ÉYOÑ wo lañe bekalate mefoé, éyoñ wo yene bingeñgeñ, nge vô’ôlô radio, wo yen a wô’ô minkañete mewôé me bôt, a bita. Éko éziñe na, womien wo kon, nge na môt wo nye’e a te wu.

Sili’i womiene na:

• Ye ana nye Zambe a yi na, ma a nda bôte jam bi nyiñ?

• Nne me ne yen mvolane ya dañe minju’u miame vé?

• Ye nya mvo’é a ye bo môs éziñ?

Kalate Zambe a ve benya biyalan ya minsili mite.

• Bôt ba ye ke beta wô’ô mintaé, nge yômbô, nge wu.​—Nlitan 21:4

• “Mbôbô’ô w’aye tyele si aval ane nnôm nkok.”​—Ésaïe 35:6

• “Mise mindindim m’aye kuiban.”​—Ésaïe 35:5

•  Bewu ba ye wômô.​—Jean 5:28, 29

• Teke môt éziñ a ye beta kon.​—Ésaïe 33:24

• Môt ase a ye bi abui bidi ya di.​—Besam 72:16

É ne tyi’ibi ya simesane na, mam bi ndeme mane lañe mefebe ya mvuse le, me ne fo’o ve biyeyem. Ve Zambe a ka’a bia na, ana’ana a ye mane bo mam mese bi ndeme yene le, si va, a Kalate Zambe a kate bia aval avé a ye de bo.

Kalate Zambe a kate fe bia mam mefe. A kate bia mam bia yiane bo asu na, bi nyiñe mevak été éyoñe ji. Tame ve’ele simesan mam me atyelé wo nlem yôp. A ne bo mam me moné, mam ya nda bôt, ôkon, nge ke awu ya môt wo nye’e. Kalate Zambe a ne volô wo na, ô dañe minju’u mite mise, a ve wo ndi nlem a zene ya biyalane ya minsili mi:

• Amu jé bia tôbane minjuk?

• Aval avé bi ne dañe minju’u bia tôbane mie?

• Ye nda bôte jangan é ne nyiñe mevak été?

• Môt a ke vé, éyoñ a wu?

• Ye bia ye fo’o beta yen bôte bangan bia nye’e be maneya wu?

• Amu jé bi ne tabe ndi na, Zambe a ye tôé bengaka’a bese a nga bo?

 Nlañane wo lañ Kalate nyi wo liti na, wo kômbô yem mam Kalate Zambe a ye’ele. Kalate nyi a ye volô wo. Memane me abeñ ése, wo ye koone minsili. Minsili mite mi aye volô wo na, ô tu’a wôk Kalate Zambe. Bizu’u bi bôt bia nye’e bi yé’é mejô me Zambe a Bengaa be Yéhôva. Bi nto ndi na, wo fe wo ye bo môte wua ya été. Bia ye’elane Zambe na, a botane wo amu wo lañe Kalate nyi.