WEN yu wach di nyooz pahn TV, er reed it eena nyoozpaypa, er lisn tu it pahn rayjo, yu si ahn hyaa bowt waar, kraim, ahn terorizm. Er maybi yoo di sofa bikaaz yu sik er bikaaz sohnbadi weh yu lov ded.

Aks yuself:

• Da dis Gaad waahn fi mee ahn mi famili?

• Wehpaat Ah ku geh help fi deel wid mi prablem dehn?

• Ah wanda if chroo pees wahn eva deh?

Di Baibl gi wi ansaz weh wi ku chros.

• Peepl noh wahn feel payn nohmoh, dehn noh wahn geh oal, ner ded nohmoh.​—Revilayshan 21:4

• “Di wan dehn weh kripl wahn ku moov laik wahn dyaa.”​—Isaiah 35:6

• Di wan dehn weh blain wahn ku si.​—Isaiah 35:5

•  Dehn wan weh ded wahn liv agen.​—Jan 5:28, 29

• Nobadi wahn geh sik.​—Isaiah 33:24

• Evribadi wahn ga lata food fi eet.​—Psalm 72:16

Weh yu reed op tu now eena dis buk da noh jos wahn jreem, ih reel. Eena di Baibl, Gaad mi pramis wi dat soon hihn wahn mek dehndeh chaynj pahn di ert. Di Baibl tel wi how hihn wahn du aala dis.

Bot di Baibl du moa dan dat. Ih tel wi weh wi need fi noa soh dat wi ku bee hapi an injai laif rait now. Tek wahn lee taim fi tink bowt di ting dehn weh mek yu wori. Ih ku bee moni er famili prablem. Yu mait di deel wid wahn siknis, er wan a yu fren er famili memba ded. Di Baibl ku help yu deel wid dehnya prablem, ahn yu ku geh komfert wen yu fain ansa tu kweschanz laik:

• Wai wi sofa soh moch?

• How wi ku deel wid wi prablem dehn?

• How wi famili ku bee hapi?

• Weh hapm tu wi wen wi ded?

• Yu tink wi famili er fren dehn weh ded wahn kohn bak tu laif?

• Wai wi ku noa fi shoar dat Gaad wahn du evriting weh ih mi pramis wi?

 Sins yu di reed dis buk, dat di shoa dat yoo waahn noa weh di Baibl teech. Dis lee buk wahn help yu. Eech paragraaf ga wahn kweschan weh wahn help yu fi andastan di Baibl beta. Milyanz a peepl laik diskos di Baibl wid Jehoava Witnisiz. Wi hoap yu wahn laik it tu. Gaad wahn bles yu bikaaz yu waahn laan weh di Baibl teech!