THANHCA kan rel tik, TV kan zoh tik le radio kan ngaih tikah zaang-ennak, raltuknak le ṭihphannak kong tampi kan theih i kan hmuh. Nangmah theng zong zawtnak asiloah dawtmi pakhatkhat thihnak ruangah lungrethei in na  um men ko lai.

Hitin i hal:

• Mah hi keimah le ka chungkhar caah Pathian tinhmi maw a si?

• Ka harnak hna tei khawh awkah khoika ah dah bawmhnak ka hmuh khawh lai?

• Vawleicung ah daihnak a um lai tiah ruahchan awk zeital a um maw?

Baibal nih mah biahalnak hna kha lungtling lakin a kan leh.

• Mi cu fahnak an ing ti lai lo, an tar ti lai lo i an thi ti lai lo.—Biathlam 21:4

• “Kebei cu an pet an laam lai.”—Isaiah 35:6

• “Mitcaw nih khua an hmuh lai.”—Isaiah 35:5

•  Mithi cu an nung ṭhan lai.—Johan 5:28, 29

• Ahohmanh an zaw ti lai lo.—Isaiah 33:24

• Vawleicung ah rawl tampi a um cang lai.—Salm 72:16

A hmasa cahmai i langhtermi a kong hna cu saduhthah men an si tiah kan ruah khawh men. Asinain mah hna kha ka tlinter lai tiah Pathian nih bia aa kam i zeitindah a tlinter lai ti kha Baibal nih a fianter.

Baibal nih mah nak tam deuh in a fianter. Atu hmanhah lung a tling i a nuammi nunnak ngeih awkah aan bawmh khawh. Na lungretheihnak le na harnak kong hna kha chikkhat in ruat ta hmanh. Mah ah tangka chambaunak, chungkhar buaibainak, damlonak asiloah dawtmi pakhatkhat thihnak ti bantuk hna aa tel. Baibal nih na tonmi buaibainak hna tawnghtham awkah aan bawmh khawh i a tanglei biahalnak hna i a phi zong aan pek khawh:

• Zeicah sifah harnak kan ton?

• Kan tonmi lungretheihnak hna kha zeitindah kan tawnghtham khawh?

• Kan innchungkhar kha zeitindah kan nuamhter khawh?

• Kan thih tikah zeiahdah kan can?

• Kan dawtmi a thimi hna he kan i tong ṭhan lai maw?

• Pathian nih a biakam a tlinter lai ti kha zeicah kan zumh khawh?

 Hi cauk na relmi nih Baibal cawnpiakmi hngalh na duh kha a langhter. Hi cauk nih aan bawmh lai. Baibal kong hngalhthiam deuh awkah aan bawm hngami, catlangbu he aa tlaimi biahalnak hna a um. Minung nuai tampi cu Jehovah Tehte Hna he Baibal kong i ruahṭi kha an duh. Nang zong na duh ve lai tiah kan i ruahchan. Baibal cawnpiakmi na hun hngalh bantukin Pathian nih thluachuah in pe ko seh!