THUZAKNA laite na sim ciang ahi zongin, TV na et ciang ahi zongin, radio na ngaih ciang ahi zongin mite siat nading hiamtatna, gal kidonate le ngongtatna thute mu ding hi teh. Tua banah na dam lohna ahih kei leh na it khat peuhpeuh in hong nusiat manin a lunggim zong hi khathei ni teh.

Nang le nang na kidong in:

• Kei le ka innkuan tungah hih bang thute a pian pen Pasian deihna a hiam?

• Ka haksatnate a sian nading huhna koi munah mu ding ka hiam?

• Kilemna takpi a hong piang takpi mah ding hiam?

Tu-a i theihnop thute tawh kisai a lungmuanhuai dawnna Lai Siangtho sungah om hi.

• Mihingte kuamah cina-in, teeka si nawn lo ding uh hi.—Maangmuhna 21:4

• “Tua ciangin khebai mipa [“sakhi bangin,” NW] diangin lam ding.”—Isaiah 35:6

• “Mittawte’ mit kihong ding.”—Isaiah 35:5

•  Misite a nungta dingin hong hingkik ding uh hi.—Johan 5:28, 29

• Kuamah cina nawn lo ding uh hi.—Isaiah 33:24

• Leitunga om khempeuh in annek tui dawn kicing takin nei ding uh hi.—Late 72:16

Hih laibu, laimai masa lama na sim thute pen mang tawh kibang lel, ci-in na ngaihsun khathei hi. Ahih hang Pasian in a sawt loin leitungah tua bangin ka khel ding hi ci-in hong kamciamin, hong bawlsak dan ding zong Lai Siangtho in hong hilh hi.

Lai Siangtho in tu-a sangin a tamzaw hong hilh lai hi. Tu hun mahin lungnopna takpi le nuntakna nuam i ngah nading a kisam thute hong hilh hi. Tu’n nang hong lunghimawhsak thute na ngaihsun pak in. Tua sungah innkuan sung haksatna, sumlepai haksatna, cidam lohna ahih kei leh na it khat peuhpeuh in hong sihsan zong hi thei hi. Tua haksatnate na siansak theih nading Lai Siangtho in hong huh thei a, tua banah hih i theihnop thute hong dawnkikna tawh hong hehnem ding hi:

• Ba’hangin haksatna le gimnate thuak ihi hiam?

• I haksatnate koi bangin siangsak thei ding ihi hiam?

• Ka innkuan sung a lungnuam thei ding hiam?

• I sih ciang bang piang ihi hiam?

• Hong nusia i it i ngaihte tawh i kimukik ding hiam?

• Pasian in ama kamciam khempeuh hong tangtungsak ding hi cih ba’hang muang ngam ihi hiam?

 Man takin gen le’ng, hih laibu na simna in Lai Siangtho hong hilh thute na lunggulhna a lak na hi hi. Hih laibu in hong huh ding hi. Laikhawkte tawh kisai dotnate om a, tua dotnate in Lai Siangtho na tel zawk na’ng hong huh ding hi. Mi awn tampi in Jehovah Tecite tawh Lai Siangtho kikup khop pen nuamsa mahmah uh hi. Nangh zong nuamsa ding hi teh. Lai Siangtho hong hilh thute na sin kawmin Pasian in thupha hong pia ta hen!