“E Leza wa mwi yulu aliyimika uwufumu wuno wutalitela wononeke.”​—Daniel 2: 44.

“Umwana monsi wapwa kwakwe sweswe! Aliwa amfumu yitu.”​—Ayizeya 9:6.

• Ungatungululwa nu wuteko wulungamane wuno wungakuletela icimwemwe.​—Ayizeya 48:17, 18.

• Uliyitopwa ukwikala munsi impya muno uliwa nu wumi uwuzima swinya uliwa ni nsansa nkaninye.​—Ukuwumbulika 21:3, 4.

Pali imilandu yiwili yino yingaleka tusuwile:

• Yesu walanjizizye vino Uwufumu wa kwe Leza wulicita. E Yesu wasambilizizye awasambilizi wakwe ukupepela uwufumu wa kwe Leza ukwiza nu kulonda kwakwe kucitwe munsi ndi vino mwi yulu. (Mateyu 6:9, 10) E Yesu walanjilizizye na vino lyo-o ipepo liliyasukwa.

  Pano Yesu walinji munsi walisizye wano walinji ni nzala, wapozizye awalwale, swinya wazyulupuzile na wafwe! (Mateyu 15:29-38; Yohani 11:38​-44) Vino wacisile vyalanjizyanga vyo alicita ndiwatalika ukuteka mu Wufumu wa kwe Leza.​—Ukuwumbulika 11:15.

• Vino vikucitika munsi vikulanjizya kuno Uwufumu wakwe Leza wandi wutalike ukuteka. Yesu wasowezile ukuti pano uwufumu wakwe Leza wutani wulete umutende, munsi muliwa inkondo, ivipowe ni vizumanzi.​—Mateyu 24:3, 7.

  Vyonsinye vino Yesu walanzile tukuvilola naminso yitu. Acino nanti kuvwilika, tumanyile kuno Uwufumu wa kwe Leza wandi wumale intazi zyonsinye.