«Dios xalak akgapun nawili akgtum tamapakgsin nema nikxni katisputli.» (Daniel 2:44, Traducción del Nuevo Mundo.)

«Chatum aktsu kgawasa lakachilh, chatum aktsu kgawasa kinkamaxkikanitan; chu xtamapakgsin natawila kxpakgxtun.» (Isaías 9:6.)

• Akgtum tamapakgsin xaʼakgstitum nema tlan nakinkamakgtayayan kinchatunukan (Isaías 48:17, 18).

• Nialh makgas, natlawa pi xatapaxuwan nalatamayaw kxasasti kakilhtamaku chu nialh katiʼanalh tajatat (Apocalipsis [Revelación] 21:3, 4).

Wi pulaktiy:

• Jesús masiyalh tuku natlawa xTamapakgsin Dios. Kamasiyanilh kstalaninanin pi kskinkgolh kxʼoracionkan xmilh xTamapakgsin Dios chu xtatlawalh xtalakaskin kKatiyatni (Mateo 6:9, 10). Na limasiyalh la nakgantaxtu uma tuku taskin.

  Akxni xlama kKatiyatni, Jesús kamawilh tiku lu xtsinksmakgolh, kamapaksalh tatatlanin, chu asta kamalakastakwanilh tiku xnikgonita (Mateo 15:29-38; Juan 11:38-44). Xlakata Mapakgsina kxTamapakgsin Dios xʼama wan, tlan masiyalh tuku lu tlan xʼama tlawa tamapakgsin xpalakata tiku xtapakgsinikgolh (Apocalipsis 11:15).

• Chuna la wi kakilhtamaku limasiya pi xTamapakgsin Dios nialh makgas namin. Jesús wa pi akxni xTamapakgsin Dios nina xmasputulh taʼakglhuwit kKatiyatni, xʼama litatsama guerras, tatsinkstat chu xʼama tachiki tiyat (Mateo 24:3, 7).

  La uku akxilhmaw putum umakgolh taʼakglhuwit. Wa xlakata, liwana katsiyaw pi xTamapakgsin Dios nialh makgas nalakkaxtlawa.