. Nezmer ihi a netḥeqqeq belli qrib aţ-ţemḥu Tgelda n Ṛebbi iɣeblan meṛṛa yecban wigi.