YAʼ ti periódico tac, televisión, radio yicʼot Internet, miʼ wen ñumel noticia tac chaʼan jontolil, guerra yicʼot terrorismo. Tajol jatet woli a ñusan wocol tiʼ caj jiñi cʼamʌjel o chaʼan tsaʼ chʌmi juntiquil cʼux bʌ maʼ wubin.

Cʼajtiben a bʌ:

• ¿Jimba yom bʌ Dios chaʼañon yicʼot chaʼan c familia iliyi?

• ¿Baqui miʼ mejlel c taj j coltʌntel chaʼan mic ñusan jiñi wocol tac?

• ¿Muʼ ba i cajel ñʌchʼtʌlel ti jumpʼejl bʌ qʼuin ila ti Pañimil?

Jiñi Biblia miʼ yʌqʼueñonla i jacʼbal mucʼʌch bʌ i mejlel lac ñop.

• Jiñi quixtañujob maʼañix mi caj i yubiñob wocol, maʼañix mi caj i ñoxʼañob yicʼot i chʌmelob (Apocalipsis [Revelación] 21:4).

• «Jini qʼuichqʼuichña bʌ i yoc mi caj i tijpʼel» (Isaías 35:6).

• «Mi caj i chaʼ cʼotel i wut jini xpotsʼob» (Isaías 35:5).

•  Mi caj i chaʼ tejchelob jiñi chʌmeñoʼ bʌ (Juan 5:28, 29).

• Maʼañix majqui mi caj i cʼamʼan (Isaías 33:24).

• Pejtel quixtañujob mi caj i tajob i bʌl i ñʌcʼ (Salmo 72:16).

Tajol maʼ ñaʼtan chaʼan jumpʼejl jach ñajal jiñi tsaʼ bʌ a pejca ti ñaxan tac bʌ i yopol chaʼan ili libro. Pero Dios tsaʼix i yʌcʼʌ i tʼan chaʼan wen lʌcʼʌlix mi caj i tojʼesan jiñi wocol tac i jiñi Biblia miʼ yʌl bajcheʼ mi caj i mel.

Jiñi Biblia miʼ yʌl chuqui yom mi lac mel chaʼan tijicñayonla ili ora. Jumucʼ ñaʼtan chuqui tac maʼ cʼojoʼtan. Tajol an a wocol tac ti a familia, chaʼan bʌ taqʼuin, chaʼan cʼamʌjel o chaʼan tsaʼ chʌmi juntiquil muʼ bʌ a cʼuxbin. Jiñi Biblia miʼ mejlel i coltañet a cuch a wocol tac. Cheʼ jaʼel, miʼ mejlel i ñuqʼuesan a pusicʼal come mi jacʼ ili cʼajtiya tac:

• ¿Chucoch mi lac ñusan wocol?

• ¿Bajcheʼ miʼ mejlel laj cuch jiñi wocol tac?

• ¿Chuqui miʼ mejlel lac mel chaʼan tijicñayonla ti lac familia?

• ¿Chuqui mi lac chaʼlen cheʼ bʌ mi lac chʌmel?

• ¿Muʼ ba caj lac chaʼ qʼuel jiñi chʌmeñoʼ bʌ lac chaʼan?

• ¿Chucoch miʼ mejlel lac ñop chaʼan Dios mucʼʌch caj i tsʼʌctesan pejtelel albil bʌ i chaʼan?

 Mi woli a pejcan ili libro, chaʼañʌch a wom a cʌn muʼ bʌ i pʌs jiñi Biblia. Mucʼʌch caj i mejlel a cʌn yicʼot i coltaya ili libro. Jiñi cʼajtiya tac muʼ bʌ i chʼʌm tilel jujumpʼejl párrafo mi caj i coltañet a ñumen chʼʌmben i sujm jiñi Biblia. Yonlel quixtañujob miʼ mulañob i cʌn i chaʼan bʌ Biblia yicʼot i testigojob Jehová. Mic pijtan lon chaʼan cheʼʌch ti a tojlel jaʼel. ¡Laʼ i coltañet Dios chaʼan woli a chaʼlen wersa a cʌn chuqui miʼ cʌntesañonla jiñi Biblia!