«Dios yej onoʼ ajko yawi kita̱li̱ti se̱ gobierno yej nike̱man yawi poliwiti.» (Daniel 2:44, Traducción del Nuevo Mundo.)

«Se̱ te̱piltsin te̱makakej; wan yéj yawi gobernaro̱ti.» (Isaías 9:6.)

• Iní̱n se̱ ye̱kti gobierno yej welij te̱pale̱wiá nochi tejeme̱n (Isaías 48:17, 18).

• Pan yankuiʼ ta̱jli yej ayá̱ wejka onoʼ, Irreinoj Dios yawi kichi̱wati iga matiyo̱lpakikan wan amo matikpiakan kokolis (Revelación [Apocalipsis] 21:3, 4).

Kena, matikitakan o̱me tejté̱:

• Jesús kine̱xti te̱ yawi kichi̱wati Irreinoj Dios. Yéj kine̱xtilij idiscipulojwan iga makitajtanili̱kan Dios iga mawi̱ki Irreinoj wan mamochi̱wa yej Dios kineki pan Ta̱jli (Mateo 6:9, 10). Wan no̱ kine̱xtij kén yawi mochi̱wati iní̱n.

  Kua̱ʼ onoya pan Ta̱jli, Jesús kitamaʼ yej maya̱nayaj, kipajtij yej kipiayaj kokolis wan kixitij sekin yej miktoyaj (Mateo 15:29-38; Juan 11:38-44). Iga yéj mochi̱waskiá Rey de Irreinoj Dios, welij kine̱xtij tejté̱ ye̱kti yej yawi kichi̱wati iní̱n Reinoj iga yej kitajto̱lkakij (Revelación 11:15).

• Tejté̱ yej pano̱toʼ pan nochi ta̱jli kine̱xtiá iga achisan poliwi iga Irreinoj Dios mawi̱ki. Jesús kijtoj ke achto iga Irreinoj Dios makiwajliga yo̱lsewilis pan Ta̱jli onoskiá tamijmiktilis, maya̱nalis wan ta̱l-olinalis (Mateo 24:3, 7).

  A̱man nemi tikitaj iga panowa nochi iní̱n tejté̱ yej aye̱kti. Inó̱n iga welij tiksentaliáj toyo̱loj iga achisan poliwi iga Irreinoj Dios yawi kiye̱tali̱ti nochi tejté̱.