“A Dios el ngar a eanged a mo toketekii a rengedel el mo diak a ulebengelel.”​—Daniel 2:44.

A ngalek el sechal a lebeskid; e ngii a mo mengedereder er a kabelment.​—Isaia 9:6, 7.

• A melemalt el kabelment el sebechel el mo uchul a klungiolem.​—Isaia 48:17, 18.

• Ngar sel mei el beches el beluulechad, e kede mo kiei el cherrungel a klisichel a bedenged el ngar er a deurreng.​—Ocholt 21:3, 4.

Chochoi, kesengil e ngar er ngii a eru el uchul:

• A Jesus a ullecholt aike el bo loltaut a Rengedel a Dios. A Jesus a ullisechakl er a rultirakl er ngii el mo meluluuch me lemei a Rengedel a Dios me a soal a Dios bo lemotaut er a chutem. (Mateus 6:9, 10) Ngdirrek el ulechotii a rolel a bo el monger tia el nglunguuch.

  Sera lengar tia el chutem a Jesus, e ngulemekang er a resongerenger, e ulemekungil er a resmecher, e ullekiis er a rulekoad! (Mateus 15:29-38; Johanes 11:38-44) A Jesus el mo Mengedereder er a Rengedel a Dios er a ngar medad a uchul me ngulechotii a klebokel el olechotel aike el bo loruul a Renged el kirir tirke el chederedall er a Dios.​—Ocholt 11:15.

• A blekeradel er a beluulechad a oterekeklii el kmo a Rengedel a Dios a di kmedu el mei. A Jesus a ulemlaoch el kmo kedeb el taem er a uchei er a Renged a leketmeklii a budech er tia el chutem, e ngmo mui er a mekemad, bosech me a desiu.​—Mateus 24:3, 7.

  Kede omes aika el blekeradel er chelechang. Me ngsebechel el mo ulterekokl a rengud el kmo a Rengedel a Dios a di kmedu el mo okngemed aika el rokui el mondai.