БӰГӰНГИ кӱнде кандый ла газет кычырза, телевизор кӧрзӧ эмезе радио укса, кайда ла јаман солундар бар. Јердиҥ ӱсти каршулу керектерле, јуу-чакла, терроризмле толуп калган! Анайда ок кажыбыста ла бойыстыҥ уур-кӱчтерис бар. Кем де оору-јоболдоҥ шыралап јат, кем де јуук улузын јылыйтып јат.

Сананып кӧрзӧӧр дӧ:

• Кудай мени эмезе мениҥ билемди шыралап јӱрзин деп кӱӱнзейт пе?

• Меге уур-кӱчтеримниҥ аайына чыгарга, нени эдер керек?

• Јердиҥ ӱстинде качан бирде амыр-энчӱ болор бо?

Бу сурактардыҥ каруулары Агару Бичикте бар.

• Улус база качан да оорыбас, карыбас ла божобос (Ачылта 21:4)

• «Аксак кижи, аҥ чылап калыыр» (Исаия 35:6)

• «Сокор улустыҥ кӧзи јарыыр» (Исаия 35:5)

•  Божоп калган улус ойто јӱрер (Иоанн 5:28, 29)

• Кем де оорыбас (Исаия 33:24)

• Курсак артыгынча болор (Сарын 72:16)

Ӧрӧги айдылганын куру сӧс деп айдарга меҥдебегер. Нениҥ учун дезе бу Кудайдыҥ берген сӧзи. Анайда ок Агару Бичикте Кудай бойыныҥ сӧзин канайып бӱдӱрер деп јарталып јат.

Је Агару Бичик слерге эмди де ырысту јӱрерге болужар аргалу. Слер акча-манаттаҥ, су-кадыктаҥ ла билениҥ кӱчтеринеҥ эмезе јуук улузыгар божогонынаҥ улам санааркап турган болорыгар. Бу уур-кӱчтерди ӧдӱп чыгарга, слерге Агару Бичик болужар. Агару Бичик токунал берер аргалу, нениҥ учун дезе анда кӧп сурактардыҥ каруулары берилет, темдектезе:

• Јердиҥ ӱстинде нениҥ учун андый кӧп јаман ла кыйын-шыра болот?

• Уур-кӱчтерди канайып ӧдӱп чыгар?

• Биле ырысту болзын деп, нени эдер керек?

• Божоп калган кижиле не болуп јат?

• Божоп калган јуук улузысты качан бирде база кӧрӧрис пе?

• Кудай бойыныҥ сӧзин бӱдӱрип салар деп, бис нениҥ учун алаҥзыбас аргалу?

 Слер бу бичикти кычырып јаткан болзогор, Агару Бичиктиҥ ӱредӱлерин оҥдоп аларга турганаарды кӧргӱзедигер. Бу бичиктеги сурактар Агару Бичиктиҥ ӱредӱлерин јакшы оҥдоп аларга болужар. Миллиондор тоолу улуска Иегованыҥ Керечилериле Агару Бичикти сурактардыҥ болужыла ӱренерге јараган. Слерге де јараар деп иженип турубыс. Агару Бичиктиҥ ӱредӱлерин билерге албаданып турганаарга Кудайдыҥ алкыжы јетсин!