FILL antü allkütukeiñ ñi mülen weñen, langümuwün, weychan, awkan ka ñi femngeken wedake dungu. Pipingekey tüfa radio, television, diario ka internet mu. Eymi ka kutranküleymi chi kam lay kiñe tami pu che, feymu kutrankawmekepelaymi.

Feymu ramtuwnge:

• Chaw Dios, ¿femngechi ayüniey ñi feleal iñche ka tañi pu che?

• Weda dungu mu rupali, ¿chumngechi kimafun ñi chumafel?

• ¿Mülepeay may küme felen Mapu mu?

Biblia wiñoldungukey tüfachi ramtun. Manelfali ñi feypin.

• Pu che kutrankawlayay, füchawelayay ka lawelayay (Apokalipsi 21:⁠4).

• “Tati küntrongelu wemul reke ringküyawtuay” (Isaías 35:⁠6).

• “Pu trawma tañi nge pelotuay” (Isaías 35:⁠5).

•  Pu layelu wiñomongetuay (Juan 5:⁠28, 29).

• Iney no rume kutranwelayay (Isaías 33:⁠24).

• Kom pu che nieay iyael (Salmo 72:⁠16).

Papeltufilmi wüla kom feychi kümeke dungu rupachi pagina mu, ‘feyentufal-lay’ piafuymi chi. Welu taiñ Fütra Chaw feypikünuy ñi femal kom tüfa Mapu mu pichiñma mew. Biblia kimeltukey chumngechi femtripayay.

Biblia ka kimeltukeeiñmu chumngechi ayüwküleal ka küme mongen nieal. Rakiduamnge chem fill rakiduamelkeeymu. ¿Kutranküleymi? ¿Nielaymi tami duamnieelchi plata? ¿Wedake dungu mu rupamekey tami pu che? ¿Lay kiñe tami pu che kam kiñe weni? Biblia kimeltuafeymu tami chumafel femngechi dungu mu rupamekelmi. Kafey yafültukuafeymu, wiñoldungulu kay famngechi ramtun:

• ¿Chumngelu (chemu) fente kutrankawkeiñ?

• ¿Chumafuiñ weda dungu mu rupaliyiñ?

• ¿Chumngechi ayüwküleafuy tami pu che?

• Lan mu pu che, ¿kañpüle mongelekepetuy may?

• ¿Mongepetuay may pu layelu?

• ¿Chumngelu maneluwafuiñ Chaw Dios ñi feypikünun mu?

 Eymi papeltumekefimi tüfachi lifru, feymu küpa kimniepelaymi Biblia ñi kimeltukeel. Tüfachi lifru kelluafeymu tami femal tüfa. Ñi ngüneduamal tañi chem pilen ti parrafo, müley kiñeke ramtun. Tüfa kelluaeymu tami doy küme adümafiel Biblia. Rume fentren che müna ayükey ngüneduamafiel Biblia pu Dungukelu Iney Ngen Jewba engün. Pewmangen eymi ka ayüafimi. Eluwkülelmi tami kimürpual chem kimeltukey Biblia, ¡maneluwküleiñ tami kümelkayaetew taiñ Chaw Ngünechen!