NƆ ÈHLƐN enyɔdrawema, yí kpɔ televiӡiɔn, alo yí ɖo to radioɔ, enu ciwo yí àkpɔ koɖo enyɔ ciwo yí àse sugbɔ kudo amɛwuwu, ahwawawa, koɖo vɔnvɔndonamɛ xomɛvevetɔ nu. Taŋfuin edɔ̀lele ɖe alo eku ao mɛ vevi ɖe tɔ na yí èsekɔ vevi.

Biɔ eoɖeki se mɔ:

• Ahan yí Mawu ɖui mɔ enuwo anɔ nɔ enyɛ koɖo anyi xomu nɛa?

• Fini nakpɔ kpedonu le yí akpanŋkɔ anyi cukaɖa lɔwoɔ?

• Fafa ŋtɔŋtɔ avani gbeɖekaa?

Bibla na ɖoŋci ciwo nu yí kankandoji le nɔ enyɔbiɔse cɛwo.

• Amɛwo dagbese vevi, aku nyɔxo, alo aku o.​—Enyɔdasɛ 21:4

• “Atakunɔ ate shigbe mɔ vegbɛ hannɛ.”​—Ezai 35:​6, nwt

• “Ŋkuviwo ahun nɔ ŋkuvitɔnnɔwo.”​—Ezai 35:​5, nwt

•  Woafɔn amɛ kukuwo do agbe. ​—Ӡan 5:​28, 29

• Mɛɖekpokpui dagbele dɔ̀ o.​—Ezai 33:24

• Ŋɖuɖu abɔ yí amɛshiamɛ akpɔ aɖu le nyigban ji.​—Ehajiji Wema 72:16

Àtɛnŋ abui fafɛɖe mɔ, edrɔxwenyɔ yí enu ciwo yí yehlɛn le kpashi ŋkɔtɔwo ji nɔ wema cɛ nyi. Vɔ Mawu yí ɖo gbe ɖɛ mɔ yeahɛn trɔtrɔ cɛwo va nyigban ji le majinjinɖe mɛ, yí Bibla dre lé Mawu avawɛ do.

Bibla gbenu nyɔ buwo. Ékpla mì enu ci ele mɔ mìajeshi keŋ akpɔ jijɔ ŋtɔŋtɔ, yí agbese vivi nɔ agbe lɔ le egbɛmɛ. Bu enu ciwo yí donɔ ŋmavui nɔ eo kpɔ. Wowo ɖewo yí nyi ehonyɔwo alo xomu mɛ cukaɖawo, edɔ̀lele alo eku ao mɛ vevi ɖe tɔ. Bibla atɛnŋ akpedo eo nu yí nakpanŋkɔ cukaɖa ŋtɔ́wo, yí atɛnŋ afa akɔn nɔ eo to ɖoŋcinana nɔ enyɔbiɔsewo shigbe ecɛwo hannɛ ji:

• Nyi yí taɖo mìkpekɔ fun ɔ?

• Lé mìawɛ akpanŋkɔ mìwo cukaɖawoɔ?

• Jijɔ atɛnŋ anɔ mìwo xomu mɛa?

• Nyi yí jɔnɔ do mì ji nɔ mìkuɔ?

• Mìagbetɛnŋ akpɔ mìwo mɛ vevi ciwo yí ku kea?

• Nyi yí taɖo mìatɛnŋ akando ji mɔ Mawu awa do yi gbeɖuwo pleŋ jiɔ?

 Wema cɛ ci èhlɛnkɔ dasɛ mɔ èjikɔ mɔ yeanya enu ci yí Bibla kpla teŋ. Wema cɛ akpedo eo nu. Enyɔbiɔsewo bɔ do mamamɛ ɖeshiaɖe nu, ecɛ akpedo eo nu yí nase Bibla gɔnmɛ nywiɖe wu. Ejɔnɔ ji nɔ amɛ miliɔn nɛniɖe mɔ, Yehowa Kunuɖetɔwo kplakɔ nu koɖo yewo. Mìkando ji mɔ yɛajɔ ji nɔ eo can. Mawu le yra eo hwecinu èkekeɛ do enu ciwo yí Bibla atɛnŋ akpla eo nu!