NGÉDA u ñañ lipep li mañwin, ngéda u mbéñge nkuu bititii, tole ngéda u ñemble nkuu mahop, u ntehe, u nogok ki ngandak miñañ mi liyanmbén, miñañ mi gwét, ni miñañ mi bôt ba ngwélél manola inyu kônha limut woñi. Bebeg le wemede u nok ndutu inyule u nkon, tole u nimis mut u ngwés.

Badba le:

• Baa hana nyen Djob a ngwés le me ni lihaa jem di niñ?

• Hee me nla kôhna mahôla inyu hônba mandutu mem?

• Baa bañga nsañ y’a ba kel yada?

Bibel i ntimbhe mambadga ma i nya i yôni.

• Bôt ba ga nok ha bé ndutu, ba ga un ha bé, ba ga wo ha bé.​—Masoola 21:4

• “Bôk mut y’a him kiki nlôm ngôlôñ.”​—Yésaya 35:6

• “Mis ma bandim m’a yiblana.”​—Yésaya 35:5

•  Bawoga ba ga témb i niñ.​—Yôhanes 5:28, 29

• Mut nye ki nye a ga kon ha bé.​—Yésaya 33:24

• Hiki mut hana isi a ga bana ngandak bijek.​—Tjémbi 72:16

Hala a nla ba jam li ntomb i hoñol le, mam u ñañ munu mapep ma bisu ma kaat ini ma yé ndik eem. Ndi Djob a bôn le ndék ngéda, a ga héñha mam hana isi. Bibel i ntoñol lelaa a ga boñ mam ma.

Ndi Bibel i ntelep ndik bé ha. I nkal bés mam di nlama yi inyu ba toi maséé, ni inyu kon maséé i niñ hanano. Hoñol ki mam ma ntééñga we. Bebeg le ma yé mam ma moni, tole mindañ ikété lihaa, makon, tole nyemb i mut u ngwés. Bibel i nla hôla we i hônba mandutu ma, i nla ti we hogbe, i nla ki timbhe mambadga kiki bo:

• Inyuki mandutu ma nkwél bés?

• Lelaa di nla hônba mandutu més?

• Baa lihaa jés li nla ba maséé?

• Kii ntagbe ngéda di nwo?

• Baa kel yada di ga tehe ki bôt bés ba gwéha ba ba bi wo?

• Inyuki di nla ba nkwoog nkaa le Djob a ga boñ mam momasôna a mbôn?

 Libak le u yé añ kaat ini li ñunda le u nyéñ yi mam Bibel i niiga. Ini kaat i ga hôla we. I gwé mambadga inyu maben, ma ma ga hôla we i tibil nok Bibel. Didun di bôt di bi kon maséé i kwel ni Mbôgi Yéhôva inyu mam ma Bibel. Di mbot ñem le yak we w’a bana minlélém mi maséé. Djob a nsayap we mu kii u nléba mam Bibel i niiga we!