SANGGAH nasiam mambasa koran, manonton TV, atap pe manangar radio, bahat do barita pasal hajahaton, porang, ampa terorisme. Marsitaronon do ra nasiam halani naborit atap pe marujung goluh na hinaholonganmu.

Rimangi ma:

• Ai on do harosuh ni Naibata hu bangku ampa kaluargangku?

• Ija do boi dapot ahu pangurupion sanggah dong parsoalan?

• Ai ra do adong hadameion?

Balos ni sungkun-sungkun ai dong bani Bibel.

• Seng dong be na marpusok ni uhur, na matua, atap na matei.​—Pangungkabon 21:4

• “Manlumpat-lumpat do ijai halak na repat songon ursa.”​—Jesaya 35:6

• “Bukaon ma ijai mata ni halak na mapitung.”​—Jesaya 35:5

•  Halak na matei manggoluh use.​—Johannes 5:28, 29

• Seng dong be na boritan.​—Jesaya 33:24

• I sab tanoh on ganup halak mandapot buei sipanganon.​—Psalmen 72:16

Ra do pangahap nasiam pitah nipi hansa na isurat bani alaman na parlobei i buku on. Tapi lang piga dokah nari Naibata sihol padearhon tanoh on, songon na dob ijanjihon-Ni. Anjaha ipatorang Bibel do sonaha janji ai boi saud. Bahat ope na ipatorang Bibel. Ipatugah do banta na porlu ihorjahon ase marmalas ni uhur goluhta sonari on. Pingkirhon ma lobei, aha na gati mambahen nasiam holsohan. Boi do halani duit atap parsoalan kaluarga, naborit, atap marujung goluh na ihaholongi nasiam. Bibel boi mangurupi janah mangapoh nasiam sanggah manaron hasunsahan marhitei balos ni sungkun-sungkun on:

• Mase hita marsitaronon?

• Aha do bahenonta sanggah dong parsoalan?

• Boi do martuah kaluarganta?

• Aha do na masa bani halak na matei?

• Boi do hita jumpah use bani na hinaholonganta na dob matei?

• Mase hita porsaya anggo Naibata boi pasaudkon ganup janji-Ni?

 Sasintongni, sanggah ibasa nasiam buku on, ai patuduhkon anggo nasiam sihol mambotoh aha na iajarhon Bibel. Buku on boi mangurupi nasiam. Bai ganup paragrap dong sungkun-sungkun na mangurupi nasiam mangarusi isi ni Bibel. Marjuta halak marosuh mangulas Bibel rapkon Saksi-Saksi Jahowa. Andohar sonai homa nasiam. Ipasu-pasu Naibata ma ham ase mambotoh aha na iajarhon Bibel bamu!