Nawˇ paˇ dmˬ gui ngeh maˬ ehˇ, tiˬ biˬ haw ngeh hawˇ-eu mawˇ kawˇ naˇ haˬ ngeh maˬ ehˇ, diˬ-eu, sehꞈ-eu, guiˇ deuˆ-eu, tsawˇ haˬ uiˬ gaˇ mawˬ puˇ pyehˬ-eu, gaˇ kawˆ heu deuˬ-ahˇ ya gaˬ ya mawˇ luꞈ-eu paˬ. Tiˬ poˆ na, nawˇ k’awꞈ naˇ-eu gawˇ-eu jeˬ-ahˇ ya tahˬ puˬ-awˇ, nawˇ gaˬ-eu tiˬ g’aˬ na bi shiˇ-euˬ baˬ da neh k’awꞈ noeˬ shaˬ luꞈ-eu paˬ.

Nawˇ heu loꞈ-ehˇ noeˬ-eu paˬ:

• Miˬyehˇ ngaˇ hawˇ-eu ngaˬ-euˬ nymˇ jiˇ-ahˇ, heu loꞈ-ehˇ bi pyeuꞈ mawꞈ ngaˇ loˇ?

• Shaˬ zahˬ-ahˇ laˆ piˇ-eu g’aˇ duˬ, aˬ suˇ g’aˬ-ahˇ shaˇ ju iˇ paˬ nga?

• Maˇ diˇ nui saˇ oꞈ-eu aˇ nah lehˇ jaˆ ngaˇ laˬ?

Gaˇ kawˆ heu deuˬ-ahˇ Jaˇliꞈ ehˇ k’oꞈ nehˬ nya meh.

• Tsawˇ haˬ zaˬ deuˬ naˇ-eu, mawˬ iˇ-eu, shiˇ-eu maˬ paˇ baw meh.—Pah mehˬ-eu 21:4

• “Kuiˇ shiˇ gaˇ nyeh nyeh nya laˇ.”—Iˇsaˬyaˇ 35:6

• “Myaˆ behꞈ mawˇ nya laˇ.”—Iˇsaˬyaˇ 35:5

•  Shiˇ-euˬ deuˬ paˇ g’oꞈ dehꞈ laˇ.—Yoˇhaˬ 5:28, 29

• Tiˬ g’aˬ-iˬ maˬ paˇ naˇ.—Iˇsaˬyaˇ 33:24

• Miˇ tsaˬ k’oeˇ taˆ jawˇ-eu tsawˇ haˬ deuˬ, dzaˬ-eu dawˇ-eu tiˬ byah tiˬ loꞈ jaˆ.—Ja ceuˬ 72:16

Jeˬ hu taꞈ-ahˇ boꞈ taˬ-euˬ gaˇ kawˆ heu deuˬ, tiˬ jeˬ-iˬ maˬ pyeuꞈ leˇ nya gaˇ ehˇ-eu paˬ lehˇ nawˇ noeˬ tehꞈ-a. Ehˇ k’awꞈ, g’awˬ myahˇ maˬ g’eh-ehˇ gaˇ kawˆ heu deuˬ miˇ tsaˬ k’oeˇ taˆ bi pyeuꞈ laˇ ma lehˇ, Miˬyehˇ saˇ jaˇ dzaˬ taˬ-awˇ, Jaˇliꞈ k’awꞈ aˬ yawꞈ aˬ joˆ-ehˇ mˇ pyeuꞈ-eu lehˇ paˇ ehˇ mawˇ nehˬ taˬ-euˬ meh.

K’oeˇ naˇ, Jaˇliꞈ aˬ dui-ahˇ nymˬ-mˇ mi naˆ-ehˇ nui saˇ oꞈ ni, aˬ joˆ-ehˇ ya jah-eu lehˇ jiˇ ehˇ nehˬ taˬ-euˬ meh. Nawˇ noeˬ shaˬ k’ahˬ lahˇ luꞈ-eu jeˬ-ahˇ shaˇ noeˬ haw sheˇ. Nymˬ-mˇ nawˇ pyuˇ shuiˇ, nymˇ jiˇ, naˇ gawˇ maˬ ngeuˇ naˇ, yawˬ ha gaˬ-eu g’aˬ shiˇ-euˬ gaˇ kawˆ heu deuˬ-ahˇ k’ahˬ lahˇ luꞈ-eu paˬ. Jaˇliꞈ gaˇ kawˆ heu deuˬ-ahˇ laˆ piˇ nya ni caw ba nehˬ nya-awˇ, laꞈ oˆ paw naˇ haˬ taˬ-euˬ gaˇ kawˆ heu deuˬ-ahˇ ehˇ k’oꞈ-eu heu neh k’awꞈ, nawˬ-ahˇ g’aˬ biꞈ nehˬ nya-eu meh.

• Aˬ dui shaˬ zahˬ-ahˇ aˬ jeˬ miˇ neh ya tahˬ puˬ-eu nga?

• Shaˬ zahˬ-ahˇ aˬ dui aˬ joˆ-ehˇ laˆ piˇ nya-eu nga?

• Nymˇ jiˇ nui saˇ oꞈ ni aˬ joˆ-ehˇ ya jahˇ-eu nga?

• Shiˇ naˇ, aˬ gaˇ iˇ-eu nga?

• Shiˇ dzeuˇ-euˬ aˬ dui gaˬ-eu deuˬ-ahˇ ya mawˇ k’oꞈ meh loˇ?

• Miˬyehˇ aˬ yawꞈ neh saˇ jaˇ k’aˇ dzaˬ taˬ-euˬ loꞈ-ehˇ mˇ meh lehˇ, aˬ dui aˬ jeˬ miˇ neh jah nya-eu nga?

 Nawˇ paˇ dmˬ heu dmˬ-ahˇ gui-eu heu naˇ, Jaˇliꞈ mehˬ-eu jeˬ-ahˇ siˬ nya mawꞈ gaˇ duˇ-eu meh. Paˇ dmˬ heu dmˬ nawˬ-ahˇ caw ba nehˬ nya meh. Yawˬ deuˆ na luꞈ-euˬ naˇ haˬ-eu jeˬ heu naˇ, nawˇ Jaˇliꞈ-ahˇ yaw muiˬ-ehˇ g’oˆ shaw laˇ ni caw ba nehˬ meh. G’awˬ mya lam g’aˬ Yeˬhawˇbaˬ-euˬ Saˇ kiˇ deuˬ nehˬ-ehˇ Jaˇliꞈ dzaw mawꞈ-eu meh. Nawˇ k’awꞈ dzaw mawꞈ-eu paˬ lehˇ nga maꞈ noeˬ tmˬ ma.