SI TA le tu diario, ta mira televicion o ta oi radio, ta puede tu mira y oi maga noticia acerca na crimen, guerra y terorismo! Siguro, tu mismo ta sufri por causa na enfermedad o cay ya muri el un persona que importante contigo.

Preguntá tu na de tuyu mismo cuerpo:

• Este ba el querrer del Dios para conmigo y na de mio familia?

• Onde yo puede incuntra ayuda para enfrenta el de mio maga problema?

• Hay tiene pa ba deverasan paz?

El Biblia puede contesta con ese maga pregunta.

• Gendeh mas sinti dolor, queda viejo o muri el maga gente.​—Revelacion 21:4

• “El maga piang hay salta igual con el venao.”​—Isaias 35:6

• “El ojos del maga bulag hay abri.”​—Isaias 35:5

•  Hay vivi otravez el maga muerto.​—Juan 5:28, 29

• Nuay quien hay enferma.​—Isaias 33:24

• Hay tiene abundancia de comida para na todo.​—Salmo 72:16

Facil lang pensa que sueño lang el cosa tu ya le na maga primer pagina de este libro. Pero ya promete el Dios que gendeh mas dura hay hace le se maga cambio aqui na tierra y ta enseña el Biblia si paquemodo le se cumpli.

Gendeh lang ese el cosa ta enseña el Biblia. Ta habla tambien este si paquemodo kita tiene un alegre vida ahora. Pensa el maga cosas que ta dale contigo lingasa. Posible, incluido alli el cen, problema na familia, enfermedad o el muerte del un persona que importante contigo. El Biblia puede contigo ayudá para enfrenta con ese maga problema. Puede tambien dale comforta contigo el maga contestacion de este na maga pregunta como:

• Porque kita ta sufri?

• Paquemodo kita puede enfrenta con el diaton maga problema?

• Puede ba queda alegre el diaton familia?

• Cosa el condicion del maga muerto?

• Puede pa ba kita mira otravez con el diaton maga familia quien ya muri ya?

• Porque kita puede asigura que hay cumpli el Dios con el de suyu maga promesa?

 El de tuyu lehida na este libro ta dale mira que quierre tu sabé si cosa ta enseña el Biblia. Este libro hay ayudá contigo. El maga pregunta para na maga parapo hay ayudá contigo entende mas con el Biblia. Millones de gente el alegre estudia con el Biblia junto na maga Testigo de Jehova. Ta esperanzá kame que ansina tambien tu. Ojala hay bendici contigo el Dios mientras ta discubri tu si cosa contigo puede enseña el Biblia!