“Muluku a wirimu onokumiherya omwene ohinrowa omala, nnákhala oweriwa n’umwene mukina”.​—Daniyeli 2:44, Biblia Solempwa Sowarya.

“Novahiwa mwanamwane. Owerya w’omwene ori ni yowo”.​—Yesaya 9:5.

• Eguvernu ya xariya yeeyo enrowa woophwanyihani mureerelo.​—Yesaya 48:17, 18.

• Okumi wooloka ni woohakalaliha mwa elapo esya ya muhoolo.​—Wisupulula 21:3, 4.

Aayo, mwaha wa mathowa manli:

• Yesu aahooniherya ele Omwene wa Muluku onirowa aya opaka. Yesu aahiwiixuttiha atthareli awe ovekela wira Omwene wa Muluku orwe, ni yootthuna Awe yiireye valaponi. (Matheyo 6:9, 10) Yesu aahooniherya moota nivekelo nno ninrowa aya waakhuliwa.

  Okathi Yesu aaryaawe valaponi, owo aahaavaha yoolya atthu oovoliwa etala, waavoniha aretta, ni waahihimuxa atthu yaakhwiiye! (Matheyo 15:29-38; Yohani 11:38-44) Ntoko Namalamulela a muhoolo a Omwene wa Muluku, Yesu aahooniherya saana ele Omwene owo onirowa aya opaka mmureerelo wa atthu aniiwelela.​—Wisupulula 11:15.

• Itthu siniireya molumwenkuni sinnooniherya wira moohipisa Omwene wa Muluku onimoorwa. Yesu aahihimya wira ohinatthi Omwene oruuha murettele valaponi, saarowa okhumelela ikhotto, etala, ni itetere.​—Matheyo 24:3, 7.

  Olelo-va ninnoona itthu iyo. Nto nihaana ororomela wira moohipisa Omwene wa Muluku onoomaliha mixankiho iyo.