TELEBISORDE, kartade, radiode, Internet akʉbʉrʉde dayirãbara ũrĩpanʉ ẽbẽrarã nemitia omia ʉ̃rʉ, yõ ʉ̃rʉ, adewara ẽbẽra yõ obʉ wuabema daʉperaita. Bʉra atiara zʉbʉriabʉbaibara kayabʉ kʼarea mawũã ẽ bʉrʉ bʉ mebẽã beida kʼarea.

Krĩchara naʉ̃ta:

• ¿Daizezebara mʉ̃ta akʉza mʉ̃ mebẽrãta kʼãwũã zʉbʉria bamarẽã kãgabasika?

• ¿Bedʼea zroma erbʉdera sama ũduseabʉ kʼarebara?

• ¿Ewari abaʉde dayirãra neneẽã panaika naʉ̃ drʉdera?

Daizeze Bedʼeaba panʉseabʉ maʉ̃ bedʼeara akʉza dayirãba ĩjãseabʉ mama jarabʉra.

• Ẽbẽrarã wuara pʉa nẽẽbayi akʉza zõna bakabayi akʉza beikabayi (Apocalipsis 21:4).

• «Wãbe ẽ bʉra pinãdrʉyi beguiba obʉ kĩrãkʼa» (Isaías 35:6).

• «Dabʉba ũdu ẽã bʉbara jẽda ũduyi» (Isaías 35:5).

•  Beidarãra jẽda piradrʉyi (Juan 5:28, 29).

• Mia kʼaita kayakabayi (Isaías 33:24).

• Ẽbẽra jõmaʉ̃ita bayi yikora (Salmo 72:16).

Bʉa krĩchaseabʉ naʉ̃ kartade nãã akʉdara kʼãĩmokarata. Mamina Daizezebara jara zebʉrʉ aranʉ naʉ̃ drʉa kĩrãwãreã oita adewara Daizeze Bedʼeabara jarabʉ sãwũã mawũã oita.

Akʉza Daizeze Bedʼeabara dayirã jaradiabʉ, kʼãrẽta oseabʉta dayirã sobia bʼaita. Krĩchara naʉ̃ta, bʉ krĩcha zroma obinʉmʉ ʉ̃rʉ. Bedʼea zroma erbʉbaibara bʉ mebẽrãbawara, plata kʼarea, kayanʉmʉ baera, mawũã ẽ bʉrʉ krĩcha zroma obʉ bʉ mebẽrãta beisi baera. Daizeze Bedʼeabara kʼarebaseabʉ naʉ̃ bedʼea zroma awuantaita akʉza so zarea diaseabʉ. Daizeze Bedʼeabara panʉbʉ za edre widibʉ bedʼeara.

• ¿Kʼãrẽa zʉbʉriapanʉ?

• ¿Bedʼea zroma nããra sãwũa zarea panaseabʉpe?

• ¿Kʼãrẽta oseabʉ dayirã mebẽrãbawara sobia bʼaita?

• ¿Samadogo dayirã beibʉrʉdera?

• ¿Dayirãbara mebẽrã beidara jẽda ũdudaika?

• ¿Kʼãrẽa wãrĩnu ĩjãpanʉ Daizezeba jaradara aripe oita?

 Bʉa naʉ̃ librota akʉbʉbʉrʉ, bʉa kʼawuakĩrãbʉbaibara Daizeze Bedʼeaba jaradiabʉta. Naʉ̃ libroba bio kʼarebayi bʉra. Adewara parrapo jõbodoarebʉba kʼarebayi audre biʼia ũrĩta Daizeze Bedʼeara. Ẽbẽrarã mejãchaʉta Jeowa ʉ̃rʉ Kʼawuabipanʉrãbawara bedʼeakĩrã bedʼeapanʉ Daizeze Bedʼea ʉ̃rʉ. Bʉsida bedʼeakĩrãbʉbaibara ãyibawara. Daizezeba kʼarebayi bʉra zarea obʉ baera iyi bedʼea kʼawuaita.