NGA mwabelenga ilyashi mu nyunshipepala, mwakutika ku lyashi pa mulabasa nelyo pa TV, mulomfwa no kutamba amalyashi ayalanda pali bumpulamafunde, inkondo, ne fipondo. Nalimo mwalilwala nelyo cibusa wenu alifwa.

Yipusheni amuti:

• Bushe ifi fine e fyo Lesa afwaya ine no lupwa lwandi tuleikala?

• Ni kwi ningasanga ubwafwilisho pa kuti nshipikishe amafya?

• Bushe pano calo pakatala apaba umutende?

Baibolo ilasuka bwino aya mepusho.

• Abantu tabakalakalipwa, tabakalakota kabili tabakalafwa.—Ukusokolola 21:4

• “Uwalemana amolu akacilauka nge nsebula.”—Esaya 35:6

• “Amenso ya mpofu yakamona.” —Esaya 35:5

•  Abafwa bakabuushiwa. —Yohane 5:28, 29

• Takwakabe ukulwala. —Esaya 33:24

• Takwakabe insala. —Amalumbo 72:16

Nalimo kuti mwatontonkanya ukuti ifyo mubelengele muli cino citabo fya kwelenganya fye. Lelo Lesa alilaya ukuti nomba line ali no kufikilisha ifi fyonse pano isonde kabili Baibolo yalilondolola ifyo akafikilisha aya malayo.

Baibolo yalilanda pa fintu na fimbi. Ilatweba ifyo tulingile ukwishiba pa kuti tube ne nsansa sha cine cine no kwikala bwino na pali ino ine nshita. Taleni tontonkanyeni pa mafya ayamusakamika. Nalimo tamukwete indalama, namukwata amafya mu lupwa, mulalwalilila, nelyo lupwa wenu alifwa. Baibolo kuti yamwafwa ukushipikisha amafya ya musango uyu kabili kuti mwasansamuka nga mwabelenga amashiwi ayengamwafwa ukusanga amasuko ku mepusho pamo nga:

• Cinshi tuculila?

• Kuti twashipikisha shani nga tuli na mafya?

• Bushe bonse mu lupwa kuti twaba ne nsansa?

• Bushe umuntu nga afwa aba shani?

• Bushe tukatala atumonanapo ne fibusa fyesu abafwa?

• Kuti twacetekela shani ukuti cine cine Lesa akafikilisha fyonse ifyo alaya??

 Apo mulebelenga ici icitabo, cailanga fye apabuuta tuutu ukuti mulefwaya ukwishiba ifyo Baibolo isambilisha. Ici icitabo cikamwafwa. Amaparagrafu yonse nayakwata ifipusho ifikamwafwa ukwishiba bwino Baibolo. Abantu abengi sana balatemwa ukusambilila Baibolo ne Nte sha kwa Yehova. Tulesubila ukuti na imwe bene mukatemwa ukusambilila. Yehova alemupaala lintu mulesambilila ifyo Baibolo isambilisha!